“Nurse hai hi voituk hin Kochi an hung tlung beisei a nih,” tiin India sorkar thuneituhai chun an hril.
“An nuom thu loa hretang Indian nurse hai hi insuo an ni taa, Erbil-a Indian Embassy thuneituhai leh an inbiek paw zing a nih,” tiin India external affairs ministry thupuongtu chun a hril.
Erbil khawpui hi Iraq hmar tienga um, Kurdistan hmunpui a ni a, buoina hmun anga ngai an naw a nih.
ISIS hai hretang Indian nurse hai hi Saddam Hussien khuo suokna hmun Tikrit khawpuia hospital pakhat a sinthaw an ni a; thla hmasak June 9-a Iraq sorkar-in ISIS helpawl hai laka ‘operation’ a nei khan ISIS helpawl hai chun hieng nurse hai hi an hrentang a nih.
Nurse hai hi helpawl hai opna khawpui Tikrit anthoka 250-a hlaa um Mosul khawpuia sie an ni a, Mosul anthoka Erbil International airport hi km 70 vela hla a nih.
Nurse hai chunga kut thlak a ninaw thu le an him thu MEA thupuongtu chun a hril a, “New Delhi anthoka special Air India vuongna chu Iraq panin a vuong suok taa, nurse hai hi an renga kan ram tieng ṭhuoi kir an ni vong hma chu chawl loin ṭhang lang kan tih,” tiin a hril bawk.
Chartered flight a hin India sorkar thuneituhai bakah joint secretary level IFS officer le nuhmei IAS officer hai khom nurse hai tuok dingin an fe bok an nih.