London anthoka magazine suok, khawvel pumpuia inchukna hmun khaikhin hlak tu Times Higher Education (THE) chun tu kuma dingin rambung 29 hai anthoka liemtah kum 50 sunga indin institute hai laia ṭha zuol 100 an thlang suok naa chun IIT Guwahati chu 87-naah a ṭhang phak ve a nih.
Kum hni liemtah anthok khan hi magazine hin liemtah kum 50 sunga indin institute hai ranking a hranin a siem ṭan a, top 200-ah India anthokin institute pakhat khom an la ṭhang ngai naw a nih. Kum 2013 khan khawvel pumpuia institution 500 hai lai India rama IIT pali hai chu inṭhangsa tir an nih. Nikuma ranking-naa khan Punjab University chu World University Ranking 250 hai lai inchuonsa ve a nih. Tu kuma ranking a ding hin India anthokin institution 19 haiin an khaikhin na ding data an pek lut a nih.
Hi magazine-in university a khaikhin dan chi hrang hrang 13 a nei a - teaching, staff:student ratio, research output, citation impact, international outlook, international students, international academic staff, research income le a dang dang hai a nih.
THE ranking a hin South Korea-a Pohang Universityof Science and Technology (Postech) chu a zawnin kum thum pakhat-na a lak taa, Korea Advanced Institute of Science and Technology (KAIST)-in a zawnin a pathum-na kum hnih a lak ta bok a nih. A pahni-na chu Switzerland-a École Polytechnique Fédérale de Lausanne-in a zawnin a lak nawk bok a nih.
Top 10-a ranking danghai chu – 4-ah Hong Kong University of Science and Technology, 5-ah Nanyang Technological University (Singapore), 6-ah Maastricht University (Netherlands), 7-ah University of California (USA), 8-ah Université Paris-Sud (France), 9-ah Université Pierre et Marie Curie (France) le 10-ah Lancaster University (UK).
Top 100 hai laia rambung pakhat anthok university thrang rawn tak chu Australia niin institution 14 zet top 100-ah an thrang phak a nih. USA anthok institution 8 an thrang ve.
