AMCH-a doctor inchuklai thattua intum hrentang sunzom

Dibrugah, May 21, 2014: Dibrugarh-a chief judicial magistrate Court chun zani khan thla hmasak May 9-a Assam Medical College & Hospital(ACMH)-a doctor inchuklai Dr. Sarita Toshniwal that thu-a intum tak Dr. Dipmoni Saikia chu judicial custody-ah a sie sunzom nawk. Court-in Saikia a hrentangna hmasalem hun chu zani khan a tawp a nih.

Sarita thatna thubuoia ‘case diary’ chu Assam police-a Criminal Investigation Department (CID kuomah zani khan inhlan ani bawk a nih. Hi thubuoi enkoltu investigation officer Inspector Ranjit Singh khom hi thubuoi le inzomin Dibrugarh-ah a cham mek a, Sivasagar-ah mi ṭhekhat anthok le Sarita sunghai kuomah thu indon chiengna nei nghal bok a tih.

Assam sorkar chun Sarita thattu AMCH-a ward boy Kiru Mech le that dinga phierrutua intum AMCH-a inchuk tho Dr. Dipmonia Saikia an man hnung ni iemanizat hnungin thubuoi hi CID kuomah an hlan sawng chauh a nih.

Police haiin AMCH-a ward boy Kiru Mech an manin Dr. Saikia le inthuruolruola Dr. Sarita an that niin an puong a, Dr. Saikia ruok chun tuolthatnaa hin an hnamhnoi naw niin a hril ve thung.

Sarita thattua intum hai hi Indian Penal Code (IPC) section 302, 120(B) le 34 hnuoi-ah thubuoi siem pek an nih.