KSO-GHQ general secretary Seiboi Haokip chun zani khan thusuok siemin, DESAM thonthu thedar tum hi thu belchieng lo a ni a, Kuki hai chu inpem mi anga an hril hi thil invet thlak a nih, tiin a hril bawk.
Kuki ṭhenkhat chu inpem hlak nihai sienkhom mi chimral dinga inpem an ninaw a, an ram huom china inpem hlak an nih, tiin Haokip chun a hril bawk.
Shan ram, Kabaw le Cachar phairuom-a Meitei hai anlo khawsa ta hlak ang bokin Kuki hai khom India hmarsak ram biel, Burma hmar le thlang tieng, Bangladesh-a Chittagong tlangdung khawsuok mi ngei an nih, tiin KSO thusuok an tarlang.
Manipur ram khom tiena tlanga Kuki hai lo khawsakna hmun a ni a, Manipur chauh naw khom India hmarsak biel hai venghimtu an ni a. Anglo-Manipuri Indona khom ni iemanizat chauh a aw nasan chu anni sungthu a buoi lei nih. Anglo-Kuki Indo (Kuki Rebellion) chu kum 3 zet a aw nasan chu Kuki haiin an zalenna, indikna le chanvo an hmangai lei a nih, tiin thusuoka chun an hril.
Kum 1917 anthok 1919 chen khan an ram le zalenna suolin Kuki hai chun British sipai hai chu an indopuia, hrat naw lem hai sienkhom an ram chu lak pek an ninaw a, Kuki Lal hai inpelut hai sienkhom an ram chu an kutah ala um zing a nih, tiin a hril bawk.
Amiruokchu, Manipur-in India a zom hnungin Kuki ram chu hmang pek an ni a, Kuki haiin an ram tia an ko hi an thisena an i humhim, midangin India kuoma an pek hmang lem a nih, KSO thusuok chun a hril bawk.
“An ram ninaw sienla, harsatna namenlo tuokin British sipai hai chu ienglei inam indopui an ta?” tiin KSO chun zawna a siem a, “Kuki Rebellion” kha hienglai biela indona sawt pawl tak a nih, tiin an hril bawk.
Kum 1949-a “Merger Agreement” ziek dodal dingin Manipur Reng venghimtu dingin Kuki Lal le a sipai 100 neka tam Manipur Reng In-ah sie an ni a, Rengpa thuhnuoia um hai vekin kha thuthlung kha ziek dingin an nor lem a nih, tiin an hril. Manipur phairuom mi hai vekin Manipur zalenna chu India kuoma pe hmang dingin an nor lem kha a nih, tiin an hril bawk.
Kuki le Naga indona suktawpna ding le ralmuongna a um theina dingin Tamenglong le Ukhrul district huom sunga Kuki khuo tam tak hai rausan a ni a, muongna le inremna umna ding chauhin an i rausan khuo hai chu an inchu nawk naw lem a nih, tiin KSO thusuok chun an tarlang bawk.
KSO chun DESAM-in Kuki mipui hai chu ram pathum – India, Burma le Bangladesh – mi anga ṭhedar an tum chu an dem hle a, “reserve forest” hmun an del tia an intum khom an dem hle bok a, “Old Kuki” le “New Kuki” a Kuki hai ṭhehran an tumna a nih, tiin an dem bok a nih. “Reserved Forest Act” hi sorkar-in lekha ziek le tiem theilo Kuki Lal hai ram lak pek tumnaa siem a ni lem, tiin an tarlang bawk.
An thusuok chun, “DESAM-in Moreh chu Madrasi/Tamil hai ta anga inkawktir an tum mani? Madrasi hai chu Moreh hluo hmasataktu nia an pom chun ni raw seh,” tiin zawna an siem bawk.
KSO chun, hnam chitin ram op le huom sung seng hai chu inzaton pek seng dingin an ngen nghal bok a nih.
