Mizoram ukil ha'n Magistrate ṭhenkhat chet dan an dem

Aizawl, April 29, 2014: Mizoram Bar Association (MBA) chun thusuok siemin, judicial officer ṭhenkhatin K. Chhawnṭhuama thubuoi chungchang-ah dan le mimal indikna chanvo nasa taka an palzut niin an hril a, tuta hnungin dan le mimal indikna chanvo palzutna um ta naw sien tiin an hril.

MBA thusuok chum, “Judicial separation kan nei taa, court khomin ṭan bik le ṭi bik nei loa dan anga rorel a, dan kenkaw ding ani laia kan magistrate laia kan suong em em Aizawl Chief Judicial Magistrate-in, police hai mi man pahni hai court-a an ṭhuoi hun khom nghak zo loa court sung khom nilo PTC Lungverh hmuna court hun sung khom nilo zan-ah a zu fe a, an mi man hai darkar 72 sung police kuta um phalna order April 15, 2014-a a siem el hi State Executive thuhnuoia Judiciary intuklutna-ah kan ngai a, poi kan ti tak zet,” tiin an ziek.

Bar Association thusuok chun, “Police haiin an mi man hai lock-up ah an sie fel hnung, darkar 72 kol phalna an nei zing laiin darkar 24 hnung chauh, a tuk April 16, 2014 zana magistrate first class pakhat, chief judicial magistrate khom niloin zan dar 7 hnungtieng bok jail-ah sie lutna order, ama chengna quarter anthoka alo siem ve pei hi court fedan an naw a, dan palzutna nasa tak a nih,” tiin, tuta hnung hieng thil hi tlung ta naw sien an nuom thu an tarlang bawk.

Lok Sabha inthlang thok 7-na

New Delhi, April 30, 2014: Voisun khan India State 7 le Union Territory 2 hai-ah Lok Sabha biel 89-ah inthlang thok 7-na chu nei a nih.

Inthlang neina ding hai chu Andhra Pradesh-ah seat 17, Bihar-ah 7, Gujarat-ah 26, Jammu and Kahmir-ah 1, Punjab 13, Uttar Pradesh 14, West Bengal 9 le Dadra & Nagar Haveli le Daman & Diu-ah pakhat ve ve a nih.

Gujarat le Punjab a hai hin Lok Sabha seat an ne hai chu inthlang ṭum khat-ah an thlang nghal vong ding a nih.

Inthlang thok 7-na a hin booth 152,673 siem a nih.

Court-ah Chhawnṭhuama an lang

Aizawl, April 30, 2014: EVM a sukchingpen nia Mizoram CM Lal Thanhawla intumtu K. Chhawnṭhuama ‘Mizo Phantom’ chu zani khan Court-ah an lang a, jail-ah a hrana sie ni tang a tih.

K. Chhawnṭhuama hi a ukil haiin bail suok dingin an hni a, hi chungchang hi magistrate-in voisun ngaituoin thuthlukna puong a tih.

K. Chhawnṭhuama hin chief judicial magistrate court-ah inlangin, magistrate-in an tangna le enkol ani dan-ah soisel a nei le nei naw an don chu sangin, soisel a nei naw thu a hril.

A ukil-in jail-a intang dang hai bula nilo, a hrana sie bik dinga a ngen chu court-in a phal pek a, amiruokchu Aizawl DC pompui hmasak a ngai phot a nih.

Manipur-in women’s national-ah goal 22 a thun

Dibrugarh, April 29, 2014: Manipur nuhmei hai chun 20th Senior Women’s National Football Championship-a an inhnel hmasatakna-ah Chhattisgarh hai chu goal 22 pet lut pekin hratna an chang. Ningani April 30 khin an Group-a um ve Uttar Pradesh team hai leh inkhing an tih.

20th Women’s National Championship-a hin India hmarsak anthok State 5 an ṭhang a, Meghalaya le Nagaland hai chu an ṭhang ve naw a nih. Hi tournament hi thla nawk chen inhnel ning a tih.

Thawtranni khan Group B-ah Mizoram le Odisha hai chu intumin, Odisha chun Mizoram chu 3-0 in a hne a nih. Mizoram chun April 30 hin Goa intumpui nawk a tih.

Group C-a um Tripura chu voi 2 an inhnel taa, an la hrat naw ve ve a nih. Pathienni khan Bihar hai chu 2-1 in an hne naw a, Thawṭanni khan Kerala hai chu 3-1 in an hne naw bok a nih.

Group C-a um vet ho Sikkim chu an inkhelna hmasatak Thawlenni khan West Bengal chu 1-0 in a hne a, Ningani May 1 khin inhnel nawk an tih.

Nilaini April 30 hin Group D-ah Arunachal Pradesh le Assam hai chu inkhing an tih.

Thawṭanni khan Assam chu Tamil Nadu an intumpuia, 0-0 in an in draw pui a nih.

U-19 I-League-ah Tata Academy an champion

Shillong, April 29, 2014: Tata Football Academy (TFA) chun Hindustan FC hai chu U-19 I-League final-ah 4-0 a hnein hratna an chang a, points 13 an hmuh. Final hi Thawlenni April 29 khan Jamshedpur-a inhnel a nih.

U-19 I-League final a hin Manipur suok Udanta Singh (k. 18) chun goal 4 zet TFA ta dingin a pet lut a, game 5-ah goal 9 pet lutin, hi tournament-a goal pet lut rawn tak a nih.

East Bengal forward Jiten Murmu chun game 5-ah goal 7 a pet lut a, goal pet lut rawn tak dottu a nih.

Shillong Lajong FC hai chu game 5-ah voi 2 chauh an hrat a, an points hmu zat chu 6 niin, points chart-ah a 4-na an nih.

Hi tournament-a final round match a hai chun Zodingliana le Bipin Singh hai chu goal 2 ve ve an pet lut a; Redeem Tlang, Angousana, Lalrammuana, Nim Dorjee Tamang le Ruper Nongrum hai chu goal khat seng an pet lut.

Sesa Football Academy hai chun AIFF Navi Mumbai Academy chu 3-1 a hnein, point 9 an hmu a, a point hmu insangtak pathum-na an nih. East Bengal-in point 10 hmuin a a pahnina an nih.

Navi Mumbai Academy hai chun point 6 hmuin, points chart-ah a panga-na an lak. An point hi Shillong Lajong FC leh inang sienkhom Lajong haiin goal an pet lut rawn lem leiin a pali-na an kai a nih.

Hindustan hai chun an khingpui hai tukhom an hne naw leiin, points hmu ve loin points chat-a an hnuoi tak an nih.

Fans’ Player of the Year Award-a dingin Boithang Haokip

Shillong, April 29, 2014: Football Players’ Association of India (FPAI) chun Thawtanni khan Kolkata khawpui-ah a voi 6-na dingin award inhlanna an nei a, Shillong Lajong hai midfielder Boithang Haokip chu “Fans’ Player of the Year Award” inhlan a nih.

“Best Indian Player” chu Churchill Brothers hai forward Balwant Singh kuoma inhlan a ni a, Bengaluru FC coach Ashley Westwood chu “Best Coach” nina inhlan ani bawk.

Boithang chun chawimawina a dong chu a lawm hle thu hrilin, India pumpuia a fans hai le hi chawimawina dong dinga a vote-tuhai po po kuomah lawmthu a hril bok a nih.

“Hi award hi Shillong Lajong fans hai po po kuoma kan hlan a, player ṭhalema siemtu Shillong Lajong hai kuomah lawmthu ka hril a, ka ruol le pai hai le ka sunghai kuoma khom lawmthu ka hril bok a nih,” tiin a hril.

Boithang hi goal 6 pet lutin, Shillong Lajong ta dinga goal pet lut laia a pathum-na a nih.

“Best Foreign Player” a dingin Salgaocar team a ṭhang Darryl Duffy chu thlang a ni a, Duffy le Suniel Chhetri hai chun I-League-ah goal 14 an pet lut ve ve a nih.

Dempo midfielder Alwyn George chu a voi hnina dingin “Young Player Award” inhlan a nih.

FPAI chun Olympian PK Banerjee kuomah “Lifetime Achievement Award” chawimawina an hlan a, Mohun Bagan forward-a ṭhang hlak Jose Ramirez Barreto chu Indian football ta dinga hun sawt taka lo inhmangna leiin “Special Award” inhlan ani bawk.

Sakordai-ah pa pakhat ramvak inkap hlum

Sakordai, April 30, 2014: Zani chawhnung dar 5 vel khan Hmarramchhana (k. 25) Sakordai khaw suok chu a ruopa le ramvaka suok chu Sakordai le Vaitin ramri bul, Vaitin ram sunga Luak vadung bulah a silai chawiin ama le ama an kap pal niin ei thu lakna chun a hril a, Hmarramchhana hi a hmun-ah a boral nghal a nih.

Zani chawhnung tieng khan Hmarramchhana le a ruolpa chu silai leh sa an pela, a ruolpa chu fe hmasain tlang sak tieng a ui leh an fe tunga, chawhnung dar 5 vel khan a ruolpa chun thlang tieng silai puok ri thawm a hriet chun a kir thla nawk a, Hmarramchhana chu a thi sain a hmu niin ei thu lakna chun a hril. Hmarramchhana phing lai taka hin silai mu lutna ser a um niin ei thu dongna chun a hril.

Mobile phone hmangin an khuo tieng an chanchin bu an hriettir nghal a, Luak vadung kam hi Sakordai anthoka km 3 vela hla kea lawn ngai a nih.

Mamit-ah Bru raltlanhai lak kir dan ding hriltlang

Aizawl, April 29, 2014: Mamit District Level Core Committee, tlawmngai pawl le political party hrang hrang aiawtuhai chu DC Conference Hall-ah an ṭhungkhawm a, Tripura transit camp 6-a um mek Mizoram Bru hai Mizoram-a lak kir dan ding chungchang an rel. Meeting hi Mamit DC K. Lalthawmmawia keihruoina hnuoia nei a nih.

Meeting-a an rel danin, Mizoram Bru hai lak kirna ding sum ruoman sa, Rs. 787 lakhs hmangin sungkuo 669 lak kir phot tum a ni a, chu taka ding chun Mamit district-a Assembly biel 3 – Mamit, Dampa le Hachhek biel-ah hieng Bru raltlanhai umna ding hmun ruoman vat tum a nih. Bru raltlan hung kir hai siena hmun ding khuo hai chu survey team-in sukfel vat hai, tiin, survey team a hin YMA aiawtuhai khom an ṭhang ve ding a nih.

Bru raltlanhai lak kir ding sungkuo 669 hai laia hin tulai hnaia an khata Mizoram-a kir sungkuo 100 vel khom tiemsa nihai sien an ti a, sorkar anthoka ṭhangpuia um thei pek dan ngaituo ning an tih.

Mamit DC chun, Mizoram-a hnam tlawm lem, ram khuo le tui indik tak hai chu ralmuong takin Mizoram-ah an um ve a poimaw thu a hril a, Bru raltlan lak kir ding hai chu an nuomna hmun indik tak amani mipui hai sie nuomna hmun amani sie thei naw chin a um thei ti hrilin, thil ṭha tak ngaituoa sorkar thil ruoman pom thiem dingin tlawmngai pawl le political party hrang hrang hai chu a ngen.

YMA-in Buhchangphai-a thiltlung a dem

Aizawl, April 29, 2014: Central YMA chun zani khan thusuok siemin, Buhchangphai-a Assam sorkar thuneituhai chet dan hi a hriet thiem naw tak zet thu le a dem tak zet thu a tarlang.

CYMA thusuok chun, “Mizoram sung-ah hi hma khom khan Assam police haiin buoina an siem zauh zauh ta hlak a, hi chungchanga boruok um dan hi CYMA chun thlir sunzom pei a ta, hi hnung-ah hieng thil hi a tlung ta nawna dingin Mizoram sorkar chun hrat takin hma la dingin CYMA chun a beisei a nih,” tiin a hril.

MNF ṭhalai hai khomin thusuok siemin, Assam miha’m RK Laldawngliana thingat an inchu pek chu poi an ti thu an tarlang a, hi thil thlung hi Congress sorkar-in ramri a ngaisak naw lei a nih, tiin an tum.

MNYF chun, “Mizoram Congress sorkar-in ramri chingfel dinga ke a pen ngam ani chun MNF ṭhalai hai chun thlop kan inhuom a, sorkar-in ramri chingfel harsa a ti ani khomin, ramri laia chenghai thlavang huol ding le ram puotieng mihai an pawngpor nawna dingin chite bek ngaiven dingin kan ngen a nih,” tiin an hril.

MSU headquarters, Kolasib khomin Assam Police le Forest mihai chet dan an dem thu an tarlanga, Mizoram sorkar-in thuneituhai le police hai a tir nghal chu lawmum an ti thu an hril bawk.

YMA hai in bawl ṭhat Assam Police ha’n an suksiet

Aizawl, April 29, 201: Buhchangphai-a YMA branch-in khawtlang hnatlang koin Assam police haiin April 27-a in a suksiet chu an bawl ṭha a. Hnatlang a ṭhang hai sun chawl bufak a an fe laiin Assam police hai chun an in bawl ṭhat chu an lo suksiet pek nawk a nih.

Hi thiltlung an hriet le inruol hin IRB police le Buhchangphai khuo-a pasal 170 hon vel hai chu Assam police hai chetna hmun hi an pan nghal a nih.

Mizoram home minister R. Lalzirliana chun voisun hin Buhchangphai sir a tum a, ama ruol hin environment & forest minister Lalrinmawia Ralte le parliamentary secretary pahnih - Lt. Col. ZS Zuala (Home) le K. Lalrinthangate hai chu fe bok an tih. Home, E&F le revenue department hotuhai chun vawiawm bok an tih.

May 1-ah Lelte Award sem ding

Aizawl, April 28, 2014: Hung tlung ding May 1 (Ningaini) zan dar 8 khin Vanapa Hall, Aizawl-ah hla tienga Mizoram-a chawimawina hlu tak Lelte Award hai chu sem ning an tih. Tu kuma Lelte Award pek suokna hi voi 23-na a nih. Award hi category 32 a um a, gospel le lengzem a ṭhe an nih.

Lelte Award voi 23-na hi AIR Aizawl FM Zoawi-a RJ pahnih Sangtei Chhakchhuak le Micky Chhangte haiin host an ta, khuollien-in Mizoram health minister Lal Thanzara hmang ning a tih. Award semnaa ṭhang dingin Lalthawmlien Neitham (Chairman, Barak Valley Hill Tribes Council, Hmarkhawlien) le Lalawmpuia Ngaite (Sr. Manager, Hindustan Petroleum Corporation, Guwahati) hai chu fiel bik an nih.

Hla tieng bakah Mizo pasal laia hlasak thiem em em Jesse Lalrova chu “Lifetime Achievement Award 2014” inhlan ning a ta, nikuma khawvela tlang insang tak Mount Everest sip kai suoktu David Zohmangaiha khom “Young Achiever Award 2014” inhlan ni bok a tih.

Anni hai baka hin mi dang dang hai kuoma khom Special Award inhlan ni bok an tih.

MNF-in Rev. Chanchinmawia thi san hrilfie dingin Mizoram sorkar a phut

Henry L. Khojol Hmar

Aizawl, April 30, 2014: Mizoram-a eptu pawl Mizo National Front (MNF) chun October 1, 2007-a mi tu hriet loa that ni a ring Rev. Chanchinmawia thina san hrilfie dingin Mizoram sorkar thuneituhai a phut.

April 29-a MNF thusuokin a tarlang danin, April ni 23 khan Mizoram Pradesh Congress Committee (MPCC) chun thusuok siemin, Rev. Chanchinmawia chu Mizoram-ah MNF a sorkar lai October 1, 2007 khan Mizoram chief minister hlui Zoramthanga inthattir angin a tarlang a. Sienkhawm Rev. Chanchinmawia that ani lai khan Zoramthanga chu India hmarsak state chief minister hai inkhawmpui lien hmangin September 28 anthawka October 5, 2007 chen khan Bangkok, Thailand-ah a cham hmang, ti MNF thusuok chun a tarlang.

MPCC media press release-in a tarlang dan chun, Zoramthanga hin Rev. Chanchinmawia an thattirna’n Lalhluna le Lalmuanhlua haiin Rs. 20 lakhs an phut hnungin Rs. 5 lakhs pe-a inrem ta angin le chu thu chungchang telephone-a an indawrna chu lo record vawng niin Congress Bhavan-ah an ngaithlak niin a tarlang a. Hi thusuok hi MNF chun dawnletin, Zoramthanga hin kha hunlai khan Lalhluna le Lalmuanhlua hai hi tum an ni a ti a hriet ngainaw hrim hrim a, a la biek ngai bawk nawh, tiin tuolthattu anga Zoramthanga intumna chu thil indiklo hulhuol a nih, tiin an hril.

MNF thusuokin a tarlang peinaa chun, Zoramthanga hin hi hunlai vela Mizoram chief minister ani lai khan cell-phone ala nei naw a, a hmang ngai bawk nawh. Chief Minister-in phone-ah mi a biek reng renghai chu telephone operator duty fethleng vawnga biek an ni hlak, tiin an hril.

Pastor that dinga thupek le an thattir man Rs. 20 lakhs anthawka Rs. 5 lakhs-a innep thlak thu le phone-a an indawrna lo record vawng nia intumna chu mi pangngai ta dingin thil awi harsa le khel muhlum ana, phuokfawm mei mei a nih, tiin MNF chun an thusuok-ah an tarlang bawk a nih.

“Hieng mei meia thu belchieng dawllo thedar an nuom chun iengleia Congress sorkar hin thudik hmusuok dingin a sui nawn naw?” tiin MNF chun Mizoram sorkar chu Rev. Chanchinmawia thina san sui chieng dingin a phut bok a nih.

Chief Minister Lal Thanhawla’n kum 2008-a press conference a neina-ah, “conclusive evidence kan nei ta leiin kan sorkar hunah Rev. Chanchinmawia thina chungchang sui kan tih,” tia thu alo intiem tah chu hlen ngei dingin MNF chun CM a phut bok a nih.

HPC (D) to mei mei naw nih

CCPur, April 28, 2014: John F. Hmar, Information Secretary, Hmar Peoples Convention (Democratic) in zanita thusuok a siema chun a hnuoia thuhai hi ziek a nih.

Mizoram Armed Police le hnam phatsantu Lalhmingthang Sanate rawihai inthuruola Manipur simthlanga khuo pakhat Lungthulien-ah lutin, pawitawklo chungah kut thlakin, mipui chiai taka an siem hi a pawi takzet. Lalhmingthang Sanate le a rawi haiin hnam kalpen sukchai zawnga MAP leh inthuruola an chetna hin hnam hmelma a nih ti a sukchieng hle.

Lam indik lo hrawa hma latuhai leiin Hmar hnam le HPC(D) hi buoi ngai naw nih. Mi depde le hnam phatsantuhaiin kil le kapa hnam an zawr zawmpei ding HPC(D) chun phal ngai bawk naw nih. Eio hnamin hmadwm lien tak neia hma tieng pana ke a pen thet thet lai, mani hamṭhatna ding ringawt hnawta pawl le hnam hming indiklo taka hmangtuhai hin ropuina ram min tlun naw nihai a; hnam pawi an tawk pe ding Pathienin phal bawk naw nih.

Indikna le hnam hmangaina hlekte khawm nei lovin MAP leh inthuruola hnam an do hrawn hi, mi dawizep tawpkhawk thil thaw a ni leiin, thisen le hringna tam tak senga ei tum ram tlung dinga ei hmalakna le kalpen chai thei bawk naw nih.

Mizoram sawrkar khawm, inremna lampui hraw le zawng lova, Hmar thisen luongna ding zawnga misuol ruol (Gang Party) leh inthuruola hma a lak hi suktawp vat raw seh. Hnam phatsantu misuol ruol a khawingam sung chu Mizoram khawm him bik naw nih.

HPC(D) chun Lalhmingthang Sanate le a rawihai chu dawthei takin an lo enliem mei mek hlak sienkhawm; hnam pawi an tawk pei ding chungchanga ruok chu HPC(D) hi kuongkuoin inṭhung mei mei naw nih.

Source: Hmasawnna Thar

A ṭul chun Manipur ram sung-ah la lut pei kan tih: Mizoram HM

Henry L. Khojol Hmar

Aizawl, April 29, 2014: Mizoram home minister ni lai mek R. Lalzirliana chun a ṭul a ni phawt chun Manipur ram sungah Mizoram police hai an la lut pei ding thu chanchinbu mihai kuomah a hril.

April ni 29 a, New Secretariat Complex a chanchinthar thedartuhai a pawlna-ah tulai hnaia Manipur ram sunga Hmar unauhai chengna khuo pakhat Lungthulien-ah Mizoram Armed Police (MAP) hai an lût rûk ti Mizoram-a chanchinbu ṭhenkhatin an tarlang chu thudik a ni le ninaw chanchinbumihai zawna a sangna-ah home minister chun, “MAP hai chu an lût ngeia, a ṭul ani phawt chun helpawl (Mizoram hmelhma) umna khuo chu kan la thlawk pei ding a nih,” tiin a hril.

“A ram a cheng mipuihaiin an ditnaw zie thu press statement siemin lam hrawna hai chen an huoihawta, sienkhawm a ṭul chun kan la lut pei ding a nih,” tiin chanchinthar thedartuhai a hril bawk.

MAP ha’n Mizoram state puotienga operation an nei chu dan kal an ni am? ti indawnna a hrilfiena-ah Zoremmawia, DIG chun India ram khawlai hmuna khawm helpawl ṭhenkhatin buoina State pakhat lakah an siem chun dân ang takin ‘Hot operation’ hnuoi-ah bawzui (pursue) thei an nih ti thu a hril a. “MAP hai chu ‘hot operation’ angin Lungthulien, Manipur ah an lût a nih,” ti hrilin an thilthaw chu dân kal a ni naw thu DIG chun chanchinbumihai a hril.

April 29 chawhnung dar 1 khan New Secretariat Complex, Khatla, Aizawl-ah home minister Lalzirliana’n Press Conference koin, finance minister Lalsawta, paliamentary secretary K. Rinthanga, Zoremmawia, DIG, Zorammuana, AIG le MLA ṭhenkhatin an ṭawi awm bawk a nih.

Chief minister Lal Thanhawla chungchang hrilin, home minister chun Mizoram chief minister ngirhmun chu a derthawng hle niin a hril a. “EVM sukchingpen (rig) leia chief minister ni thei chauh a intumna le opposition party ṭhuoitu ha’n nasataka thukhela mipui lakah suk hmingsiet tuma an beina lei chun chief minister hringna chu a derthawng hle a. Hnam pa ti a hrietlâr Mahatma Gandhi le Abraham Lincoln hai anga that ve el nuom pawl um ngei an tih,” tiin chanchinbumihai a hril. Fimkhur thil thu-ah chief minister venghimtu ding security personnel khawm duong ṭhat an nih, tiin a hril bawk.

A hril peina-ah Zira chun tulai Mizoram politics chu an hnawk hle a nih, tiin a hril a. Law and Order tieng-ah harsatna siema, sinthaw hlei thei loa sorkar siem hrim hrim hi opposition party hai thiltum anga inlang chu a nih, tiin a hril bawk.

“EVM sukchingpen a intuma opposition party le miṭhenkhatin CM sukhmingsieta a lal ṭhungpha a inthawka pei tlak an tumna chu ‘police efficiency’ le dan le thupek hratna lei chun an thlawl a nih,” tiin Mizoram home minister chun a hril.

NE-a inchuklai ha’n Cambridge certificate nei thei ta ding

Aizawl, April 28, 2014: India hmarsak biela inchuklai hai chun Guwahati anthokin Cambridge International qualification an nei thei vat ta ding a nih.

Cambridge International School, Guwahati chun tu kum June thla anthok hin inchukna hmun innghat an tum a, hi taka hin ram puotienga inchuk nuom hai le admission zong hai ta dingin a ṭangkai ding bakah engineering le pre-medical test hai khom ram puotienga mi hai leh an inel thei ta ding a nih.

Hi sikul principal Pulak Bhattacharyya chun, "Cambridge International School inchuklai hai chun ram puotieng hieng UK, Ireland, USA, Canada, Australia, New Zealand, Singapore, Egypt, Jordan, South Africa, Netherlands, Germany le Spain-a university a hai lutna dingin India rama pawl 11 le 12 tlukpui "AS" le "A" level qualification an hmang hlak a, hi qualification hi ram puotienga university lutna ding le sin hmu na dinga hai khom a ṭangkai a nih," tiin a hril.

"Inchukna ṭha lem fepui ani theina dingin Cambridge International Examinations hai hi University of Cambridge hnuoia exam a ni a, Cambridge International School, Guwahati-a zirtirtuhai khom ram puotienga mithiem hai hnuoia training pek an nih," tiin Bhattacharyya chun a hril bawk.

Cambridge International School-a course inchuk thei "AS" le "A" qualification hi India rama sorkar pompui class 10 board exam pass haiin zom thei an ta; arts, science le commerce stream hai khom hong ning a tih, tiin a hril bawk.

Mualkhang-ah Pass indik lo nei 21 hmusuok

Aizawl, April 28, 2014: Sairang-Bairabi rel lampui siem dinga a paltlang ding ram endik dinga indin Mualkhang Verification Team chun Mualkhang ram sunga pass um si, ram a taka hmu ding umlo 21 an hmusuok.

Tulai hnai el khan Mualkhang Verification Team hai hin Mualkhang ram an enfie non a, zangnadomna pek ding zat endikin, report sukfel ani tah. Hi report hi revenue secretary RL Rinawma kuomah thelut ning a tih.

Verification team report-a an lang danin, Mualkhang rama hin ram pass um si, ram um lo 21 hmusuok a ni a, hieng pass 21 hai kawla zangnadomna pek dinga ruohman siem chu Rs. 1,06,29,060 a nih.

Mualkhang rama hin ringhla 10 a um leiin a hmuna Verification team-in an enfie hnungin ram pass 21 hai chu a taka umlo ani ti sukfie a nih. Hienglai zing hin a hmaa zangnadomna pek ding hai laia la ṭhanglo mi 7 hai ruok chu zangnadomna hmu thei dinga zieklut bel an ni thung.

Verification team-in ram a enfiehnaa hin ram neituhai chu an ramah lo um seng dinga inhriettir an ni a, amiruokchu Anti Corruption Bureau (ACB)-in a ringhla 10 hai laia 6 hai chu an inlang naw a nih.

Bairabi-Sairang rel lampui siem dinga hin zangnadomna phuttuhai laia indiknaw taka thilthaw an um nia hriet an leiin ACB-in an sui a, ACB chun rel lampui a suksiet dinga ram 48 hai chu ringhla an ni leiin Mualkhang ram sung bika enfie non dinga a ti kha a nih.

Mualkhang Verification Committee hai chu zani khan an chairman Jitender Yadav, Kolasib DC rawiin a office-ah an inṭhungkhawm. Verification team a hin Revenue ASO, Kolasib SDC, ACB inspector 2 le North East Frontier Railways aiawtuhai an ṭhang.

Mizoram-ah MGNREGS hnuoi-ah ni 100 inhlawna siem thei lo

Aizawl, April 28, 2014: Kum 2013-14 sung khan MGNREGS hnuoia ni 100 inhlawna Mizoram pumpui-ah pek suok hman an naw a, inhlawna siem tamna tak distric Champhai -ah ni 85 inhlawna siem hman a nih.

Ei thu lakna chun, kum 2013-14 sung hin MGNREGS hnuoi-ah Ministry of Rural Development (MoRD) chun Mizoram ta dingin ni 91 sung inhlawna a pom a, inhlawna ding sum hnuhnung tak chu March 2014 khan a pek suok chauh leiin labour budget le inmila district tina sum pek suok khom an hnu a, ni 100 inhlawna chu a pumpuia chokruolin ni 79 chauh pek suok hman a nih.

Mizoram-a district hrang hranga inhlawna siem dan chu – Champhai district-ah ni 85, Mamit district-ah ni 84, Serchhip district-ah ni 81, Aizawl district-ah ni 80, Saiha district-ah ni 79, Lunglei district-ah ni 78, Lawngtlai district-ah ni 72 le Kolasib district-ah ni 60 a nih.

Mizoram Land Revenue dan thar hrilfiena

Aizawl, April 28, 2014: Land Revenue & Settlement (LR&S) department chun, “The Mizoram (Land Revenue) Act, 2013” le “The Mizoram (Land Revenue) Rules, 2013” dan hai hrilfiena thusuok a siem.

LR&S department dan thar rule 10, sub-rule (9)-in a tarlang dan chun, ‘Periodic patta chu a thi hun a thlung hma thla ruk sung ngeia sukhring nawk dinga ngenna siema sukfel a ninaw chun chu periodic patta chu thi nghal a tih,’ ti a ni a, “Hi hun tiem sunga periodic patta sukhring hman naw hai ta dingin hun hong nawk a nih,” tiin thusuok chun a tarlang.

Hun tiem sunga periodic patta sukhring hman naw hai ta dingin April 31, 2016 chen hun hong a ni a, ngenna thelut ruol hin sukhring nawkna ding fee hai, sie bat hai le pek hnuk man (kum khat-ah 20% chawiin) hai pe-in sukhring nawk thei a nih.

IT le social media chungchang hriltlang

Aizawl, April 28, 2014: Voisun khan Mizoram chief secretary L. Tochhong inrawina hnuoi-ah CS conference hall, Aizawl-ah sorkar mi poimaw le NGO ṭhuoituhai an ṭhungkhawma, “social media” hmang fimkhur a ṭul zie mipui hrilhriet dan ding an hriltlang.

L. Tochhong chun, "Social media hmangdan hi department hrang hrang haiin hriltlang ṭha an ti leia ko a ni a, social media chungchang inhrilhrietna hun a tam thei ang tak le zau thei ang taka nei a poimaw hle," tiin a hril.

Inkhawmnaa hin, information technology, abikin social media chungchang hai, social media-in nghawng ṭha lo a nei dan hai le IT dan le dun chungchang hai hriltlang a nih. Social media hmangsuolhai IT dan hnuoia hrem theidan hai khom hriltlang a nih..

IT le social media chungchang-ah talk show, workshop, seminar le awareness campaign hai nei ṭha ti a ni a, department haiin hma an lak dan ding duon ṭha an ti bawk.

Meeting-a hin Police, Home, Information Communication & Technology, Information & Public Relations, Law & Judicial department, NIELIT le NGO palai hai an ṭhang.

YMA le MZP-in Mizoram sorkar chang dingin an phut

Aizawl, April 28, 2014: Kolasib sub-hrqs YMA chun, April 23 le 27 ni haia Assam Police le Forest mi haiin Mizoram sung Buhchangphai-a leilet enkoltuhai in 4 le leilet thlaihai an suksiet a, ni 3 sunga suok dinga an inhriettir chu Mizo hnam hmusitnaa an ngai thu an hril.

Kolasib sub-hqrs YMA chun thusuok siemin, "Rawwng taka hung khawsahai hin an thil suksiet, lakpekhai hi siamṭha pekin, a man hu tawk an chawi ngei ding a nih. Hieng anga inrikrapna le invauna hi ramri bul-ah a thlung nawk hlak leiin ramri bula hmunhma neia chenghai thlamuong taka an um theina dingin sorkar-in venghimna pe dingin kan ngen,” tiin an tarlang.

Kolasib YMA chun, Buhchangphai-a thilthlung le harsatna um mek chu Mizoram home minister kuoma intluna, May 15 chen sorkar-in a ngaisak naw chun hma an lak ding thu an rel a, “Hmalakna a umnaw chun, ramri bula Mizo umhai thlamuong dingin hma lak ni sien kan tih,” tia an rel thu an tarlang bawk.

MZP khomin Buhchangphai-a Assam police le forest mi hai chetdan chu hrietthiem intak an ti thu an hril a, Mizoram sorkar chun rawl nei vat ding an phut.

“Mizoram sunga Mizo sinthawtuhai chunga Assam police hai chetdan hi an rang thei ang taka don let a, an rang tienga an thlavang huol dingin Mizoram sorkar kan phut,” tiin thusuok an siem bawk.

MZP chun, kum 2013-a Assembly inthlang dinga MZP-in political party hrang hrang an pawlpuinaa chun party tin haiin Mizoram ramri venghim a, humhal ani theina dingin Boundary Development Cell/Wing indin an intiem vong thu an hril a, Congress sorkar chun an rang thei ang takin Boundary Development Cell/Wing indin dingin a ngen bok a nih.

Khawzawl tlangval thattu inpuong

Aizawl, April 28, 2014: Liemtah April 19 zana an chengna ina a thisaa hmu, Ronald Lalrinpuia (k. 25) s/o H. Lalbiakzuali chu a unaupa, Lalfakawma (k. 23) s/o Vulmawia chun a that ani thu police hma-ah a puong. Lalfakawma hi Champhai district jail-ah sie mek a nih.

Ronald Lalrinpuia thi thu a hin police hai chun Aizawl-a inkhela cham mek Lalfakawm chu thukhawchang indon fie dingin an kol a, chutaka chun an puong ta a nih.

Ronald Lalrinpuia nu le Lalfakawma pa hai hi nupa inṭhe ta hnung an nia, an inṭhe hnung khomin an nauhai hi inngei taka lan pawl zing hlak an nih.

Lalfakawma-in police hmaa an puongna a chun, Ronald chu damdawi leia a that niin a hril.

Odisha in Mizoram 3-0 in a hne

Dibrugarh, April 28, 2014: Chowkidinghi playground, Dibrugarh (Assam) hmuna Senior Women’s National Football Championship voi 20-na nei mek a chun Odisha le Mizoram hai chu voisun khan inkhelin, Odiha-in Mizoram tieng hai chu 3-0 in an hne.

Odisha tieng hai chun first-half minute 3 sungin goal pakhat an pet lut nghal a, minute 63 le 76-naah voi 2 pet lut nawkin hratna an chang a nih.

Mizoram nuhmei hai chun an khingpui hai an hne naw hle niin ei thu lakna chun a hril.

IIT JAM 2014-a inziek tling

New Delhi, April 29, 2014: Delhi-a HSA info & publicity secretary nina chel lai mek Lalhrietsûng Sanate @ Sûngman s/o Ramnunsiem Sanate chun Indian Institutes of Technology Joint Admission test for Masters (IIT JAM) 2014-ah subject pahni - Mathematics le Mathematical Statistics a hai an ziek tling niin ei thu lakna chun a hril.

Ama ruol hin Ruth Lalromawi Sinate d/o Lalbieklun Sinate, Sielmat khom Biological Science subject-ah an ziek tling bok a nih.

IIT JAM 2014 result hi April 14 khan puong a nih.

HNU-in MPSC exam-naa tling hai a lawmpui

Kum 2013 a MPSC exam-naa hlawtlingna chang 1. Nk. Lalṭhazam Songate, 1. Mr Derrick L. Khawbung, 3. Mr Zosanglur Joute hai le SSC 2013 exam naa hlawtlingna chang 1. Mr Johan L. Joute s/o J. Saitho Joute (SI-CISF), 2. Mr James T. Darngawn s/o D. Neithang (SI-CRPF), 3. Jasper Lalropui Khawlum s/o Lalkhawthang Khawlum (SI-BSF) le 4. Nk. Vanlalsiem Sungte d/o Lalramlien Sungte (ASICISF) hai in sin insang tak taka an hlawtlingna hi Hmar National Union (HNU) Gen. HQ chun a lawmpui bek beka. Hmatieng peia khawm hnam parṭhi hung ni pei dingin ditsakna insang tak HNU chun an hlan cheu a nih.

Sd/- Samson
Inf. Secretary,

Sd/- Lalvullien
Asst. Secretary,

Hmar National Union Gen. HQ.

Rajya Sabha member thar 12 laklut

Imphal, April 28, 2014: Voisun khan Rajya Sabha chairman Hamid Ansari-in a chamber-ah Rajya Sabha (RS) member thar ding mi 12 hai thu inkhamna a neipui a, RS thar hai lai hin Manipur anthok Md Abdul Salam chun Meitei ṭongin thukhamna a hril.

Hi thukham hunser nei hun a hin Inner Manipur Lok Sabha MP Dr. Thokchom Meinya khom a ṭhang.

UPSC interviewer hai hming pholang himlo: HC

New Delhi, April 27, 2014: Delhi High Court chun Union Public Service Commission (UPSC) selection commission member hai hming le nina pholang chu an ta dingin a him naw ding an leiin Central Information Commission (CIC) thupek chu hnawl pek.

CIC chun, RTI Act besana order a’nsuo angin UPSC interviewer hai hming, nina le umna hai chu pholang dinga a ti chu, Justice Manmohan-in candidate hlawsam haiin an hlawsam nasan chu interviewer hai an intum thei lei le phuba lak tumin interviewer hai taksa le hringna chen khom an sukhim naw ding an leiin RTI Act Section 8(1)(g) hnuoi-ah anni hai hi huomsa an nih, tiin a rel.

Assam police-in Mizoram-ah ṭu ṭhiek

Aizawl, April 27, 2014: Assam police le forest department-a thoktu hai le Bru nia hriet silai chawi hai chun zani khan Buhchangphai, Kolasib district-a Tuichhuahen zau-ah an fe a, R. Kapzuala ṭu pahni chu an ṭhiek pek niin ei thu lakna chun a hril.

R. Kapzuala hrildanin, a huon-ah oil palm hmun, dil le leilet a nei a, enkoltu ding hnam dang sungkuo pahni a ruoi a, hieng sungkuo pahni hai chengna in/ṭu hai chu Assam anthoka hung lut mi 30 bawr velin an ṭhiek pek niin a hril.

Assam police le forest department-a mihai chun April 23 chawhma dar 11 vel khan Buhchangphai-a Ramṭha zau-ah RK Laldawngliana thingat cubic 50 le kel le ar an lo inchu pek ta bok a, RK Laldawngliana i sor Sofiq Uddin chu ni thum sunga suok dingin an vau bok nia hril a nih.

Vatican-in Pope hlui pahnih mi thienghlim-in a puong

Vatican City, April 27, 2014: Roman Catholic kohran hotu lu tak Pope hlui pahnih John Paul II le John XXIII hai chu zani khan mi thienghlim a puong an lo ni tah

Pope hlui pahni mi thienghlima puongna inkhawm buotsai ding hin khawvel hmun hrang hrang anthok mi tam takin Roman Catholic hai hmunpui Vatican City an pan a, State sorkar hotuhai le palai hai khom an ṭhang bok a nih. Tuta ṭum hi a ruola Pope hlui pahnih mi thienghlima puong voikhatna a nih.

Inkhawm hi April 27 zing dar 10 anthokin St. Peter's Square-ah ṭan a ni a, hi inkhawma ṭhang tum mi tam tak chu a zan hmasa anthokin St. Peter's Square hnai thei ang takin an lo riek tawl ta a nih. Inkhawm buotsai a hin Pope anthoka bang tah, Benedict khom a ṭhang bok a nih.

Pope Francis chun Mass buotsaiin, cardinal le bishop 850 velin an pui a. Pope hlui pahnih John Paul II le John XXIII hai chu mi thienghlim-ah puongin, hi hi khawvel pumpuia an kohran ha’n inza taka pom dingin a ngen bok a nih.

John XXII hi kum 1958-1963 sung khan Roman Catholic kohran hotu lu tak a ni a, John Paul II hin 1978-2005 sung khan kum 27 vel Roman Catholic kohran hotu lu tak sin alo chel ta bok a nih.

India CJI thar Justice Lodha

New Delhi, April 27, 2014: Pathienni khan Justice Rajendra Mal Lodha (k. 64) chu Chief Justice of India 41-na dingin India President Pranab Mukherjee-in thukhamna in nei tirin a lawmlut.

CJI thar thukhamna hunser hi Darbar Hall, Rashtrapati Bhavan-a nei a ni a, hi hun a hin India vice-president Hamid Ansari, prime minister Manmohan Singh le a cabinet minister Sushilkumar Shinde, AK Antony, Kapil Sibal le M. Veerappa Moily hai khom an ṭhang.

CJI hlui Chief Justice P. Sathasivam hun chu inrinni khan a tawp leiin Justice Lodha chun an thlak a nih. Justice Lodha term hi September 27, 2014 khin a tawp ve ding an leiin thla 5 sung Supreme Court chu enkai a tih.

CJI thar Justice Lodha hi Jodhpur University anthokin Law anchuk zo a, Rajanstan High Court-ah a sin thaw ṭanin, central sorkar le Rajastan sorkar ta dingin voi iemanizat Counsel-in a ṭhang bok a nih.

Kum 1994 January 31 khan Rajasthan High Court-ah permanent judge-a namnghet niin, kum 1994 February 16 khan Bombay High Court-ah insonin, kum 13 a ṭhang hnungin Rajasthan High Court-a bok kum 2007 February 2 khan an son nawk a. Kum 2008 May 13 anthok khan Patna High Court-ah Chief Justice sin a chel a, thla 8 hnungin Supreme Court-a hlangkai a nih.

Darlawn khuo bul lai bus chesuol, pakhat thi

Aizawl, April 27, 2014: Voisun sun dar 12 vel khan Darlawn anthoka Sawleng khuo pan Bus chu Darlawn khaw bul lai a chesuol leiin lampui thlang feet 100 vel-ah a tlan liem a, a hmuna hin bus a chuong ve Darlawn khaw mi a thi nghal a, hliem khom iemanizat an um.

Ei thu lakna chun, bus hi Darlawn anthoka Sawleng khuo pan a ni a, Sawleng-a Presbyterian kohran biel inkhawmpuia hla sak ding hlapawl phur a ni a, bus a hin mi 12 an chuong a nih. Bus chesuolna a hin Lalkhawngaiha (50) h/o Lalrinawmi, Darlawn Chhimveng chu a hmun-ah a thi nghal a nih.

Bus chesuolna a hin hliem khom iemanizat an um a, hliemhai chu Darlawn damdawi-in panpui nghal an nih. Bus driver le conductor hai bakah bus a chuong ve mi 4 hai chu an na zuol deu leiin Aizawl tieng panpui an nih.

India president Manipur-ah

Imphal, April 27, 2014: India president Pranab Mukherjee-in April 29-a Manipur a sir ding le inzomin Imphal khawpui a fe le hung hai chu dap an ni a, venghimna khauh tak hnuoia sie a nih. Manipur governor VK Duggal khomin president sir ding Manipur University hmun a hai fe-in enfelna sin a nei bok a nih.

India president chu April 29 khin Manipur University (MU) Convocation voi 14-naa khuollien-a ṭhang dinga fe ding a nih. President ani hnunga Pranab Mukherjee-in Manipur a sir hmasatakna ding a nih. MU Convocation hi Capitol Complex anthoka km 5 vela hla MU innghatna hmuna nei ning a tih.

Manipur governor VK Duggal le MU chancellor Prof. Dilip M. Nachane hai khom hi convocation a hin ṭhang an ta, India president chu khuollien-in a ̕ṭhang ding a nih.

India president-in Manipur a hung sir ding le inzom hin Manipur-a Meitei helpawl 6 hai chun April 29 zing dar 6 anthoka darkar 12 aw ding general strike an ko bok a nih.

MU convocation nei hun a hin India-a parliamentarian laia upa tak le ṭum thum lai Manipur CM lo ni tah Rishang Keishing chu mipui ta dinga kum sawt tak rong a bawlna leiin chawimawna’n Doctor of Law inhlan ning a ta, ama le inruol hin folk musicologist Laishram Birendrakumar khom Doctor of Literature inhlan ni bok a tih. Hieng chawimawina hai hi India president-in inhlan a tih.

DSA CCpur in hratna chang

CCPur, April 27, 2014: DSA Churachandpur chun DSA Sadar Hills chu final-ah 3-1 a hnein 1st Hill District Premier League 2014 championship trophy chu an lo vawr tah.

Hill District Premier League hi Manipur-a Hill District Sports Association (HDSA) huoihotna hnuoia nei a ni a, final hi liemtah inrinni April 26 khan Churachandpur public ground-ah inkhel a nih.

Final inkhelna a hin DSA Sadar Hills hai chun goal thun hmasa'n Janggoulian-in inkhel ṭan minute 36-na'n goal a pet lut a, second-half ah DSA Churachandpur chun beipui thlakin Lalzarzo-in minute 60-naah goal a pet lut a, minute 6 hnungin a team chanpui Honsenpao khomin goal a pet lut nawk nghal a nih. Lalzarzo hin inkhel minute 70-naah goal voikhat pet lut nawkin DSA Churachandpur chun tu kuma 1st Hill District Premier League hratna alo chang ta a nih.

Inkhel nei zo hin lawmman inhlanna nei nghal a ni a, DSA Churachachandpur chu trophy bakah Rs. 1 lakh inhlan a ni a, runners’ up team DSA Sadar Hills chu trophy le Rs. 50,000 inhlan an ni bawk.

HSA Education Campaign, Jinam Valley 2014

CCPur, April 27, 2014: HSA General Headquarters hmalakna hnuoi-ah May 1-6, 2014 sung hin Jinam Valley, NC Hills-ah Education Campaign nei dinga riruong a nih. Hi taka Resource Persons ding hai chu:

1. Dr. John Pulamte, President, Hmar Inpui Gen. Hqrs., Chairman HSEB, HSA GHQ
2. Lalringum Riengsete, Deputy Secretary, Assembly Secretariat, HSA GHQ
3. Josef V Tuolor, Secretary Education, HSA. GHQ, Secretary HSEB, HSA, GHQ
4. Lalramhnem Buongpui, HSA NC Hills & KA JHQ

A hnuoia hun le hmun tarlanga um ang hin education campaign hi nei tum a nih:

May 01 (Thursday): Tuolpui & P Hmarlusei
May 02 (Friday): N Hmarlusei & Leiri
May 03 (Saturday): Phaipui & Tattephai
May 04 (Sunday): Ramvawm & Mauchar
May 05 (Monday): Muollien & Boro Arkap
May 06 (Tuesday): Jinam Ghat Hnachangzawl

Topics ding hai:
1. Inchukna kawng a Nu-le-Pa mawphurna
2. Inchuklai hai mawphurna
3. School le khawtlang mawphurna
4. Course dang dang hai le Competitive Exam dang dang hai

India president-in Padma award an hlan

New Delhi, April 26, 2014: Voisun khan India president Pranab Mukherjee-in Rashtrapati Bhavan-ah Padma award dong dinga puong laia lan hlan lo mi 56 hai kuomah Padma chawimawina an hlan.

Kum bul India Republic Day hma khan kum 2014-a Padma award dong ding hming mi 127 puong a ni a, March 31 khan mi 66 hai kuomah inhlan ni ta'n, tuta ṭum hin mi 56 hai kuomah inhlan nawk a nih.

Tuta ṭum hin President-in Padma Vibhushan 1, Padma Bhushan 11 le Padma Shri 44 chawimawina an hlan a nih.

University hai curriculum siemṭhat a ngai: UPSC chairman

Itanagar, April 26, 2014: Voisun khan Union Public Service Commission (UPSC) chairman DP Agrawal chun Arunachal Pradesh khawpui Itanagar-ah intellectual, educationist le senior citizen hai inhmupuiin, India rama university hai curriculum chu upgrade an ṭul zie a hril.

UPSC chairman chun, India-a university tamlem hai curriculum chu kum 10 neka tam ennon an ni ta naw a, hun inher pei dan izirin curriculum hai khom thlak a ngai ta thu hrilin, education system hai siemṭha a inchuklai hai chu mani a fak an zong thei dan ding inchuktir a poimaw thu a hril bawk.

IIFA 2014-ah ‘Bhaag Milkha Bhaag’ a hlawtling hle

Florida, April 26, 2014: Film siemtu Rakesh Om Prakash Mehra a film siem “Bhaag Milkha Bhaag” chu Florida khawpui, USA-a International Indian Film Academy (IIFA) Awards 2014 neinaa chun a hlawtling hle a, technical award 9 zet inhlan a nih.

Award a dong hai hi – best cinematography” (Binod Pradhan), best screenplay (Prasoon Joshi), best dialogue (Prasoon Joshi), best editing (P.S. Bharti), best sound design (Nakul Kamte), best sound mixing (Pranav Shukla), best background score (Shankar–Ehsaan–Loy), best costume designing (Dolly Ahluwalia) le best make–up (Vikram Gaikwad) an nih.

Mizoram-in medical college nei vat ta ding

Aizawl, April 26, 2014 (IANS): Mizoram health department-a thuneitu chun thuthar lawkhawmtuhai inhmupuiin, hun sawtnawte hnungin Mizoram-ah mi 100 inchuk theina ding medical college indin vat ani ding thu a hril.

“Mizoram-a medical college hmasatak ding indin theina dingin Mizoram sorkar le Union Health Ministry hai chun hmasak khan thuthlung an ziek,” tiin thuneitu chun a hril a. Hi project dungzuiin, medical college bawlna le indin na dingin Rs. 45 crore ruohman a siem ani thu le Aizawl Civil Hospital khom upgrade ani ding thu a hril bawk.

Aizawl khawpui puotieng deu Zemabawk lai cancer natnaa na hai enkolna ding care centre khom indin ani ding thu a hril bawk.

Tu tak hin India hmasak State a hai hin medical college 10 a um a – Assam-ah 5, Tripura le Manipur-ah 2 ve ve, Meghalaya-ah postgraduate medical institute a um bok a nih.

India sorkar le NSCN (KK) inkapchawl potsei

Dimapur, April 26, 2014: Liemtah zirtawpni April 18 khan India sorkar le NSCN-Khole/Kitovi (NSCN-KK) palai hai chu inhmuin an inkapchawl chu potsei nawk dingin an inrem.

India sorkar le NSCN-KK hai inbieknaa hin India sorkar tieng Ministry of Home Affairs (MHA)-a joint secretary Shambhu Singh-in a keihruoia, NSCN-KK tieng Ceasefire Supervisory Board supervisor C. Singson-in a keihruoi ve thung.

India sorkar le NSCN-KK inkapchawl chu May 27 khin a tawp ta ding a nih. Hienglai zing hin Khaplang a pawl NSCN-K le India sorkar inkawpchawl khom hi ni vek hin a tawp ve ding a nih.

MHA joint secretary Shambhu Singh chun India sorkar le NSCN-IM hai thuthlung ziek dungzuiin NSCN-IM le inbiekna nei sung chu Naga helpawl dang hai leh formal taka inbiekna nei an thei naw thu a hril.

“Khehpuam” thubuoi le inzoma man Rozara chu Hospital-a sie lut

width="100"

Aizawl, April 26, 2014: “Khehpuam” tia hrietlar Pseudoephedrine damdawi tam tham tak man thu le inzoma Mizoram police haiin April 20-a an man, MPCC spokesperson le media department-a secretary hlui Lalrozara chu damdawi in-ah sie lut a nih.

Ei thu lakna-in a tarlang danin, Lalrozara hi a zun thlum an sang zuol leiin April 24 khan Central Jail doctor-in damdawi ina enkol dingin a thon a. Aizawl Civil Hospital-ah khum ruok a umnaw leiin Kulikawn-a Alpha Hospital-a private cabin-ah sie lut niin enkol mek a nih.

MPCC media department-a member VZ Kaia hrildanin, Lalrozara hi bail suok tum a ni a, amiruokchu, bail-a suok a nuom naw thu le roreltu hma-ah ngira indiknawna a nei naw leiin thiem a chang ding niin a hril.

Kar liemtaa Mizoram police haiin Pseudoephedrine damdawi Rs. 150 lakh man hu vel an man sui pei naa chun Mizoram police hai chun damdawi ṭhenkhat hai hi Modi Life Care Industries Ltd., Gujarat Industries Development Corporation, Ahmedabad anthoka vuongna’n Aizawl- phur lut ani thu an hril a. Pseudeoephedrine neitu nia intum Lalremsangi Fanai chun thu indon fietuhai kuomah hieng damdawi hai hi a ta ani thu a puong ta niin police hai chun an hril.

Mizoram police hai chun hi thubuoi hi suizom peiin an damdawi man lekha ṭhenkhat hai anthoka an lang danin damdawi ṭhenkhat hai hi Ahmedabad anthoka thon suok an ni thu an hril bawk.

Chawngte-ah Chakma In 4 raw

Aizawl, April 26, 2014: Kar liemtah ningani April 24 khan Chawngte vadung hnar laia cheng Chakma In pali (4) hai chu raw pek an nih.

Ei thu lakna chun, Chawngte (P) ram tienga vadung hnar, Vanteikhawr bul vela Chakma In nei hai chu suok dinga ti an ni a, ṭum hni lai vau an ni hnung khomin an suok dok nuom naw leiin an In hai chu hieng laia pawl ṭhenkhat haiin an raw pek nia hril a nih.

Hienglaia cheng Chakma hai hin Chawngte vadunga laia thing le ruo, vadunga cheng hai tichereuin fak zongna an hmang hlak a, hi hi YMA tieng hai chun an ngaimaw hle nia hriet a nih.

Mizoram-a gas le thautui documentary

Aizawl, April 26, 2014: Mizoram-in gas le thautui a nei tam anga mipuihai kuoma hril hlak chungchang-ah thu chieng lem puongsuokna nei tum a ni a, duonlawk angin hung tlung ding May 3 khin Chanmari YMA Hall, Aizawl-ah Mizoram-a gas le thautui chungchang documentary tlangzarna nei ning a ta, hriltlangna hun hai khom nei ni bok a tih.

HSA Saiphai unit meeting

Saiphai, April 27, 2014: Voisun dar 1 hin Hmar Students' Association, Saiphai Unit chun committee nei an tih.

Hi hun a hin Hmar Martyrs' Day hun a hla inruolsiekna ding thlangna, Mizoram Board of School Education (MBSE) huoihotna hnuoia HSA member Class-X pass hai lawmpui dan ding le HSA 75th Platinum Jubilee Celebration hmang dan ding hai hriltlang an tih.

Lungthulien khuo-a operation thaw hrilfiena

CCPur, April 27, 2014: Hmar Peoples Convention (Democratic) president pawl-a action commander Solomon chun hrilfiena siemin, liemtah April 22 zing tienga Lungthulien khawsunga lut a operation thawtuhai chu HPC(D) founder president Lalhmingthang Sanate keihruoi pawl an ni thu a hril.

Thusuok chun, “Hi khawsunga HPC(D) duplicate party haiin ralthuom sieṭhatna le inbikrukna hmuna an hmang leia HPC(D) lu dik tak hai operation va thaw a nih,” tiin a hril.

Lungthulien khawsung anthok thil, sum, thuomhnaw iengkhom lak le suksiet an nei naw thu hrilin, “Ram le hnam ṭhatna dinga party-in hma kan laknaa a dodaltu an um ani chun hnam sipai ha’n inthiel fai pei kan tih,” tiin thusuok chun a tarlang bawk.

May 16-ah Manipur MP inthlangna tiem ding

Imphal, April 26, 2014: Manipur joint chief electoral officer N. Praveen chun thusuok siemin, May 16 khin tukuma Manipur Lok Sabha MP inthlangna biel pahni – Inner le Outer Manipur-a vote tla hai tiemna chu counting centre 12-ah nei ning a tih, tiin a hril.

Indian Constitution hnuoia tribal hai chanvo hrilfiena bu tlangzar

Imphal, April 26, 2014: Voisun khan The Hao Research Initiative (THRI) hmalakna’n Manipur Press Club, Imphal-ah Indian Constitution hnuoia tribal hai chanvo hrilfiena lekhabu thar “Article 371-C of the Indian Constitution” ti chu insuo a ni a, hi lekhabu hi Sword Vashum (IAS retd.) in a tlangzar.

Tlangzarna hun a hin Sword Vashum chun thuhrilna hun neiin, Indian Constitution-a Article 371-C chun India-a tribal hai hmakhuo ngaituo lei le an ngirhmun domsangna dinga dan-in chanvo a pek thu a hril a. Kum 1972-a Manipur-in India sorkar hnuoia statehood a hmu le inruolin hi dan hi hmang ṭan nghal niiin Manipur-a khom Hill Area Council (HAC) indin nisienkhom tu chen hin a function ṭhat naw thu a hril bawk.

Article 371-C hnuoia hin tribal hai ta dinga dan-in chanvo tam tak a pek hai chu mipui hriet thiem theina dingin tiin hi lekhabu hi buotsai ani thu a hril bawk.

Lekhabu tlangzarnaa hin scholar, social activist and researcher iemanizat an ṭhang.

India president Manipur sir ding

Imphal, April 16, 2014: Hung tlung ding April 29 khin President of India Pranab Mukherjee chun Manipur University (MU) convocation 14-na neina-ah ṭhang dingin Imphal-ah inzin a tih. MU convocation hi MU Centenary Hall-ah nei ning a tih.

India president-in Manipur a sir ding le inzom hin Imphal le sevel chu venghimna khauh taka siem mek a nih.

Maoist Communist Party, Manipur khomin April 29 anthok khin darkar 12 aw ding general strike a ko a, Public Distribution System (PDS) thil chi dang dang hai chu a hmutu ding haiin an hmu hmaa inruhmangtu hai chu man an ninaw chun President hung ding chu an lo boycott ding thu an hril bawk.

MAP hai nungrawngna VUTB-in a dem hle

CCPur, April 26, 2014: Village Authority Union Tipaimukh Block (VAUTB) chun voisun khan thusuok siemin, voihni pai zet Parbung Police Station huom sung Tipaimukh sub-division, Churachandpur, Manipur-ah dan indiknaw takin Mizoram Armed Police (MAP) hai chun nunrawng taka che chu a dem hle thu an tarlang.

VUTB chun, “Vel hmasak khan Parvachawm khaw sung-ah dan indiknaw takin an hung che tla taa. Parvachawm Lal Shri Salsawm Sithlou a In kotkhar suksiein an lut chila, u-le-nau thlabar takin an siem el chauh ni loin, khawsung mihai chungah kut chen an thlak a, bu-le-bal hai an thedar pek el chauh ni loin kotkhar ṭhenkhat khom an suksiet sa bawk,” tiin an hril.

A vawihnina chu April 22 zan dar 3 vel khan MAP sipai hai chu Lungthulien khuo-ah lutin, Village Authority chairman Mr Ralkapṭhuom a In hlu chilin, in sungah mi tukhom an umnaw lai tak ani leiin kotkhar Tala-a an kal chu an vuok siet pek a, in sunga thildang dang an suksiet el bakah Thingrem khom vawsiein a sunga um Kohran sum Rs. 3,555/- an lak bawk, niin VUTB thusuok chu a tarlang.

Lungthulien khaw sunga cheng Mr. Lalpiengruol a chung khom nasatakin MAP hai hin kut an thlak niin an hril a, a motor-in Mizoram chen an ṭhuoi a, voisun ni chen hin Mr. Lalpiengruol hi damdawi-a la enkol niin VUTB thusuok chu a tarlang bawk.

“Hieng anga Mizoram State Government, Manipur State sunga nun an hung rawng zing hi Village Authority Union Tipaimukh Block hai chun nasa takin thiemnaw an inching, an rang thei anga State Government-in hma la vat dingin ngenna kan hung siem,” tiin Manipur sorkar kuomah ngenna an siem nghal.

Aizawl-ah EduFest buotsai

Aizawl, April 25, 2014: Lynchpin le Zalen chanchinbu ṭhangkop chun zani anthok khan Aijal Club-ah EduFest voi 12-na an buotsai a. EduFest hi mi iemanizat an fe a, voisun chawhma dar 10-ah sunzom ni nawk a ta, chawhnung dar 50ah khar ning a tih.

EduFest- a hin India ram khawpui hrang hranga medical, engineering, management, designing, fashion, air hostess training, bio-technology le course dang nei institution hai an inlang a, a dithai chun India ram le ram puotienga inchukna hmun a hai admission thaw nghal thei a nih.

HSLC 2014-ah 67.51% an pass

Aizawl, April 25, 2014: Mizoram Board of School Education (MBSE) chun zani khan High School Leaving Certificate (HSLC) Examination, 2014 result a suksuok a, in exam mi 18,469 hai lai 12,468 an pass. Pass percentage chu 67.51 a ni a, kum 2013 pass percentage 58.63% nekin a ṭha lem a nih. Lalremruati Sailo, St. Paul's HSS le Malsawmzuala Royte, St. Peter's HSS hai chu a pumpuia pakhatna an nih.

HSLC 2014-a pass hai hi regular student 10,917 le private-a in exam mi 687 an ni a; pasal 6,164 (68.64%) le nuhmei 6,304 (66.43%) an pass a nih. Distinction-ah mi 429 an pass a, first division-ah 1,955, second division-ah 3,569 le third division-ah 6,515 an pass. Candidate fail zat chu 5,614 an ni a, compartmental chance nei inchuklai 387 an um bawk.

Sikul fee biṭhat leiin MSU lawm

Aizawl, April 25, 2014: Mizo Students Union (MSU) chun thusuok siemin, an ngenna angin Mizoram School Education department-in deficit, adhoc aided le private higher secondary school (Class XI) haiin fee an lak thei zat a biṭhak chu lawmum an ti thu an tarlang.

MSU chun, high school le elementary a khom session thar anthokin danin a phur anga fee lak thei zat siem hman ngei dingin Education department an ngen a, School Education hnuoia Task Force-in sorkar sikul fee a ennon chu an rang thei anga hmang ding an ngen bawk.

MZP le MSU-in lawmthu an hril

Aizawl, April 26, 2014: Mizo Zirlai Pawl (MZP) le Mizo Student’s Union (MSU) hai chun thusuok siemin MBSE-in HSLC Exam 2014 result a suksuok ta chu lawmum an ti thu le result suksuokna dinga sinthawtuhai thokrimna chu an inpak thu an tarlang.

MZP chun, HSLC 2014-ah Mizo ngeiin pakhatna ngirhumn a lak thu-ah lawmum an ti thu le an suong hle thu an hril a, Top-10 a inlang phak mi 19 lai Mizo 17 an inlang chu an lawmpui thu an tarlang a, hlawtling hai a lawmpui le a ditsakna an hlan ruolin hlawtling lo hai khom an tuorpui ziet an hril bawk.

MSU chun, tukuma HSLC pass percentage 67.51% a ni a, kum 2013 nekin 8.88%-in an sang lem chu duthusam ninaw sienkhom lawmum an ti thu an hril a, “Tulai Mizo ṭhalai ha’n social networking themin hun an khawral nasa a, hi lei hin inchukna tieng khom an tlahnuoi pha niin kan ngai,” tiin an hril a, inchuklai hai chu social network hai hmang dan hun tawk thiem dingin an chak bok a nih.

Mizoram HSLC result

Aizawl, April 25, 2014: Mizoram Board of School Education (MBSE) chun voisun chawhma dar 10:30 vel hin HSLC Examination 2014 result suksuok a tih.

Result hai hi Chaltlang-a MBSE office-a le MBSE website www.mbse.edu.in ah en thei ning a tih.

HSA GHQ in an lawmpui

CCPur, April 23, 2014: MPSC huoihawtna hnuoia Combined Manipur Civil Services Exam, 2013 a hlawtlingna chang Nk. Lalṭhazam, Derick L. Khawbung le Zosanglur Joute hai chu an lawmpui thu HSA GHQ in an puong.

Source: Hmasawnna Thar

Lungthulien-ah MAP hai an va lut

CCPur, April 23, 2014: Zani hmasa (April 23, 2014) zan sawt hnung khan Mizoram Armed Police (MAP) hai chu Lungthulien, Manipur khuoah an va lut a, mi ṭhenkhat an vuok hliem niin ei thu dawngna chun a hril.

Iengleia Lungthuliena hung lut am an ni a, ti le iengleia mi an vuok hliem am ti ruok chu hrietna ei nei hri nawh.

Source: Hmasawnna Thar

95th Zogal Day an hmang

CCPur, April 23, 2014: Zani zan dar 6:00 a inthawk khan Zou Sung Siamphatna Saipawl hai huoihawtnain Zoveng, Zenhang Lamka-ah 95th Anniversary of Zogal Day (1917-1919) an hmang. Hi huna hin Hnam lam inentirna le Zogal huna lo thi ta le ṭhuoitu hlui hai sunna hun an hmang.

Mr Thangchinmang chun, Zogal Day hi Khongjom Day le an danglamna a um nawh. Kum 1970s lai khan British han Burma ram fethlenga Manipur do dinga an hung lut laiin ChinKuki-Zomi group han an biel chitah British hai an lo doin Manipur ram an lo hum a nih tiin a hril. Zou hai chun a bikin Singngat Sub-Division sunga Mawngken, Buksau le Tonjang haiah British hai nasa takin an lo do a nih tiin a hril.

Source: Hmasawnna Thar

Imphal-ah passport office

Imphal, April 23, 2014: Manipur sorkar chun election model code of conduct a tawp le inruolin Imphal-ah passport office hong dingin an puocha mek.

Ministry of External Affairs (MEA) chun Imphal-ah regional passport office hong phalna a pek hnungin Manipur sorkar chun Assembly complex-ah passport office hong dingin a rel a, office room ding hai chu siem ṭhat mek ani thu sorkar thuneituhai chun an hril.

Hi passport office a hin MPS officer pahni Assistant Passport Officer anga sie ning an ta, an sin an zom hma’n MEA-ah training dinga tir ning an tih, tiin thuneituhai chun an hril bawk.

Police-in Spa dawr run, man hai lai NE nuhmei 2 ṭhang

Gurgaon, April 23, 2014: Gurgaon-a police hai chun Spa & Massage parlour pakhat chu inzorna hmun nia an hriet leiin an run a, hi hmun thok mi 5 an man.

Haryana sunga dan bawsie a inzorhai dona dingin police hai chun hi parlour a hin “sting operation” an nei a, hi hmuna thok mi 5 an man a, nuhmei pahni hai chu Manipur le Nagaland suok nia hril a nih.

Inspector Lakhpat Singh hrildan chu “Hi spa dawr hi inzorna hmuna hmang hlak ani thu information kan dong a, chu dungzui chun police hai chu a dawrtu anga fein ‘sting operation’ an thaw a, chu le inzom chun inhnamhnoi nia hriet hai hi man an nih,” tiin a hril. Medical check-up in nei tir an ni hnungin jail-ah thun an nih, tiin a hril bawk.

Hieng mana umhai hi Immoral Traffic Act dan hnuoi-ah Gurgaon-a Sector 29 police station-ah thubuoi siem pek an ni a, thuchieng lem sui mek nih. Spa dawr neitu Delhi-a um nia hriet chu man tumin police hai chun an zong mek bok a nih.

Tripura-a Bru raltlan ha’n political party an indin

Agartala, April 23, 2014: Kum 16 raltlana an um hnungin Mizoram anthoka North Tripura-a raltlan Bru hnam hai chun political party thar Mizoram Peoples’ Democratic Front (MPDF) ti chu Naisinghpara relief camp-ah an indin a, president-ah A. Zomdarai le secretary-ah Dorenjoy Msha hai chu an thlang nghal. Anni hai baka hin MPDF a hin ad-hoc officer bearer pariet an um bok a nih.

Naisinghpara camp-a Mizoram Bru Displaced Peoples Forum (MBDPF) general secretary C. Lalmawia chun, MPDF hi Mizoram political party pakhat ve ning a ta, party thu fepui dan chu Tripura-a CPI(M) opna hnuoia left-front sorkar thu fepui dan communist party inawn ning a tih, tiin thusuok a chun a tarlang.

Mizoram Bru raltlanhai lak kir an ni hma le an ni hnung khomin MPDF chun an thiltum sukpuitlingna dingin nasatakin Mizoram-ah campaign nei an tum thu hrilin, Mizoram-a MLA le MP inthlangna nei ani nawk huna Community Party hmingin candidate inngirtir ning a tih, tiin thusuok chun a tarlang bawk.

Tripura-a Bru raltlan 37,000 vel nia hril hai hi kum 1997-98 a Bru le Mizo inkara buoina suok leia Mamit, Kolasib le Lunglei district haia inthoka raltlan an nih.

TV-a tournament tawi en hlaw tak – World T20

New Delhi, April 23, 2014: Tukuma ICC World Twenty20 inkhelna chu TV-a international T20 tournament en hlaw tak a la nih.

Research agency TAM hai sutdan chun, tukuma T20 World Cup inkhelna chu India ram pumpui-ah mihring 13.31 crore-in an en niin an sut. Kum 2012-a T20 inkhel entu le tekhi chun tukum hin 23% in a entu an pung a, kum 2010 nekin 57% in an tamlem bok nia sut a nih.

Internet fethlenga starsports.com website-a video streaming lo entu khom mi 2.24 crore an tling bok a nih. Hi tournament final inkhelna India le Sri-Lanka hai inhnel khom mi 19.3 lakh velin an en nia sut ani bawk.

Voisun Lok Sabha inthlang trum 6-na

New Delhi, April 24, 2014: Voisun hin India rama Lok Sabha MP inthlang a trum 6-na chu State 12-ah nei ning a ta, MP ṭhungna 117 hai chu candidate mi 2,087-in an inchu ding a nih.

Inthlang neina ding State le seat zat hai chu Tamil Nadu-ah 39, Maharashtra-ah 19, Uttar Pradesh-ah 12, Madhya Pradesh-ah 10, Bihar le chhatisgarh-ah 17 ve ve, Assam le West Bengal-ah 6 ve ve, Rajasthan-ah 5, Jharkhand-ah 4, Puducherry le Jammu & Kashmir-ah 1 ve ve a nih.

MAL Book of the Year 2013 lawmman inhlan

Aizawl, April 23, 2014: Mizo Academy of Letters (MAL) chun zani khan Synod Conference Centre-a Pi Zaii Hall-ah MAL Golden Jubilee an lawm a, Book of the Year 2013 a dinga an thlang “Thinglubul” ti lekhabu ziektu Lalpekkima kuomah lawmman an inhlan bawk.

MAL jubilee lawmna le Book of the Year lawmman inhlanna inkhawm hi MAL president Lalthangfala Sailo-in a keihruoia, Planning Board vice-chairman H. Liansailova chu khuollien a hmang a nih.

H. Liansailova chun, MAL chu pawl inzaumtak ani thu le an sinthawhai chu a ropui a ti thu a hril a, "Sorkar anthokin inphut ang chawimawina hmu naw inlakhom, India ram sung chauh niloin, ram puotieng chenin MAL rongbawlna hin sin ṭangkai tak a thaw a. Chanchinṭha eng anthokin Zofa haiin thu ei ziek leiin a hlu bik a, ei literature hin chatuon nunna a hol a, a hlu bik a nih,” tiin a hril.

H. Liansailova hin Book of the Year 2013 “Thinglubul” ti lekhabu ziektu Lalpekkima kuomah MAL hmingin chawimawina thuchei le Rs. 5,000 an hlan a, ṭhuoitu hlunhai chawimawina hun hmang ani bakah MAL jubilee puola MAL lekhabu buotsai “'Sûtpui” ti chu tlangzar ani bawk.

MAL chun kum 2013 sung khan ṭong dang anthoka inlet nilo Mizo kutsuok lieu lieu lekhabu 161 a suok niin a hriet a, chuonghai anthok chun kum 2013 sunga lekhabu ṭha tak an thlang suok a nih.

Lok Sabha inthlang zo-ah Indo-Bangla rel project ṭan ding

Agartala, April 23, 2014: Northeast Frontier Railway (NFR) chun India le Bangladesh inkara rel lampui siem ding chungchang-ah Lok Sabha inthlangna nei zo hnung-ah Tripura sorkar chu mimal ram lak dan ding thu-ah hma la dinga nor a tum thu NFR thuneituhai chun an hril.

NFR general manager (Construction) RK Singh chun, Tripura-a rel project fepui mek hai sinthawna a endik a, India le Bangladesh inkara rel lampui km 15-a sei siemna ding khom a endik nghal.

RK Singh chun Tripura-a NFR official hai kuoma chu mimal ram lakpek dan ding chungchang-ah State sorkar be rawn zing dingin a hril bawk.

RK Singh-in rel project a endiknaa hin Agartala train station le Nishchantpur inkara rel lampui siem mek a chun sinthaw indik tawklo a hmu suok a, track innghatna ding level indiknaw hai chu pil hmanga hnawbit dingin an hriettir nghal bok a nih.

Inno-Bangladesh rel lampui siem ding hi India ram tieng km 5 a ni a, a bak km 10 chu Bangladesh ram tieng ning a tih. Rel lampui siemna dinga mimal ram lakpek chungchanga buoipui ngai hai chu nikum December khan Bangladesh chun an sukfel tah tiin NFR thuneitu chun a hril bawk.

Police-in CMJ University Chancellor an man

Aizawl, April 23, 2014: Doctorate degree tehlem pek dok chungchanga Meghalaya police haiin iemichen anthok an zong tah, Meghalaya-a CMJ University chancellor Chandra Mohan Jha chu April 22 khan Bihar-ah man a nih.

CM Jha hi tukuma Lok Sabha inthlang nei mek a hin Bihar-a Jhanjharpur biel anthok independent-in a ngir ve a, April 22 khan Madhubani district, Maholi khuo-a a campaign laiin Meghalaya police special team hai chun an man niin Bihar Addl. DGP R. Kumar chun a hril.

Jha hin kum 2009 khan Shillong khawpui-ah CMJ University an din a, kum 2012-13 sung khan Ph.D zom dinga inzieklut mi 490 an um bakah Ph.D degree tehlem 434 chuong a peksuok nia hril a nih.

Meghalaya governor hlui RS Mooshahary principal secretary MS Rao chun nikum April 26 khan Jha lakah FIR a thelut a, thil indiklo hmusuok ani hnungin CMJ University-a thuneitu iemanizat hai chunga thubuoi siempek an ni a, Jha ruok chu an bi hmang leiin a umna chin hriet an naw a, police hai chun man tumin an zong zing kha nih.

Mizo Film thar July-ah

Aizawl, April 23, 2014: Tulai hin Mizo film thar buotsai mek a ni a, shooting zofel vong an taa, editing khom zofel vat beisei a nih.

Hi film hming hi “Khuanu Samsuih” ti niin, Mizoram Film Development Society-a president ni lai mek C. Hmingthangvunga siem a nih. C. Hmingthangvunga hi Mizo film suok hnuhnungtak “Zodinpuii” siemtu kha a nih.

He film hi “Chhingkhual Lanu” film script ziektu Jenny ziek a ni a, romantic-action film ning a tih.

“Khuanu Samsuih” film hi DVD-a zor suok nghal ni nawng a ta, khuo hrang hrang-ah big screen-in suksuok phot tum a nih. Ruohman danin July thla tawp tieng khin tlangzar beisei a nih.

Film inchangna hmun hi Mizoram sunga vong a na, Aizawl, Lunglei, Reiek le Tuirial le a sevela haia lak a nih.

Silchar-ah Mohun Bagan le Shillong Lajong friendly match inkhel ding

Silchar, April 23, 2014: Hung tlung ding May 01 khin Mohun Bagan le Shillong Lajong hai chun Satindra Mohan Dev Stadium, Silchar-ah friendly match inkhel an tih. Hi friendly match hi United Spirits Limited hai huothot a nih.

Hi inkhelna a hin hieng team pahni star player hai an ṭhang seng beisei a ni a, referee-in I-League a referee hai hmang ning an tih.

A huoihottu hai chun inkhel hi mipui 17-18,000 velin an en an beisei a, ticket chu inkhelna hmunlai counter siem ning a ta, chu taka innthokin inchawk thei ning a tih. Inkhel hi nisa tlak hnung, flood light hnuoia inkhel ning a tih.

Tuivawl HSA president fam chang

Sakawrdai, April 23, 2014: Hnam ta dinga mi ṭangkai tak le iengtik lai khawma a ṭulna ta phawta mawng zangtaka hnam ta dinga pensuok hlak Tv. D. Lalruotsang, Sakawrdai, HSA Tuivawl Block-a President nilai zing chu April 23, 2014 zan dar 11 vel khan chatuon ram a mi lo pansan tah.

Ama hi "internal bleeding" a nei thuta Aizawla-h damdawiin panpui dinga an insiem mek lai a natna tuorzo loin ami lo boral san ta a nih. Ama hi ei inpamin a sunghai ei tuorpui takzet a nih. Lusun a beidawng le hril hai taka a maksanhai po po Pathien in umpui mawl raw seh.

Tamenglong-in NRWP scheme an dong ding

Imphal, April 22, 2014: Manipur sorkar PHE department chun Tamenglong le a sevel-ah National Rural Drinking Water Programme (NRWP) a ṭan tum a, scheme hnuoia hin meter 100 biel sunga cheng haiin ni khat-ah mi pakhatin tui liter 55 pei a dong ding a nih.

PHE department-a thuneitu chun khawvela natna 80% hi tui ṭhanaw hmang anthoka inkai thei ani thu hrilin, hieng natna lei hin kumtin mi maktaduoi 13 an thi hlak niin a hril.

“Tuia kan hnienghnar thei dan ṭha tak chu tui hnar le ramngaw humhal an ngai a, kum 10 liemtah khan khawlai hmuna khom tui a hnienghnar em em a, tu ruok hin chu tui harsat zie hi mitin hriet a ni tah. Tamenglong-a tui harsatna suktlawm dan pakhat chu tui intingna siem rawn le ruotui inkhawmna siem a nih,” tiin a hril.

Manipur khawpui Imphal le a sevela mihring nuoi 7.55 chuong chenghai chun ni khat-ah tui liter maktaduoi 101.9 chuong an mamaw niin thuneitu chun a hril a, ni khat-ah tui liter maktaduoi 101.3 pek suok theina ding water plant an nei anthok ni khat-ah liter maktaduoi 70 chauh an la pek thei thu a hril a, mamaw zat pek suok ding hin theitawp suoin hma an lak mek thu a hril bawk.

Mizoram University kut “Vibrio 2014” ṭan

Aizawl, April 22, 2013: Zani anthok khan Mizoram University kut laia lien tak “Vibrio 2014” chu ṭan a ni a, zirtawpni April 25 chen khin nei ning a tih. “Vibrio 2014” hi MZU Students’ Council, Vanglaini chanchinbu le Zonet cable network hai ṭhangkopa an huoihot a nih.

“Vibrio 2014” kut a hin inelna le insukhlimna chi hrang hrang buotsai a ni a, MZU a inchuk kher lo, college-a inchuklai hai ta ding bikin Runway Show Down, Got to dance, Rock Fest, Cosplay le Debate hai nei ning a tih.

MZU inchuklai hai ta ding bik khomin inelna le insukhlimna chi hrang hrang hieng Varsity Miss, Photography, Cultural Dance, Essay & Poetry, E-gaming, Fun Zone le Quiz hai huoihot ni bok a tih.

Miss Mizoram inpuocha mek

Aizawl, April 22, 2014: Kum 2005 hnunga Miss Mizoram inthlang nawk hmasatak ding inpuochana chu a fe tluong peia, ruohman angin thil tam tak thaw zing a nih.

Tukuma Miss Mizoram inthlang ding a hin Miss Mizoram-in Rs. 1,10,000 poisa fai dong a ta, 1st runners-up in Rs. 50,000 le 2nd runners-up in Rs. 30,000 dong an tih. Hi baka hin sub-title chi hrang hrang 10 siem ning a ta, sub-title lawmman latuhai chun Rs. 10,000 seng dong bok an tih.

Inbuotsai dan chun April 25 hin Miss Mizoram 2014 Contest Grand Finale nei tum a ni a, amiruokchu, boruok chi dang dang leiin a hun hi June 6-a dinga son tlat a nih.

Miss Mizoram inelnaa ṭhang ding hai chun May 23 chenin Entry Form thelut thei a nih, tiin a huothottuhai chun inhriettirna an siem.

Supreme Court-in Tejpal bail hnina a hnawl

Goa, April 22, 2014: Supreme Court of India chun pawngsuoltua intum jail-a intang mek, Tehelka magazine founder Tarun Tejpal interim bail hnina chu a hnawl pek a, sienkhom, Goa sorkar kuomah regular bail a hnina chungchang-ah a ngaidan inhriettir dinga ti thung.

Tejpal aiawtu senior advocate Harish Salve chun Chief Justice P. Sathasivam, Justice Rajan Gogoi le NV Ramana hai umna bench kuomah, Tejpal thubuoi siem pek chungchanga thuhretu 152 ko tum an ni lei le nikum November thlaa pawngsuolna hmun nia hril Goa hotel-a CCTV footage pek an la ninaw leiin hun ala lak ding niin a hril.

Salve chun, “Pawngsuoltua intum hin CCTV footage copy a hni chu tu chenin pek ala ni nawh,” tiin a hril a, regular bail a hnina sukhnu ani leiin interim bail phal pek dingin a ngen a nih. Pawngsuola intumtu nuhmei le thuhretu nia hril ṭhenkhat hai chu Delhi-ah an um mek a, hienglai zing hin court chun Tejpal hi Delhi-a a fe a khap leiin Goa-ah hrentang mek a nih.

Bench chun a thubuoi ngaituo ṭan ani hma chun Tejpal suok phalna a pek thei naw thu a hril a. Hi le inruol hin Goa sorkar kuoma chun Tejpal-in regular bail a hni chungchanga an sangna chu kar thum sungin thelut dingin an hriettir bok a nih.

ATSUM in a lawmpui

Imphal, April 22, 2014: All Tribal Students' Union Manipur (ATSUM) chun thusuok siemin, Manipur Civil Services Combined Competitive Examination 2013-a hlawtling LH. Nganthingshim (1st position), Lalthazam (4th position), Thangboi Gangte (10th position) le midang dang hai chu an hlawtlingna thu-ah a lawmpui hle thu a tarlang.

ATSUM info & publicity secretary Micah Kamei chun, tribal ṭhalai haiin State le Centre-a competitive exam dang dang a hai midang hnot phaka hlawtlingna an chang hi ATSUM chun a lawmpui hle thu an tarlang a. MCSCC exam 2013-a candidate 189 um hai lai tribal 82 zet merit list-ah an ṭhang phak leiin ATSUM chu a lawm hle a nih, tiin a tarlang bawk.

April 24-a Assam MP inthlangnaa ngir crorepati 22 an um

Guwahati, April 22, 2014: Hung tlung ding April 24-a Assam-a 16th Lok Sabha MP inthlang tawpna dinga hin MP ṭhungna 6 inchuhai lai mi 22 hai chu crorepapti an nih.

Hienghai lai hin Guwahati MP biel-a ngir crorepati 6 umin an tam taka, Nagaon-ah 2 umin crorepati ngirna biel tlawmna tak a nih.

Nido Tanai thattu mi 4 hai judicial custody potsei

New Delhi, April 22, 2014: Arunachal tlangval Nido Tania (k. 19) Delhi-a that a nina le inzoma mi 4 judicial custody-a hrentang mek hai chu ni 14 dang la kol nawk dingin Delhi-a court pakhat chun a rel.

Additional chief metropolitan magistrate Pritam Singh chun Nido Tania thattu nia intum Pawan, Sunder, Sunny Uppal le Farman hai pali chu court hmaa inlangtirin ni 14 dang judicial custody-a la hrentang nawk ding a potsei pek.

Hieng mi 4 hai hi February thla khan Arunachal tlangval Nido Tania thina thu le inzomin man an ni a, Scheduled Castes/Scheduled Tribes (Prevention of Atrocities) Act dan hnuoi-ah thubuoi siem pek an nih.

January 29 khan Nido Tania chu New Delhi-a Lajpat Nagar hmun lai chun hieng a thattu nia intum dawr nghaktuhai le chun insukbuoiin dawr nghaktuhai hin an vuok hron a, Nido chun a hliemna tuor loin a zing January 30 khan hospital-ah a thi pui a nih.

Nido nu-le-pa hai chun an naupa hin inrang taka justice a hmu theina dingin tiin India union minister Sushilkumar Shinde le Congress vice-president Rahul Gandhi hai chu an inhmupuia, an naupa thubuoi chu Delhi Police anthok Central Bureau of Investigation (CBI) kuoma inhlan sawng a nih.

Manipur-ah tribal kohran pawl inzomkhawm siem

Imphal, April 21, 2014: Liemtah April 10 khan Manipur-a tribal kohran pawl hrang hranga ṭhuoituhai chu Chingmeirong-a Seventh Day Adventist Campus-ah inkhawmin thlarau, khawtlang le politics tieng hai nguntaka hriltlangna an nei hnungin tribal Kristien hai lai inremna, inzatonna le inthuruolna a um theina dingin tiin inzomkhawm pawl Tribal Churches Leaders’ Forum (TCLF), Manipur ti chu an siem.

Fekhawmhai chun inzomkhawm pawl siem thar a ding ṭhuoitu an thlang nghal a, president-ah Dr. S. Lalpi Vaiphei, vice-president-ah Rev. Apila Thangal, general secretary-ah Fr. Paul Lelen Haokip, treasurer-ah Pastor Johnny Shimray le information secretary-ah Pastor Lamkeng Lhouvum hai chu thlang an nih.

Hieng ṭhuoituhai baka hin member 10 nei Executive Council le adviser a ding 3 an thlang bawk a nih.

TCLF motto chu "Together we Transform our Society" ti a nih.

Khehpuam-a inhnamhnoi mi 7 Central Jail-ah

Aizawl, April 21, 2014: Kar hmasak ningani le zirtawpni-a Mizoram police-in "khehpuam" tia hrietlar Pseudoephedrine damdawi ṭhahnem tawktak Bolera motor le an man naa inhnamhnoi mi 7 hai chu Aizawl Central Jail-a sie lut an nih. An lai hin Bolero neitu MPCC spokeperson Lalrozara le Mizoram Youth Commission (MYC)-a member hai khom an ṭhangsa bok a nih.

Kar hmasak Ningani khan Kulikawn le Ngaizel inkar lai Pseudoephedrine damdawi khesa kg 327 zeta rik le damdawi tolruka inhnamhnoi nia intum Hrangthanzauvi (30), S. Laldinliani (30), Zoliansangi (38), Lalrinsangi (41), motor driver Lalruatthanga (30) le S. Lalrinthanga (27) hai chu man an ni a, a zing-ah zirtawpni khan mi 2 dang MYC member Lalremsangi Fanai (36) le motor neitu MPCC spokeperson Lalrozara hai chu Police-in an man hnungin an chungah thubuoi siem pek an nih.

Police chun inrinni zan khan damdawi an manna kudam neitu MYC member Lalremsangi Fanai In, Upper Republic-a le Falkawn-a mi hai bakah Millennium Centre-a a dawr an dap nawk a, damdawi man bel ruok chu an nei nawh.

May chawlkar 2-naah Bru lak kir tum

Aizawl, April 21, 2014: Mizoram Bru, Tripura transit camp-a raltlana um mek hai chu May thla chawlkar 2-na anthokin Mizoram-ah lak kir tum a ni a, Mizoram an suoksan hmaa an khuo a hai seng inumtir nawk tum a nih.

Bru lak kir nawk ding chungchanga hin zani khan Mizoram home minister R. Lalzirliana le sorkar thuneituhai chu an ṭhungkhawm a, Bru hai chu May thla chawlkar hnina anthoka lak kir dingin ruohman an siem a, thaw ding ṭul la umhai buoipuitu dingin Mamit DC chu an ruot.

Mizoram sorkar-a OSD (Home) David L. Lalthangliana chun, Bru hai lak kirna ding hin Mizoram sorkar-in Central anthoka a hmu Rs. 7.87 crore a nei a, hi hi sungkuo 699 hai lak kirna dinga ti a nih, tiin a hril.

David H. Lalthangliana chun, Bru lak kir an ni theina dinga sum umsa hmang thei dinga sukfel ngaihai sukfel dingin Finance department inhriettir an ni ti a hril a, Bru lak kir ding zat chu Finance tieng haiin sum an peksuok theizat le an umna ding khuo V/C haiin inhmun an sukfel theizat izir ning a tih, tiin a hril bawk.

OSD (Home) chun, Bru lak kirna ding a hin Mizoram sorkar-in a thawthei chu a tho zo thawk khat taa, Mamit DC le an umna ding khuo V/C ha’n sukfel ding iemanizat an la nei thu a hril a, “Bru hai lak kir nawk ding hin thepatawp suong ning a tih,” tiin a hril.

David H. Lalthangliana hril danin, Bru hai chu Mizoram an suoksan hmaa an umna khuo a hai seng inumtir tum a ni a, an khuo hlui ram ta hai chu an constituency sunga khuo dang a hai inumtir ning an tih, tiin a hril.

Meeting-ah hin Home, Finance, Revenue leh DP&AR department thuneituhai, Mamit, Kolasib le Lunglei DC hai an ṭhang bawk a nih.

MAL Book of the Year 2013

Aizawl, April 21, 2014: Mizo Academy of Letters (MAL) chun kum 2013 sunga Mizo irawm suok lekhabu suok hai laia ṭha tak a dingin Lalpekkima ziek 'Thinglubul' ti chu an thlang.

Book of the Year 2013 hin lawmman Rs. 5,000 le thuchei a som a, lawmman hi April 23 khin Synod Conference Centre, Aizawl-a MAL golden jubilee lawmna nei hun-ah inhlan ning a tih.

MAL golden jubilee lawmna a hin MAL member, Academy Award dong ta hai, Book of the Year dong ta hai le an thloppui pawl hrang hrang hai chu ṭhang ve dingin an fiel nghal a nih.

Sin a kaisang

New Delhi, April 22, 2014: Dr. (Upa) Ruolkhumlien Buhril, IAS chu Joint Secretary anthokin Additional Secretary, Government of India-ah alo kaisang tah. Anni 1984 Batch a hin IAS mi 149 an um a, Additional Secretary-a kaisang mi 41 laia a ṭhang phak ve a nih.

A sin hi Ministry thar siem hma po a pangngai ala chel a tih. Tuhin Ruolkhumlien Buhril hi Delhi hmuna posting a nih.

“Food poisoning” leiin BSF sipai mi 124 damdawi in lutpui

Shillong, April 20, 2014: Voituk khan West Garo Hills, Meghalaya-a um BSF sipai mi 124 hon vel hai chu “food poisoning” leiin damdawi in lutpui an nih.

West Garo Hills DC Pravin Bakshi-in thuthar lakhawmtuhai a hrildan chun, zing dar 6 vela zingbu a fak khopin, BSF sipai hai chun an um infuknaw thu an soisel a, dar 9 velin a ṭhen inluokin a ṭhen an sungin a khaw leiin mi 124 hon vel chu damdawi in lutpui nghal an ni thu a hril.

Mi 83 hai chu Tura-a Mission Hospital-ah lutpui an ni a, a dang hai chu Tura Civil Hospital panpui an nih.

Hieng BSF sipai hai hi Assam tienga mi, Meghalaya le ramritna hmun Mankachar-a posting an na, Tura-a Praharinagar-ah camp a um an nih.

Hi thiltlung hi an hriet le inruolin, Assam tienga BSF hotuhai chu West Garo Hills-a hospital hai sirna an nei nghal niin BSF thuneitu pakhat chun a hril. BSF hotuhai chun hi “food poisoning” hung suok dan suichieng an tum thu a hril bawk.