Mizoram State Data Centre enkoltuhai chun MJA member hai chu Data Centre sunga hmun poimaw hai an fangpui a, an hrilfie nghal bok a nih.
ICT secretary Lalhmachhuana chun, Mizoram-in information technology (IT)-ah State dang a la tluk naw ti ngaituona a um hlak ti a hril a, “Hienglai zing hin State Data Centre changtlung tak, State dang hai nei ang le khom inzapui umlo tak kan indin thei hi lawm a um hle a nih,” tiin a hril.
ICT hotuhai hrildanin, tuta ngirhmun-ah Mizoram-ah e-governance 15% vel chie a la hlawtling a, financial approval hmu ding khomin file-in dawkan 124 vel a fetlang a ngai thu hrilin, file-in dawkan a pantlang suktlawmna dingin department hai an inthlak danglam a ngai, tiin an hril.
Mizoram State Data Centre indin ṭanna ding hin Rs. 30.88 crore riruong a ni a, Rs. 19.13 crore chu additional central assistance (ACA) anthoka hmu ding niin, Rs. 11.75 crore chu grant-in-aid anthoka hmu ding a nih.
State Data Centre thiltum tlangpui hai chu:
* State-of-the-Art Data Centre ṭha tak siem le telecommunication le inthlungzomna ṭha tak in nei tir.
* Sorkar lekha poimaw hai po po him tak le ṭha taka vong ṭhatna hmun siem.
* Department hrang hrangin service hrang hrang hai olsam taka an pek suok theina dinga infrastructure siem pek.
* Department ha’n mipui kuoma inrang tak, ṭha tak le him taka service hrang hrang olsam taka an pek suok theina dinga hmun siem pek.