April 23, 27 le 29-a Assam Police le Forest miha’n Buhchangphai-a Mizo leilet In pali an suksiet thu fe mek-ah Kolasib DC Jitender Yadav chun Hailakandi DC umna hmun-ah fe in thil umzie a hrilpui. Kolasib DC hi Kolasib SP Rishi Pal le ASO Lalrinawmate ha’n an ṭawiawm a nih.
Kolasib anthoka thu dong danin, Kolasib DC chun Hailakandi DC kuomah iengleia Ramtharzau-a leilet neituhai sukbuoi am an na, tia an don chu, Hailakandi DC chun Ramtharzau chu Assam ram a ni thu a hril.
Hailakandi DC chun, an ram china an ngai, an ram sung-ah Mosolman hai um an phal naw thu hrilin, leilet neituhai niloin an rama dan loa um an phalnaw leia suok dinga ti an ni thu a hril bawk.
Kolasib DC Jitender Yadav chun, Buhchangphai le Ramtharzau chu tuta hmaa inthoka Mizo haiin an lo enkol le cheibawl ani thu hrilin, Molsolman hai chu Mizo leilet neituha’n an ram enkol dingin an sor ani thu a hril.
Jitender Yadav chun, Assam police haiin In an suksiet pek a neituhai chu Mizoram home minister R. Lalzirliana-in bawl ṭhatna ding poisa le rangva a pek thu hrilin, tuta hnunga ramri chungchanga harsatna a um chun a ruka thil thaw loa, DC le SP hai bak-ah DFO level-a hriltlang hlak nisien ṭha a ti thu a hril bawk.
Hailakandi DC chun, Buhchangphai-ah kut an thlak ta naw ding thu hrilin, Mizoram khomin IR police a sie hai chu la suok dingin a phut a, Kolasib DC chun Home department thuneina a ni leiin thunei insanglem hai kuomah an tlun ding thu a hril.
DC pahni hai inbieknaa hin Buhchangphai thubuoi chu State pahnia DFO hai a hmuna fea enfie nisien, chuzoah hriltlang nawk nisien an ti bawk a nih.
