JAC-in PM kuoma lekha an thelut a chun, tu taka Khuga Dam project ngirhmun an hril a; kum 1980-a Planning Commission-in Rs. 15 crore senga bawl dinga a ti Dam project hi kum 1983-84 khan ṭan a ni thu le kum 1986 October 3 khan khang hun laia Planning Commission deputy chairman Manmohan Singh-in lungphumna a nei thu hai an tarlang bok a nih.
JAC chairman Lalpu Hangshing chun, hi project hi kum 2004-a puong PM Special Accord-a inṭhangtir nisienkhom enkolna sin thawtuhai zirnaw leiin project bawl zo vat thei loin a um thu a hril.
Project zo vat a ninaw leiin a bawlna ding sum bituk zat khom ennon niin, kum 2011 October 3 khan State PIB le CWC chun Rs. 434.65 crore a bawl zo dingin an remti nawk thu memorandum thelut a chun tarlang a ni bawk.
Memorandum-in a tarlang pei danin, kum 28 sung O. Ibobi Singh ṭhuoina hnuoi-ah Manipur sorkar chun project sin 70% zofel a ni thu hrilin mipui an hlem let der thu an tarlang a; kum 2010 November 10 khan Sonia Gandhi-in project chu hmang thei a ni tah, tiin a tlangzar thu an hril bok a nih.
Khuga Dam project hi meivar 1.5 megawatt her suok thei ding le Churachandpur-a leilet ram hektar 15,000 hai tui pe theitu dinga riruong a ni thu khom hrilin, project hi hmang thei dinga hong ni ta sienkhom a thiltum le riruong dan angin tu chen hin meivar a hersuok naw bak-ah leilet le CCPur mipui hai tui a la pek thei naw zing thu JAC chun PM kuomah an soisel bok a nih.
Mipui hmakhuo ngaituona leiin Congress ṭhuoi State sorkar le sorkar thlungpui kuomah voi iemanizat sorkar-in tuolsung contractor hai kuoma a sum bat pe tla dinga an nor thu hrilin, tu chenin uksak a la ninaw zing thu an intlun bok a nih.
Khuga Dam JAC member Thanga chun IFP report-in sorkar-in contractor hai sum a i bat hai chu pek fel a ni thu an hril chu contractor mi ṭhenkhat chauh an ni a, tuolsung contractor hai pek an la ninaw thu a hril.
JAC chun Khuga Dam chungthu le inzom hin PM le thuneitu minister an inhmupui hma khat Delhi-ah umhmun an khuor ding thu an hril bawk.
