K. Chhawnṭhuama chungchanga Police PRO-in thusuok siem

Aizawl, April 16, 2014: Voisun chawhnung khan Mizoram police Public Relations Officer (PRO) chun "Mizo Phantom" tia hriet lar K. Chhawnṭhuama le a thokpui nia intum K. Lalhruaitluanga chungchang-ah thusuok a siem a, anni pahni hi April 13 zan khan Star Line Hotel, Guwahati-ah man niin April 15 khan Aizawl tlungpui an ni a, Magistrate phalna’n police custody-ah sie mek an ni thu a hril.

PRO thusuok siemdan chun, K. Chhawnṭhuama hin EPIC tehlem hmangin a hming le address indiknaw R. Lalmawia s/o R. Lianthangpuia ti hmingin Air ticket a book-na le Hotel-a in register na’n a hmang a, hi EPIC tehlem hi Michael Chhakchhuak siem pek niin Police PRO chun a hril.

K. Chhawnṭhuama'n police hmaa a hrildan chun, Serchhip DC office bula strong room kalna tala zong dok khom R. Lalmuanhlua inpuongna anthoka a hriet thu le tala zong suok ding hin R. Lalmuanhlua le K. Lalhruaitluanga (Mapuia) hai a tir thu a hril a, EVM sukchingpen chungthu hi Michael Chhakchhuak leh Kolkata-a an inhmu ṭum anthoka a hriet le R. Lalmuanhlua anthoka a hriet bak thulakna dang a nei naw thu Police hma-ah a hril bok a, evidence dang dang zong khawm na’n Michael Chhakchhuak kuomah Rs. 15 lakhs a pek thu K. Chhawnthuama hin Police hma-ah a hril a, Rs. 5 lakhs chu Michael a kutah a pek ta thu le a dang chu tlawm te te-a pek ani thu le Michael Chhakchhuak lak dok dingin Rs. 5 lakhs chu Zodinpuii (Durtlang Kawn Veng) account-ah a transfer thu K. Chhawnṭhuama chun a hril bok a, hi hi bank statement-a khom an lang niin Police thusuok chun a tarlang bawk.

PRO thusuok-in a hril pei dan chun, K. Lalhruaitluanga hin K. Chhawnṭhuama ngenna angin R. Lalmuanhlua ta dingin Aizawl-Kolkata ticket a lak pek a, Serchhip Bukpui bula tala zong suok kha R. Lalmuanhlua sie chop ani le ninaw thu a hrietchieng bik naw thu a hril a. R. Lalmuanhlua-in a inhluona tala a hmang, a pek kir talo kha ani thu a inhluona neitu'n a hril a, hi hi andik le andik naw thu suichieng mek a nih, tiin tarlang ani bawk.

K. Chhawnṭhuama chun vai computer scientist thiem em em tia a hril chu ama'n a hmu bik naw thu le Michael Chhakchhuak hrilna anthoka a hriet bak mihriem tak tak ani le ninaw a chieng bik naw thu a hril bok niin PRO thusuok chu a tarlang. A hnungin voi 2 a hmu thu le a biek thu a hril nawk a, chuonghai khom chu andik le andiknaw suichieng mek a nih, tiin PRO chun a tarlang bawk.

Michael Chhakchhuak hin mi tam tak khelin a hlem taa, Lunglei le Aizawl police station a hai khom inhlemna thubuoi a nei mek a, K. Chhawnṭhuama hin Michael Chhakchhuak, a hming tak C. Lalbiakmawia (Lunglei Pukpui) le R. Lalmuanhlua (Durtlang Mualveng) hai anthoka a thu dong a hril suok ti a puong ta leiin hieng mi pahnihai hi nasataka zong mek an ni a, an umna hre hai chun police kuomah inhriettir dingin PRO chun a ngen bok a nih.