Zani sun dar 11 anthok chawhnung dar 2 chen khan Assam-a tribal pawl hai chun Jantar Mantar hmuna inṭhungin, an thil ngen le inzomin placard le banner hai chawiin an khek a. Hieng tribal pawl hai hin Assam-a tribal land policy ennon ding le Assam land policy thar siem dingin sorkar an phut a; Assam SCs and STs (Reservation of Vacancies in Services and Post Act 2012 dan khom hmang dingin an phut bok a nih.
“Assam Land and Revenue (Regulation Act 1886-a Chapter X famkim nawna chu Assam sorkar le hnam ṭhenkhat haiin sor ṭangkaiin tribal hai ram tamtak chu an lak pek zo ta a nih,” tiin All Assam Tribal Sangha (AATS) general secretary Aditya Kaklary chun a hril.
Assam-a hnam changkang lem ṭhenkhat hai chu Scheduled Tribe (Plains) a zieklut tumna thu a khom an dodal hle thu hrilin, Register General of India (RGI) le National Commission for STs (NCST) hai ngei khoma ST-a zieklut dinga an i pomnaw hnung hieng Moran, Muttock, Koch Rajbongshi, Sootea, Tai Ahom le Tea tribe hnam hai chu Assam sorkar-in ST-a zieklut dingin India sorkar thlungpui kuomah rotna a pek chu an dem hle thu an hril bok a nih.
“Hieng hnam 6 hai hi sorkar-in ST nina a pek chun ST ni ta mek hai chan ṭhatna chu nasatakin a suksiet ding a nih,” tiin Kaklary chun a hril.
“Assam phairama um tribal hai chanvo le hamṭhatna suk khawlo le lak pek zawng nilo a Assam-a hnam dang hai chu ieng chanvo, humhimna le phalna khom pek ve an ni chun kan dodal chuong nawh,” tiin a hril bawk.
An thil phut le inzomi hin India prime minister, home minister le tribal welfare minister hai kuomah lekha an pek lut bok a nih.
