MTA-in kohran inzomkhawm danding an buoipui

Aizawl, June 2, 2014: Mizo Theological Association (MTA) chun thusuok siemin, an thiltum laia pakhat – Mizo Kristienhai inpumkhatna le thoktlangna sukhrat chungchang a buoi pei a, MTA silver jubilee project – Mizoram Kohhran Council - MKC (Council of Churches in Mizoram) indin chungchang khom an bawzui pei niin an tarlang.

MTA chun, MKC indin tuma hma an lakna-ah kohran ṭhuoituhai an rawn tah thu hrilin, kohran ṭhuoituhai khomin thil poimaw tak nia an hriet thu le fepui pei ṭha nia an hriet thu an lo hril niin an hril.

MTA-in an thusuok a chun, “Pathien ring nuom nawna le sakhuo dang hung lut peiin, hrattakin kan hnam a run mek lai hin Kohran hai kan ṭhangtlang theina dinga inlang chu mani kohran nina hlaw kher loa thawtlangna le rorelna inkhawmpui (forum/council) nei a nih,” tiin an hril.

Hung tlung ding June 30 khin MTA huoihotna hnuoi-ah MKC indin chungchang hriltlangna buoisai tum a ni a, hi hriltlangna huna ṭhang dingin Mizo kohran laia pasari hai chun palai panga neka tlawm lo tir seng dingin a ngen bok a nih.

MTA-ah hin president chu Rev. Dr. Vanlalchhuanawma (Presbyterian Kohran) a ni a, secretary chu Rev. Dr. R. Zolawma (Baptist Kohran) a nih.