Lalhmingliana chun voisun khan Aizawl Press Club-ah thuthar lakhawmtuhai an pawlpui a, Mizoram le Assam ramri buoina chu Union home minister hlui Shivraj Patil a hrilpui ta thu hrilin, “Assam-in ramri buoina an nei naw thu an hril thu a hril a. Central sorkar-in ramri a buoi ti an hriet theina dingin ramri lai silai suk rik a ngai. Assam hi ei don let a ngai a, ei don let naw chun Central-in hrie nawng an tih,” tiin a hril.
Tulaia Buhchangphai-a thiltlung chungchang a hrildanin, Mizo IR police duty hai laia an hotu chun SDC kuomah firing order an hni a, SDC chun Kolasib DC a hni nawk thung a, amiruokchu thu mumal a um ta naw a nih, tiin a hril.
Lalhhmingliana chun, Mizo police haiin firing order an nei naw leiin Assam police haiin lo kap ta hai sien, an kap let ve thei naw ding an leiin firing order nei loa fe el chi a ninaw thu a hril bawk.
Lalhmingliana chun, “An hriet phut tirin fe hai sien an tlung hman vong. Assam police hai chetna tlung lo dingin iemata police hai an chel tlat? Ei police hai firing order an pek si naw a, Assam police hai chet sung po po Buhchangphai-ah an innghaktir a nih. Hi hi asan kan don a nih,” tiin a hril.
Congress sorkar term hmasa lem khan Vairengte mipui lak-ah firing order pek ani thu hrilin, Lalhmingliana chun, “Mizo hai lak-ah firing order pe thei si, Assam lak-ah pe thei lo hi ieng ang sorkar am ana? Lungthulien (Manipur)-ah police an tir lut a, iemata Assam-ah an tir lut ve thei nawh? Iengchenam Assam sorkar laka hin ei dawi ding?,” tiin zawna a siem bok a nih.
Lalmingliana chun, “Nilaini-a home minister a fe khan police le mipuihai chun thlamuongpui an tih. An mi sukbuoi a, an liem hnunga chauh ani fe ding? An mi sukbuoi ei nghak pei ding am a nih?,” tiin a hril bawk.
Lalhmingliana chun, Bairabi bula Khawbon tlang-ah Assam Forest haiin kum 2009 khan chawlna hmun an bawl a, chu chu Assam police haiin hluo zuiin tuchenin an la um niin a hril a, “Khawbon tlang hi ei ram chin a ni a, a thlanga Khawbon vadung chu ei inrinna a nih. MNF sorkar lai khomin bawl an tum taa, amiruokchu bomb a puok leiin an che zui ngam nawh,” tiin a hril bawk. Ramri buoinaa hin Mizoram sorkar a ṭhanghar a ngai thu a hril bawk.
Zawna sangin, Rajya Sabha MP chun, ramri hnai-ah police outpost sie ṭha a ti thu le Assam-in Mizoram an hung inchuna chu veng a rin thu a hril a, MNF sorkar laia MZP-in Vairengte thlang-ah Zo Run an bawl a, an bawl ni khan Mizoram police haiin an ṭhiek pek nawk nghal chungchang-ah, “Inter-State relation a dingin a ṭha naw dinga hriet an leiin inṭhiektir ani a ring,” tiin a hril.
MP ṭawiawmtu MNF MLA, Dr K Beichhua khomin thu hrilin, "Iemata thubuoi rik tak file ta hnungin firing order pe loa IR hai tir thlak an na? Assam police hai lo kap hlum dinga tir thlak am an nih?,” tiin zawna a siem a. “Ramri buoina-ah voisun ei to zing chun zing-ah siem ṭhat thei ni ta nawng a tih,” tiin a hril bawk.
