Kar hmasak June 13 khan KSO-GHQ in thusuok siemin, Moreh hi Kuki hai ram a nih, tiin an puong kha a nih.
DESAM chun hi buoina chungchang sukfel dingin mithiem hai hung suok dingin a phut bok a nih.
DESAM hrildan chun, Moreh hi British-in "Old Kuki" hnuoia a sie Kom hnam hai khuo a nih, tiin an hril a, "New Kuki" haiin "Old Kuki" hai an sunga an hril lut tum hi thil indiklo a nih, tiin an hril.
.
1990 bawr laia Naga le Kuki kara hnam buoina suok lei khan Kuki thlazar hnuoia um hai chu Moreh a hin umhmun an khuor chauh a ni a, Burma rama anthok khomin Thadou-Chin mi tamtak an inpemlut bok a nih, tiin DESAM thusuok chun a hril bawk.
Hmun danga inthoka hung inpemlut Kuki hai chu Moreh chauh niloin a kawl hnaia 'reserve forest' hmun tam tak a khom an hung hluo pei niin an hril bawk. India-in zalenna a hmu hma anthok khomin Moreh a hin hnam chitin an um taa, "New Kuki" hai um hma anthok khomin Tamil hai chu hilai hmuna hin umhmun an khuor ta bok a nih, tia hrilin, Kuki haiin Moreh hi Kuki ram anga an hril hi thil indiklo a nih, tiin an hril.
Moreh hi hmun poimaw a hung ni pei leiin, ‘New Kuki’ haiin an ram bik anga hrilin an lak tum a nih. Hi buoina chungthu a hin buoina a zuol hma’n historian haiin Moreh ngirhmun indik tak hi suichieng dingin DESAM chun a phut bok a nih.
Kuki haiin “Chietharol Kumpaba”-a an chuongve thu an hril hi “Old Kuki” hai an ni a, “New Kuki” hai chu 1850s vel khan hrillangin an um ve chauh niin DESAM chun an hril.
