Dawsang chim leiin mi 35 hliem, na zuol 7

Aizawl, April 18, 2014: Ningani April 16 zan dar 8:50 vel khan Vanbawng khuo-a Tuivai Group YMA Conference neina community hall-a dawsang (gallery) an siem chu a chim a, a hnuoia inṭhung mi 35 an hliem a, na zuol bik deu 5 hai chu Aizawl Civil Hospital panpui nghal niin, a hnungin mi 2 refer nawk an nih.

Thu dong danin, Tuivai Group YMA Conference hi Vanbawng community hall-ah hmang a ni a, hall hnungtieng chun thingin dawsang siem a na, conference tawp zan khan mi an ṭhahnem leiin dawsang chun zo loin a chim nia hril a nih.

Aizawl Civil Hospital-a hliem 5 panpui hai laia 2 – Lalrinchhana le Lalngaisanga hai chu admit an ni a, 3 dang hai chu first-aid pek hnungin insuoktir nawk nghal an nih. Hliem 2 admit hai hi Suangpuilawn khawsuok ve ve an nih. Lalrinchhana hi a zangru a thliek nia hril a nih. A hnungin Greenwood Hospital-ah sawn nawk a ni a, surgery khom nei niin ei thulakna chun a hril.

Hliem danghai chu Suangpuilawn damdawi-in panpui an ni a, 3 admit an ni a, a danghai chu first aid pek hnungin insuoktir nawk nghal an nih. Suangpuilawn PHC-a admit hai chu Mercy Lalhriatpuii (Vanbawng), Jenny Lalṭhazuali (Zawngin) le Lalramenga (Zawngin) an nih.

Conference a hin Mizoram minister Zodintluanga le bieltu MLA Dr. Ngurdingliana hai khom an ṭhang ve a, hliem tuokhai chu an thei ang angin an buoipui niin ei thuthar lakna chun a hril bawk.

Vanbawng Students' Union chun thusuok siemin, Tuivai Group YMA Conference-a vangduoina a thlung hi poi an ti hle thu an hril a, hliem hai po po an tuorpui tak zet thu tarlangin dam takin damdawi-in anthok an suok vat an beisei thu an tarlang.