Hi lawmpuina le chawimawina hun a hin Aimol Baptist Association-a executive secretary Rev. Semi Serto chun Baibul-a Deuteronomi 28:2 “LALPA in Pathien thu in zăwm chun hieng malsawmnahai hi in chungah vûr a ta, chu chun zui pei a ti chêu” besanin thuhrilna hun a nei a, Pathien le kohran ṭhuoituhai malsawmna chu MCS officer thar chunga hin a vur bok a nih.
Hi huna hin hmun hrang hranga um Aimol hnama officer lien hai bakah, kohran le khawtlang ṭhuoitu, khuo lal le inchuklai pawl ṭhuoitu tamtak khom an ṭhang bok a nih.
Mi dang dang anthok lawmpuina thucha ngaithlak a ni a, MCS thar S. Khupboi Aimol anthok khomin hlawtlingna a chang dan hai hrilna hun ngaithlak ani bawk.
S. Khupboi Aimol hi Manipur Civil Service Combine Competitive Examination 2013-a unreserved seat-a rank 9-na latu a nih. Ama hi Reserve Bank of India (RBI)-a khom Research Officer sin lo chel ta ani nghe nghe a; 2009 batch Indian Economic Service (IES) niin Planning Commission of India-a Senior Research Officer sin chel lai mek a nih.
