HWA inrawinain Rangoon-a chavai nuhmei pahni hai hung ṭhuoitlung

CCPur, July 26, 2014 (HT): Singapore-a mi umpui (domestic help)-a ṭhang ding tia mi ṭhenkhat hmalaknaa Rangon (Myanmar) ram chen ṭhuoiluta um, sienkhawm mumal lo taka khawsa Rengkai mi nuhmei tleirawl kum 14 le kum 17 mi hai chu zani hmasa zan sawt hnung khan dam takin Churachandpur hung ṭhuoitlung an ni tah.

Hieng nuhmei tleirawl pahni hai hi Hmar Women Association (HWA) Gen. Hqrts; Manipur Alliance of Child Rights, CCPur Chapter le Child Welfare Committee, CCPur han ṭhangruola Myanmar-a inthawka an va sansuok le CCPur hung phurtlung an nih.

Tleirawl pahni hai hi zanikhan Child Welfare Committee chun an nu le pa hai kuta an inhlan tah.