UPSC exam pattern thar chungchang-ah report thelut dinga inhriettir

New Delhi, July 17, 2014: Minister of State for Personnel Jitendra Singh chun, civil service exam beituha’n Civil Service Examination pattern le syllabus siemṭhat chungchanga lungawi lona inlangtira bu ngheina an nei mek chu suktawp dinga ngenin, hi chungchang suichiengtu dinga indin Arvind Verma Committee chu report thelut dinga inhriettir a ni thu a hril.

Minister chun, member 3 umna panel Arvind Verma Committee chu inchuklai ha’n examination pattern ennon dinga an ngenna chungchang rotna an nei hai suk inhnu loa thelut vat dinga hril an nih, tiin a hril.

Committee report hi kar khat sunga thelut hman beisei a ni a, hi hi Civil Services Exam buotsaitu Union Public Service Commission (UPSC) ngaidan thelut leh inchuk chieng a ni hnungin, ministry thutlukna chu August 24 khin a suksuok ning a tih, tiin Jitendra Singh chun a hril bawk.

Exam beitu inchuklai ṭhenkhat bak-ah ABVP activist hai chun UPSC office kot-ah nuorna neiin UPSC chu Civil Services Aptitude Tests (CSAT) sukbo dingin an nor a, hi pattern thar hi Hindi ṭong hmangtuhai ta dingin a harsa bik ding leiin an thaw siet pha ding a nih, tiin an hril.

Sorkar khomin UPSC kuomah syllabus chungthu sukfel a ni hma'n Civil Services Preliminary Examination chu son hnu dingin a'n hriettir bok a nih.