Assam-ah children’s library 100 hong ding

Guwahati, July 17, 2014: Kar hmasak Zirtawpni July 11 khan Barpara hmuna All Assam Students’ Union (AASU) district office Swahid Bhavan-ah AASU adviser Dr. Samujjal Kumar Bhattacharya-in Assam-a naupang hai ta dinga library hmasak ding hongna a nei.

Children’s library hongna hun a hin Dr. Bhattacharya chun Dr. Bhupen Hazarika chanchin inziekna lekhabu thawlawmin, “Hieng ang naupang library hi 100 dang Assam hmun hrang hrang-ah hong belsa ning a ta; rethei tak tak inchuklai hai, sum harsatna leia zirtirbu nei zo lo hai haw thei dingin ‘book banks’ khom district hrang hrang-ah siem ning a tih,” tiin a hril.

AASU president Sankar Prasad Ray chun, inchukna tieng Assam chu India ram pum huopin State dang hai nekin a hnungtol thu a hril a; general secretary Tapan Kumar Gogoi chun, “Tulai khawvel-ah inchukna ṭhanglo chun hma sawn thei an ta nawh,” tiin, lekha tiemna nunphung mipui hai lai tu a ngai thu a hril bawk.