Satan biek chungchang le inzomin, East Khasi Hills (EKH) District deputy commissioner chun zani khan district huom sung po po-ah CrPC 144 a puong a, iengti kong zawnga Satan biek khapin, thlanmuol sukporche annawleh sakhuo inchikna hmangruo suksiet, zana thlamuol laia ṭhalai invak vel, bang ziekrang, pawl insuol le zana bike intlansiekna hai chu khap a ni thu a puong bok a nih.
EKH district DC Sanjay Goyal chun, “Hieng thiltlung hai hi district sunga Kristien sakhuo chauh niloin sakhuo dang bie hai lungril a suknaa, mipui lungril a suksawl bakah a sukchi-ai a nih,” tiin a hril.
“Hieng thiltlung hai hi khap loa, inthawtir zom an ni chun mipui, khawtlang le sakhuo inlaichinna khom sukse thei ani bakah district sunga mipui himna, hringna le buoina chen khom an tlung tir thei a nih,” tiin DC chun a hril bawk.
Meghalaya sunga Satan biekna hi a hmasatakin Garo Hills tienga inthoka inṭan nia hril a ni a, a hnungin Khasi Hills tieng an sawng pei nia hril a nih. Satan bie hai inthawina hmun hi ramhnuoi le thlanmuol ani tlangpui a hril a nih.
Meghalaya police chun, Indian Penal Code (IPC) dan hnuoi-ah Satan bie hai hi man theina a umnaw a, an biekdan le inthawidan kong-ah dan an bawsie ruok chun man thei chauh an nih, tiin an hril.
Meghalaya DGP PJP Hanerman chun, Satan biekna hi khawtlang ta dinga thil hrisel lo tak a ni a, nakie tieng peia khom inthawina chi hrang hrang intlungtir thei an leiin inlau thawng a um em em a nih, tiin a hril.
Hmasak lai khom khan Garo Hills-a Williamnagar hmun lai naupang nuhmeite kum 6 mi chauh hmelhrietlo iemanizatin Satan kuoma inhlan dingin an inruk hmang nia hril ani bawk.
Tura police hai khomin May 11 zan dar 10:30 vel khan Upper Chandmari venga thlanmuol pakhat anthokin kum 18 chungtieng class 10 le 12 inchuklai tlangval 5 ngir puma an ṭongṭai lai an man a, an kuoma inthokin ganja iemanizat le kross khom an dapsuok bok a nih. Hieng an i man mi 5 hai taksa a hin arasi kil nga nei sung-ah Satan lim ni awm tak tattoo an ziek a, kross ṭhi a letlinga inkhai an or a, an phing-ah ‘parallel line’ ang deu an ziek bok niin police hai chun an hril.
