MPYCC-in Lalzirliana le police hai an inpak

Aizawl, August 4, 2014: Mizoram Congress party ṭhalai (MPYCC) hai chun, August 1 zing dar 3:45-a Mizoram parliamentary secretary Lt. Col. (Retd) ZS Zuala in bomb hmanga bei a ni na thu-ah an dem thu an tarlang a; bomb sukpuoktuhai suisuokna kong-ah Mizoram home minister R. Lalzirliana le police hai hmalakna an suong thu an hril bawk.

MPYCC chun, “Home minister le police ha’n mipui venghimna nghor taka fepuia theitawp an suo laia, tlansie puma bomb sukpuok a um leiin MNF ṭhalaiin thusuok siem a, law & order-a hlawsam ta vieu anga an tarlang hi an thaw lo top ding a nih,” tiin an hril a, sietna le vangduoina tlung leia sorkar maw inphurtir tlat tum chu mang rama cheng hlak hai party ṭhalai thaw tawka an ngai thu an tarlang.

Congress ṭhalai hai chun, kum 10 sung MNF an sorkar laiin law & order-ah sorkar a hlawsam a, mipui an ralṭi hle niin an hril a, in lambun ṭum 3 umin police 16 an thi a, police le hmun poimaw beina ṭum 43 a um a, inrukhmangna ṭum 23 a um bok niin an tarlang.