Hiengang thu indiklo le belchieng dawllo hi tukhawma thedar ngai lo dingin mipui hai a ngen bakah Ramsa kap bansan dingin SP chun mipui hai ngenin thudiklo thedar rak hin buoina nasa tak intlun thei a ni leiin mitin fimkhur ding le tukhawma thudiklo thedar ching lo dingin SP chun ngenna a siem.
SP, CCPur chun, Mr Kamkhanlal (45) s/o (L) Khamzakhup of Singngat le a ruolpa Mangmuanlian (35) s/o (L) Goukholen of Mission Veng hai chu April 29, 2014 khan ramsuok in an fe a.
Tongjang ah zankhat an riek hnungin April 30, 2014 khan sa kap dingin ram an lut ṭan a, hi ni hin Zawng pakhat an kap hlum bakah April 2, 2014 zantieng 2:00PM vel khan Sakhi 1 an kap hlum nawk a.
Kamkhanlal chu an sa kap hai zawr dinga khuo a hung pan naah Police han thu indawn chieng dingin an hrentang a, an sa kap hlum hai hi Forest Department kuoma pek a ni ding thu le Kamkhanlal chu a ṭul anga hremna pek ning a tih tiin a hril.
Army han ramsuok mi 2 an kap hlum nia hrilna um thua hin Singngat Police Station a Police hai le Behiang-a um Army hai khawm inbiepuiin ramsuok mi 2 kap hlum nia hrilna um chu thudiklo a ni zie sukchieng a nih tiin SP chun a hril.
Kamkhanlal chun a ruolpa Mangmuanlian chu ram hnuoiah a la um niin a hril.
Source: Hmasawnna Thar
