Thla hmasak June 27 khan Ricky nu Laimayum Khulna Sahni (k. 49) hin East Delhi-ah a thil inru pek tumtu mi 2 huoi takin a man a, police kuomah a pek lut a nih. A nu hi Manipur suok a ni a, Delhi-ah choreographer sinthaw a um a nih.
June 27 chawhnung dar 3:30 vel khan Kailash hospital Karkardooma anthoka an chengna in East Delhi-a Sadbhava Apartment tieng a kir lai bike-a chuong mi 2-in a rangkachak ṭhi an keithlak pek a; mel khat vel a hnot hnungin tuolsung mi hai ṭhangpuina’n hieng misuol 2 hai hi manin, police kuomah an inhlan a nih. Hieng misuol pahni Rashid Islam le Akram Islam hai hi police-in manin, Tihar jail-a intangtir mek an nih.
Misuol haiin Ricky an kap hun hi instructor sin a thawna hmun gym-ah bike-in a pan lai Nizamuddin hmun lai a tlungin helmet khum bike-a chuong mi 2 hai chun zuiin silai-in voihni an kap a; voikhat an kap thel a, voi hni an kapna a chun a malpui-ah an kap hliem a nih.
Police hai hrildan chun, misuol hai hi an bike chuongna’n an tlanhmang nghal a, Ricky chu an kapna bul hnaih laia Max Hospital-ah ṭhuoi nghal a ni thu a hril.
A nu thil tuok le inzoma Ricky hi kap a ni thu inzomna hrietchieng la ninaw sienkhom phuba lak tumna leia Ricky hi an bei khom a ni el thei thu police hai chun an hril a, kong hrang hrang anthokin sui a ni thu police hai chun an hril bawk.
Police hai chun IPC section dang dang hnuoi-ah thubuoi an ziek lut a, misuol hai chu man tumin suizui mek an ni thu ei thu lakna chun a hril.
Ricky hi Muay Thai, Wushu le Kick Boxing thiem Mixed Martial Arts (MMA) professional niin, national le international inelna a hai khom a ṭhang ta hlak bok a nih.
