Manipur mi hai ta dingin NOIDA-ah colony

Imphal, July 16, 2014: Asia-a real estate company lien tak Investors Clinic chun NOIDA khawpui-ah Manipur mi hai ta ding bikin ‘flat colony’ siem an tum niin ei thu lakna chun a hril a, hi colony hi National Highway-24 lampui, Columbia Asia Hospital zawn khingtieng panga bawl dinga ti a nih.

Hi colony remchangna Manipur mipui hai kuoma hrilhriet dingin Investor Clinic director Pranab Sharma, general manager Devedra Singh le an thokpui ṭhenkhat hai chu July 19 khin Manipur-ah inzin an tih.

Colony bawl ding thu le inzoma social worker Amrit Singh Pahwa-in thuthar lakhawmtuhai kuoma a hrildan chun, Manipur mi hai ta dinga colony bawl dinga riruong hi NOIDA hmun remchangna-ah ning a ta, Delhi Airport anthok khom km 14 vel chauh ding a nih, tiin a hril. Hieng ang colony hin India hmarsak mi hai chunga suolna hai khom a sukrem thei beisei a ni ding thu a hril bawk.

Delhi khawpia flat inchawk man an sang hle lain, hi colony a hin Rs. 15 lakh chauhin bedroom 1, kitchen, toilet le bathroom inchawk thei ning a ta; Rs. 21-in bedroom 2, kitchen, drawing room, bathroom le toilet inchawk thei ni bok a tih, tiin a hril.

A hril pei danin SBI, HDFC le Axis Bank hai fethlengin flat hi instalment-a inchawk thei khom ning a ta, amiruokchu, hieng bank a hai hin flat man 10% chu sung lut phot a ngai ding thu a hril a, a dang 90% hai chu kum 20 sungin a bat batin thung thei a ni ding thu khom a hril.