Kum 2014-16 HCLF ṭhuoitu thar ding hai

CCpur, May 31, 2014 (HT): Zanikhan RPC HQ Office, Peace Lane-ah Hmar Christian Leaders Forum (HCLF) General Body meeting nei a ni a, hi huna hin kum 2014-16 chunga HCLF ṭhuoitu thar dingin hieng a hnuoia hai hi thlangtling an nih.

Chairman: Rev. Ros Infimate, Vice Chairman: Rev. Dr J.L. Songate, Secretary: Rev. Dr Lalhmuoklien, Assistant Secretary: Rev. Rohminglien Pakhuongte, Finance Secy. : Rev. Rokhum Joute, Treasurer dingin Rev. Tlanghmingthang hai an nih.

Chun, Auditors dingin mi pahni - Dr Rosangzuol Kholum le Rev. Saithanglur Joute hai thlang an ni bawk.

HSA Joint meeting nei

CCpur, May 31, 2014 (HT): Zanikhan HSA Office, HSA Campus, Rengkai-ah HSA Platinum Jubilee ding le inzawmin HSA Gen. Hqrts le Platinum Jubilee Committee joint meeting nei a nih. Hi huna hin Platinum Jubilee hmang ding le inzawma hmalak pei dan ding hai ngaituo a ni a, June, 2014 a inthawk programme puithu taka hmang ṭan ding tiin an rel.

Platinum Jubilee Committee khawm siemdanglam a ni a, Chairman dingin Pu Rochunghnung le Secretary dingin Pu Joseph L. Infimate hai ruot an ni bakah Treasurer dingin Lalrobul Pudaite ruot a nih.

Platinum Jubilee Fund raise na dingin vawisun hin HSA Gen. Hq. ṭhuoitu le Jubilee Committee hai chu Imphal tieng suokdawk an tum.

June 3 chen Police Custody-a um dingin

CCpur, May 31, 2014 (HT): May 28, 2014 nia Thingkangphai Women Welfare Association (TWWA) in an khuo sunga nuhmei le pasal mawilo taka um kawp an man hai chu zani hmasa khan Chief Judicial Magistrate (CJM) Court hmaah inlangtir an ni a, CJM chun June 3, 2014 chen Police Custody-a la um phawt dingin an chungthu a rel.

Hi chungthua hin CCPur Police chun FIR No. 1 (5) 2014 WPS CCP U/S 376 IPC an registered a nih. Mana um pasal hi nuhmei thisan, nau 3 neita a ni a, nuhmeinu chu mi phak rak lo nia hril a nih.

B.Sc (Hort) admission proforma lak hun

Imphal, , May 31, 2014 (HT): 19th All India Entrance Examination for Admission (AIEEA-UG-2014) a ṭhang, CAU, Iroisemba le NEC for 2014-15 session a admission thaw nuomhai ta dingin Admission proforma chu Rs. 200 pekin June 2, 2014 a inthawkin Directorate of Horticulture & Soil Conservation, Sanjenthong hmuna lak a, fill up zovah hi Directorate a bawk hin June 18, 2014 chena peklut thei ning a tih tiin Director, Horticulture & Soil Conservation, Govt. of Manipur chun inhriettirna a siem.

AI in Silchar route service a hnukkir

Silchar, , May 31, 2014 (HT): March 15, 2013 a ṭan, Indian Airlines (tuta Air India ni tah) in ATR42-320 Vuongna hmanga Silchar-Kolkata le Imphal-Guwahati routes haia a lo service ṭan chu a hnukkir (suktawp) ta thu Air India chun a puong. Silchar route-a a service a tawpsan na san Air India chun a hrillang nawh.

National Security Adviser thar

New Delhi, May 31, 2014 (HT): Intelligence Bureau (IB) Chief hlui Ajit Doval (69) chu zanikhan sawrkar thlungpuiin National Security Adviser thar dingin a ruot. Ajit Doval hi 1968 batch IPS Officer, January, 2005 a IB Chief a inthawk pension ta a nih.

SBI ATM booth thar hawng

CCPur, May 30, 2014 (HT): Zani 7AM khan Dorcas Hall Fencing, New Lamka hmuna SBI ATM booth thar chu H. Mangchinkhup, EM, ADCC in a hawng a, a biel sunga hiengang thil thar hung um chu lawmum a ti thu a hrila, SBI chu India rama bank lien pawl tak a ni leiin tukhawm hin clerical staff 500 lak thar a ni ding a ni a, SBI fethlengin mi tam takin sin an hung nei pha ding thu a hril.

SBI Chief Manager, S. Kaikhanthang chun, ATM booth vawisuna hawng le hin SBI CCPur Branch hnuoia ATM booth 7-na a ni thu a hril a, ATM booth hawng belsa dinga ti hai hawng vawng a ni pha SBI CCPur Branch chun CCPur-ah ATM booth 15 a nei tling ding thu a hril. ATM hi vengtu um lo ding a ni leiin mipui hai chu venghim le ṭha taka enkawl dingin a ngen.

Singjamei bomb puokah mi 2 thi, mi 8 an hliem

Imphal, May 30, 2014 (HT): Zani zantieng dar 5:15 vel khan Singjamei Chingamakhong, Imphal West District-a Chingamakhong junction market shedah bomb a puok a, mi 2 an thi a, mi 8 an hliem.

Hliem hai laia mi 2 an hliem inrik hle a, hliemhai po po hi RIMS panpui vawng an nih. Tu pawl khawma bomb hi an sukpuok a ni thu an la puong nawh. Hi bomb puoka hliem hai lai hin Nga zawrtu nuhmei pakhat a ṭhang. Mi 2 thi hai laia pakhat chu a hmuna thi a ni a, pakhat chu RIMS Hospital panpui a ni mek laia thi a nih. Bomb puoka thi hai chu Samchan Rai (30) s/o (L) Shenaha Rai le Arvind Rai (20) s/o Sakaldeep Rai hai niin Bihar-a Motipur Babanidev khuo mi ve ve, tuta Chingamkha, Imphal hmuna cheng le khawsa mek an nih. An ruong hi RIMS Morguea sie a nih.

Manipur CM O.Ibobi Singh chun Bomb puoka hliemna tuok hai hi RIMS Hospital-ah a va kan a, bomb sukpuoktuhai a dem hle thu a puong. CM in hliem hai a va kan huna hin I. Hemochandra, Minister Public Health Engineering Dept.; K. Govindas, Minister Industries le Agriculture Minister Md. Nasir han an zui ve. Hi bomb puok le inzawm hin zanita Home Minister chel thar Mr Rajnath Singh chun Manipur CM O.Ibobi Singh chu telephone in a hung biek a, bomb sukpuoknaa inrawlna nei hai chu man ngei dingin a hung inhriettir bakah law & order enkawltu dingin security huntawk sie dingin an hriettir.

Outer LS MP in Committee hai bu a fakpui

CCPur, May 30, 2014 (HT): 16th Lok Sabha election-a Outer Manipur MP dinga thlangtling nawk Thangso Baite chun zani 10:30AM khan Hmarveng-a a chegnainah Election Committee hai bufakpuina a nei. Hi zo hin Zomi Council (ZC) ṭhuoitu hai chun Thangso Baite MP a tling lawmpuina an nei bawk.

Thangso Baite chun, term hmasa khan votes 2.5 lakh zetin a khingpui hnea a hlawtlingthu, tuta a term 2-na a votes 15,000 chuong meta hratna a chang chu, nang-kei ti lova ei thaw tlawtlang nazar a ni leiin a hlu a term hmasa nekin tuta tuma a tlingna chu a hlu lem thu a hril.

Hmatieng peia mipui ta dinga sin thaw ding ṭul le ṭha hai chu inhriettir pei dingin ZC ṭhuoitu hai a ngen.

Mizoram-ah pa hme leiin sungkuo pakhata mi 3 an thi

Aizawl, May 30, 2014 (HT): May 23, 2014 khan Myanmar le Mizoram inrina bul, Champhai District, Mizoram sunga Ngaizawl khuoa sungkuo pakhat chun ramhnuoia mawng Pa (Mushroom) hmea suongin an fak a, zantieng bu an fakkhawp hnung sawtnawteah sungkuo pakhata mi vawng mi pathum - Nianglianmawia (30) s/o Ginzathang, a nuhmei Awingaihdini (28) le an upa nuhmei Chinlammangi (37) hai chu an thi.

An phing a hung na a, an inluok a, an luokah thisen a ṭhang bawk leiin an damnawna a hung zuol pei leiin May 24, 2014 khan Khawzawl PHC panpui an ni a, sienkhawm dam zo lovin May 27, 2014 khan an thi vawng. Pa hi papar sawna an fak a nih.

ZEO Office-a file an lak belsa nawk

CCPur, May 30, 2014 (HT): Zani 12:00noon khan CDSU volunteers ni dinga ringhla hai chun ZEO, CCPur Office-a File/Documents pawimaw ṭhahnemtawk tak an lakdawk nawk. Hi thu hi ZEO Office chun DC le SP, CCPur hai kuoma report an pek.

CDSU chun, CCPur District-a inthawk Teachers 227 an post le transfer a um hai June 2, 2014 chena sawrkarin a kansel naw chun Documents an lak hai hi an raw hmang ding thu le helna chi tum tum an thaw ṭan ding thu an hril.

Chandigarh-ah accident tuok

Chandigarh, May 30, 2014: Nikum Mizoram MLA inthlangnaa Chalfilh biel-a ngir ve J. Lalchhanhima naupa Chandigarh-a Engineering inchuk mek chu motor accident a tuok leiin khaw hreloin Post Graduate Institute of Medical Education and Research (PGIMER), Chandigarh-ah enkol mek ani thu ei thu lakna chun a hril.

Thu ei dong dangin, J. Lalchhanhima khom voisun hin Delhi fethlengin Chandigarh-ah a pan mek a, a naupa hi a thluok tieng a tawk leiin khaw hreloin ala um zing a, Delhi tieng inenkol dingin phur ning a tih.

Mahur-ah naupang inruhmangtu man

Haflong, May 30, 2014: Voituk khan NC Hills-a Mahur Porter Camp-ah naupang inruhmang hlaktu pasal pakhat naupang inrukhmang a tum lai Zeme Naga ha'n an man a, mipui pungkhawmin na takin an vuok a, a hmun-ah Police hai an tlung hma'n mipui hai chun ramhnuoi tieng an ṭhuoi niin ei thu lakna chun a hril.

Miss Mizoram Contest Day 1

Aizawl, May 30, 2014: Thawṭanni May 26 khan Miss Mizoram 2014 inthlangna nei mek Elimination/Audition Round nei a ni a, Miss Mizoram 2014-a ṭhang dinga inzieklut hai lai mi 16 thlang suok an nih. Voisun hin hieng finalist 16 hai hin Mizoram University Multi-purpose Hall le Campus sung hmun hrang hrang-ah CONTEST DAY 1 nei an tih.

CONTEST DAY-1 a hin Sub-title hrang hrang hieng Miss Beautiful Smile, Miss Beautiful Skin, Miss Beautiful Hair le Miss Photogenic hai thlangna nei ning a tih.

June 2 khin KP Picnic Resort hmun-ah CONTEST DAY 2-na nei ning a ta, hi huna hin Miss Perfect 10, Miss Personality le Miss Catwalk hai thlang ning a tih.

CONTEST DAY 3-na hi June 4 zan dar 8-in Art & Culture Auditorium, Beraw Tlang-ah nei ning a ta, Miss Talented ding thlang ning a tih.

Grand finale chu Vanapa Hall, Aizawl-ah June 6 zan dar 8 anthok nei ning a tih.

Photo credits: Studio Cindy & Jigsaw Photography

India hmarsak biel helpawl hai le inbiekna sukhmaw ding

Rajnath Singh

New Delhi, May 30, 2014: India sorkar-na cheltu National Democratic Alliance (NDA) chun India hmarsak biela helpawl hrang hrang hai le inbiekna chu inhmaw taka sunzom nawk ding le hun bituk sunga zo fel ani theina dingin hma la dingin Home Minister Rajnath Singh chun thuneituhai a hril.

India home minister nina a chel anthokin Rajnath Singh chun North Block-ah Home Ministry thuneituhai an hmupui nghal a, hi inṭhungkhawmnaa hin Union Minister of State for Home Affairs Kiren Rijju, Home Secretary Anil Goswami le Home ministry-a thuneitu insang hai an ṭhang kim deu vong a nih.

Hi inṭhungkhawmna a hin Home ministry-a thuneituhai chun darkar thum sung presentation an nei a, helpawl hrang hrang hai le inbiekna nei mek hai chu zo fel ani thei dan ding hriltlang a nih.

16th Lok Sabha session June 4-11 sung

Indian Parliament

New Delhi, May 30, 2014: 16th Lok Sabha inṭhungkhawmna hmasatak chu thla nawk June 4-11 sung khin nei ning a ta, India president Pranab Mukherjee-in India rorelna inpui pahni – Rajya Sabha le Lok Sabha hai inṭhungkhawmna chu June 9 khin keihruoi bok a tih, tiin ei thu lakna chun a hril.

Thla thar June 4-5 khin Lok Sabha-a thlangtling thar Member of Parliament (MP) hai thu insamna nei ning an ta, a zing-ah Lok Sabha Speaker ding thlangna nei ning a tih. Raj Sabha session thar chu June 9 khin nei ṭan ni bok a tih.

MP thar hai thu insamna hi Pro-tem Speaker a ruot Congress ṭhuoitu hlun le MP Kamal Nath-in neipui a ta, Arjun Charan Sethi (BJD), Purno A Sangma (National People’s Party) le Biren Singh Engti (Congress) haiin ṭhangpui an tih.

Modi’n a minister hai ni 100 pek

Narendra Modi

New Delhi, May 30, 2014: Zani khan Prime Minister thar Narendra Modi chun a cabinet chanpui hai kuomah rorelna felfai tak le programme hrang hrang hai inhmaw taka sukpuitling ani theina dingin ni 100 sungin agenda ṭhatak siem fel dingin a hril.

Modi chun, ram pumpui sukhmasawnna dingin India ram sunga State tin hai sukhmasawn a ngai thu hrilin, State sorkar le MP haiin thubuoi sukfel dinga an hung put lut hai chu ngai poimaw dingin a hril bawk.

PM sin a chel anthoka a cabinet member hai voihni an hmupuina a hin, regular takin a cabinet minister hai le an secretary hai a hranin an hmupui hlak ding thu a hril bawk.

Document pelut lo hai hlaw hrentang ding

CCPur, May 29, 2014 (HT): Hmangte Lerte Kom, Additional Director of Education (S) Hills, Govt. of Manipur in zani hmasa laia order an suo dungzuiin Manipur Hill Districts haia Teachers Seniority list siemna ding le inzawma May, 2014 thla sung ngeia Educational Certificate le Appointment letters ṭhanga document peklut dinga inhriettir, document pelut lo hai chu an document an peklut hma po an thla hlaw cheltang pek ning a tih. Churachandpur Districta chun document pelut lo Teachers 35 an la um.

Thawtlang dingin an rel

CCPur, May 29, 2014 (HT): Zani zantieng 1PM khan Tipaimukh Road Areas Transport Development Association (TRATDA) Information Centre-ah Tipaimukh Road Transport Cooperative Society Hmarbiel han Joint meeting an nei a, hi lampuia tlan huna accident le buoina tuok huna inṭhangpuitu le chanchin inhriltuo-a thawtlang dingin an rel bakah joint meeting nawkah pawl (Association) pakhata um dan ding ngaituo dingin an rel.

75th Zillai Day-cum-Felicitation

CCPur, May 29, 2014 (HT): Zillai, CCPur block chun May 31, 2014, 11AM a inthawk khin Synod Hall, I.B. Road-ah 7th Zillai Day-cum-Felicitation programme huoihawt an tih.

Hi huna hin L.M. Khaute, IPS, Addl. DGP, Manipur Chief Guest, Soiminlian Lengen, MCS, SDO, Henglep Guest of Honour le D. Khuala Vaiphei, Prog. Manager, NRHM, CCPur Functional President in ṭhang an tih.

TWWA in mawilo taka um nuhmei le pasal an man

CCPur, May 29, 2014 (HT): Thingkangphai Women Welfare Association (TWWA) chun zanikhan an biel (khuo) sunga nuhmei le pasal mawilo taka um kawp hai chu an man a, zani zantieng khan Police kuta an peklut.

CCPur Police chun case lain FIR No. 1 (5) 2014 W/PS- CCP U/S 376 IPC an registered-a, tuhin Police stationah an kawl mek. Mana um hai chu Lienneithang Neitham (38) s/o (L) Paukhonek of Kaitindam Veng, Thingkangphai le nuhmei kum 19 mi, hingkangphai khuoa um hai an nih.

Lienneithang hi nau 3 nei tah, a nuhmeiin a thisan ta hnung a ni a, nuhmeinu hi ruolban raklo niin ei thu dawngna chun a hril. Nuhmeinu hin pasal pa le an zal hmunkhat thu a nu le pa hai kuoma a hril a, chu taka inthawk hi thu hi hrietsuoka hung um a nih.

Nuhmeinu hin a mi suollui a nih tiin a hril a, pasal pa ruok chun a suollui naw thu le a remtinaa a zalpui niin a hril. Anni pahni hi inngaizawng anga um niin Police a inthawk ei thu dawngna chun a hril.

CCPur-a CBSE Cl-XII Science topper

CCPur, May 29, 2014 (HT): CBSE hnuoia Class XII result suoka chun JNV Tuinom, CCPur a kai Margret Chinneineng Haokip d/o Jamkhomang Haokip of DHQ, Tuibuong chun Science streamah overall marks 87.8% hmuin CCPur district topper a ni a, English, Mathematics, Physics, Chemistry le Computer Science haiah letter marks a hmu.

Maths le Physics subject haiah CCPur-a mark hmu insang tak a ni bawk.

B.Sc (Forestry) inchuk thei

Imphal, May 29, 2014 (HT): Academic Session 2013-14 a B.Sc (Forestry) Entrance Test chu June 8, 2014 khin Forest Department in huoihawt a tih. Application Form chu May 28, 2014-June 5, 2014 inkar sungin Principal Chief Conservator of Forest office-ah lak thei le fill up zovin June 5, 2014, 4PM chenin peklut thei ning a tih.

Children's Act chungchang consultative meeting

CCPur, May 29, 2014: Voisun sun dar 11 hin Manipur Alliance for Child Right Churachandpur Chapter (MACR-CC) huoihotna hnuoi-ah "One Day District Consultative Meeting on POCSO Act, Juvenile Justice Act, Substance Abuse Act & Role of Media related to the existing Children's Act" ti thupui hmangin District Training Centre, Churachandpur-ah "Consultative Meeting" nei ning a tih.

Hi consultative meeting a hin inchuklai pawl, kohran thuoitu, hnam thuoitu le thuthar lawkhawmtuhai khom fiel a ni a, inhnikna nei tuelkhom thang dinga fiel an ni bawk.

Dr Amo Tipaimukh biel fangin an zin

Chaltonlien Amo

CCpur, May 28, 2014 (HT): Chairman, Hill Areas Committee (HAC), Govt. of Manipur le Tipaimukh A/C MLA Dr Chaltonlien Amo Vangai biel, Tipaimukh biel fang dingin an zin mek a.

May 23, 2014, 11AM khan Patpuihmun khuoa Vangai tlangdunga khuotina leader hai inkhawmna neipuiin Vangaitlang suk hmasawn dan ding hrilpuiin ruoi a ṭhepui bawk. Chun, May 26, 2014 chawhnung dar 2 khan Ankhasuo phaisung po po a khuotin a leaders hai an pawlpui nawk a, a biel hmasawnna le hmatieng peia hmalak dan ding hai hriltlangin ruoi ṭhe a ni bawk.

Zani zantieng 2PM khan Jiribam PWD Guest House ah Vangai (Tipaimukh) concern department tin head hai - ZEO, Jiribam; DFO, Jiribam; EE, Electricity; EE, PWD le EE, PHED hai an hmupui a, Vangai, Tipaimukh a hma hrat taka lak dan dinghai a hrilpui.

May 28, 2014 in Zomi area Vangai hai leh Jiram hmuna inkhawmna neipui bawk a tih. Bufai normal quota baka additional quota in 400 bags sem thei dingin sukfel nghal bawk a tih.

Vangai pumpui Electric la tlung le varnawna hmun Sartuinek chena invarsuok tir ngei dingin Department hai le biel mipui han ṭhangpuina ngen in hma a lak bawk a, Vangai tlang dai tawk ding Electric ban tuhin Ankhasuo thak tlung vawng a ni ta a. Department hai le ṭhangruol in 2014 chena a varsuok ngei beisei a ni thu a hril.

Tuhin Jiribam a la cham mek a, a ṭul chen chena, a biel mipui hai harsatna sawmdawl dingin biel mipui hai le an inrawntlang zing tiin Pu Lalhossan, EM, ADCC a inthawk ei thu dawngna chun a hril.

DC in Gas Agency Manager hai an hmupui

CCpur, May 28, 2014 (HT): Mr P.K. Jha, IAS, DC, CCPur chun zani 11:00AM khan a Office chamber-ah CCPur town sunga Gas Agency pahni Kim Joe Gas Service le Sialngenthang & Sons (SAS) Manager hai le M. Ginzasuan, DSO, CCPur hai meeting a neipui.

Hi huna hin Monthly allocation chungthu, Company han Gas Cylinder an hung pek zat hai DC chun Gas Agency Managers hai an dawn a, Agency pahni hai chun Consumer an nei zat report an pek bawk. Agency manager han report an pek dungzuiin Kim Joe Gas Agency-ah Consumers 11255 le SAS consumer 13256 an um a, Agency pahni haia Consumer umzat belkhawm chu 24511 a nih.

Gas Agency pahni hai chun, IOC in thlatin (monthly)-a an hmu thei zat ding a bituk (fixed) pek a, hi dungzui hin Cylinder an hmu thei ding chu Agency pakhatin thla khatah loads 18 a ni a, load khatah cylinder 306 a um thu le monthly quota bituk peka um khawm a full-a pek an ninaw thu DC kuoma an intlun.

Hi chungthua hin DC, CCPur chun, CCPur District sunga consumer han Gas an indai deu theina dingin CAF & PD fethlengin IOC kuoma monthly quota a full-a pe ding le Consumer an pung pei leiin quota khawm sukpung dinga a ngen pek ding thu a hril. DC chun Gas
tlung huna Agency hai chu a kuoma report pe pei dingin an hriettir.

Truck in In pakhat a baw

CCpur, May 28, 2014 (HT): May 26, 2014 (zani hmasa) zan dar 10:00PM vel khan Serou Leingawi phur Truck MN05C0168 chun Muolvaiphei-a Bethesda School of Nursing panna lampui (junction) bul laia Pu Lalpawllien @ Pawla In a baw a, mihriem thi le hliemna tuok ruok chu an um nawh.

Truck hi CCPur khawpui tieng pana hung tlan a ni a, Truck hin ṭeklei bang chimin insungah a tlanlut a, an bedroom le kitchen bang hai a baw chim vawng a nih. Khum a baw phak nawna hi fit tlawmte chau a nih.

Truck neitu hi Lallien of Ngurte a ni a, Truck hi midangin an haw a ni a, motor hmangtu han zanikhan thingpui khain In a baw neitu hai bula an va thlulut a, sienkhawm a Truck neitu tak a ṭhang naw leiin inbiekremna a la um thei naw a, Truck khawm khal dawk lovin a pangngai in a la um zing a, inbiekremna nei hma chu Truck hi lak dawk an phal naw a nih. Vawituk 7AM hin inbiekna an nei ding niin In a bawsiet neitu Pu Pawla chun a hril.

Delhi khawpui-ah NE mi ha’n nuorna an nei

New Delhi, May 28, 2014: Zani khan Delhi khawpuia India hmarsak mi inchuklai le mipui hai chun vai lawyer pakhatin Nagaland nunghak pakhat a sinthawna inthoka inlawi Metro station hmun-ah lo soisaka, a poi tawk pek a tum ditnaw entirna’n Bar Council of India (BCI) hma-ah nuorna an nei a, mi ṭhahnem tawk tak an fekhawm niin ei thu lakna chun a hril.

Naga nunghak ṭawiawmtu dinga Tis Hazari Court-a fe NE inchuklai ṭhuoitu ṭhenkhat, judge le police hai hmaa vai lawyer poi tawktua intum ruol ha'n lo suosal a, court sung anthok hnot suok hnunga kut chen thlaktu lawyer hai khom hrem dingin BCI chu phut ani bawk.

Poi tawktua intum lawyer le a ruolhai chu Court sung anthokin NE inchuklai ṭhuoituhai anlo hnot bakah na taka hliemin an vuok hron tawl bok a nih. NE nuhmei lawyer pakhat chunga khom kut an thlak nghe nghe bok a nih.

BCI khomin hi chungchanga thu hin hma an lak ding thu hrilin, May 23 a lawyer ṭhenkhat hai chetdan poi an ti thu le an dem hle thu an hril a, Tis Hazari Court-a NE mi hai chunga kutthlaktu lawyer hai chungah action la dingin Delhi Bar Association (DBA) khom anhriettir niin an hril a, zinga khin DBA anthok donna an beisei thu an hril bawk.

Lawyer hai chetdan chungchang hi ni 30 sunga suichienga, sukfel dingin hma an lak ding thu hrilin, dan angin an phur tawk hrem pek an ni ding thu BCI hai chun an intiem bawk. Poi tuoktuhai khom Court-ah an inlang hunah police venghimna pek an ni theina dingin Delhi Police khom an ngen ding thu an hril bawk.

Tiemchin hun ni 30 sung hin DBA-in lawyer hai chunga action a lak naw chun, BCI chun apex body ani angin an phu tawk hremna a pek ding thu an intiem bok thu Delhi-a NE inchuklai pawl inzomkhawm hai kuoma chun an hril bawk.

Mizo inneina dan chungchang hriltlang

Aizawl, May 28, 2014: Mizoram State Law Commission chu zani khan chairman John Siamkunga, MLA inrawina hnuoi-ah an inṭhungkhawma, “The Mizo Marriage, Divorce and Inheritance of Property Bill 2013” chungchang an hriltlang.

Law Commission member secretary Zahmingthanga Ralte chun inṭhungkhawm nasan hrilfie-in, “The Mizo Marriage, Divorce and Inheritance of Property Bill 2013” chu buoina dang leiin Assembly session-ah put lut thei a ninaw ding thu hrilin, “Bill-a siemṭhat ngai a um nia hriet ani lei le pawl ṭhenkhat anthokin siemṭhat rotnahai a um leiin Law Commission chun a ngaituo ṭha nawk a nih,” tiin a hril.

Mizoram Assembly budget session

Aizawl, May 28, 2014: Zani khan Mizoram governor Vakkom Purusothaman chun Mizoram Assembly budget session chu July 8, 2014 anthok nei ṭan ani ding thu inhriettirna a siem.

Session nei hun sung ding ruok chu Business Advisory Committee-in la ngaituong a tih, tiin ei thu lakna chun a hril.

Bru raltlan hai lak kir hun ding la sukfel thei lo

Aizawl, May 28, 2014: Zani khan Mizoram chief secretary L. Tochhong inrawina hnuoi-ah State Level Core Committee on Bru Repatriation hai chu an inṭhungkhawma, Tripura-a Bru transit camp-a Mizoram Bru raltlan um mek hai lak kirna dinga thok rukna hun ding chungchang an ngaituo a, Bru hai lak kir hun ding chungchang-ah thuthlukna an la siem thei naw thu ei thu lakna chun a hril.

Thu dong danin, Bru raltlan hai hin an thuomhnaw phur man hai, sungkuo tin Rs. 5,500 pek hlak chu sukpung dinga an phut hai, kum hni sung a thlawna ration an dong ding hai, sum ṭhangpuina le In bawlna ding ṭhangpuina Rs. 80,000 pek hlak chu Rs. 1.5 lakhs-a sukpung pek dinga an phut hai ngaituo le hriltlang ani bawk. Bru raltlan lak kirna sin thok rukna hi sungkuo 300 vel tinzawn dinga ti ani bawk.

Hi inkhawmnaa hin Mizoram IGP Zorammawia, Mamit DC K Lalthawmmawia, GAD le Home department-a thuneitu hai an thrang bok a nih.

Gelatine kep 20,000 man

Aizawl, May 28, 2014: Zani zantieng dar 4:40 vel khan Mizoram CID (Crime) hnuoia Special Narcotics police le 36th Assam Rifles sipai ṭhangruolin Aizawl-a Bawngkawn Phuihnamchhe Veng an dap a, gelatin bomb sukpuokna kep (detonator) bawm 40 an man a, bawm sunga hin gelatin kep 20,000 a um niin ei thu lakna chun a hril.

Police hai thil man hi Rs. 4,40,000 manhu vel ni dinga sut a nih.

Kep neitu nia hriet Burma mi Zabiaka (k. 49) le Thanga (k. 37) hai hi an gelatin kep hai le man sa nghal an nih. Police hai hrildanin, kep hai hi vai haiin an kuoma an sie a, Burma tienga thon dinga ti a nih, tiin an inpuong thu an hril.

Man a um mi pahni hai hi Explosive Substances Act section 5 hnuoi-ah thubuoi siem khum an nih.

Khehpuam neitua intum Lalremsangi bail phalpek

Aizawl, May 28, 2014: Thla hmasak April 17-a Aizawl Ngaizel-a Bolero motor anthoka Khehpuam (pseudoephedrine) mum tam tawk tak man le inzoma inhnamhnoi nia intum le Mizoram Youth Commission-a member anthoka inban tah, Lalremsangi Fanai chu May 26 khan Aizawl ND & PS judge Lucy Lalrinthari-in damnawna leiin interim bail-a intlansuok thei dingin a phakpek.

Bail phalpektu Lucy Lalrinthar chun, Lalremsangi hin Alpha Hospital doctor anthokin damnawna lekha a nei thu hrilin, “A doctor lekha hin Lalremsangi hi lungril beidongna nasa tak nei le mani khom inthat nuom hiel ngirhmuna um niin a tarlang a, doctor anthoka damnawna lekha a nei zing lai ngai poimaw loa, bail-a insuo phalpek naw an naw chun kan ta dingin a poi ve thei a nih,” tiin a hril.

Judge chun, Lalremsangi Fanai kuoma interim bail phalpek hi thlakhat sunga ding a ni a, thla nawk June 26 khin Court hma-ah inpe nawk dinga ti a nih, tiin a hril bawk. Lalremsangi ruola man a thloppui dang hai ruok chu bail pek an ni ve nawh.

April 17-a khehpuam man le inzomin Mizoram police-a District Special Branch hai chun Lalremsangi le a thloppui mi iemanizat an man a, April 18 khan a dawr khom dapin khehpuam iemanizat an man bok a nih.