Nicolas ruong hi zanikhan Police le Doctor han a ruong umna hmuna postmortem thawin zani ma khan B. Vengnuom thlanmuolah a ruong hi vuiliem a nih. Nicolas nuhmei Ng. Paukhanching@ Chiching in a hril dan chun, Zani hmasa
(July 28, 2014) zan dar 7 vel khan ka pasal Nicolas Bodyguard Mr Mangkhum s/o Tungin of Songtal (Thanlon Sub-Division) khawlai lengsuok chu a hung intak deu ta leiin mobile phone hmangin kan biekpui a, a umna indawnin, zan a sawt ta leiin In hung inlawi ta dingin ka ko a, sienkhawm Mangkhum chun New Bazar-a bu fa le thingpui dawna la um a ni thu hrilin a hung inlawi vat ta ding thu a mi hril a. Zan dar 11PM velin Mangkhum chun Gate bula a um thu le Gate hung hawng pek dingin SMS hmangin a mi hung ko a. Chuphing leh ‘Khum’ tiin Gate chu ka hawng a, Gate ka hawng charin pasal pathum gate sunga inrang takin an hung lut nghal a, pakhat gate bulah a ngir a, pakhat chun AK silai leh chuktuoin,ka khek chun kap hlum dinga mi vauin a mi mandet tlat a, pakhat chu insunga lutin ka pasal Nicolas chu a va kaphlum el niin Chiching chun a hril. Hi thil an thaw zo hin an gate bula ngirzing Gypsy var-a chuongin an tlanhmang nghal niin a hril bawk.
Hi thil tlung huna hin a pasal Nicolas le a naupa hai chu an in ta a, ama (Chiching) ruok chu Mangkhum la nghaka la zal lo a ni thu Chiching chun a hril. Nicolas le a nuhmei hin nau nuhmei 3 le nau pasal pakhat kum 5 mi vel ding Class B inchuklai an nei mek a nih.
Zani zingkar khan KBC Central Church, B. Vengnuom hmalaknain Nicolas ruong sunna hun hmang a ni a. Hi huna P.S. Hangshing, President le C-in-C, KNO/ZRF in thu a hrilnaa chun, Nicolas in a thisan a nauhai chu Class X (pawl 10) an inchuk chen a thlawna a chawm ding thu le Nicolas nuhmei Chiching khawm thaw ding dang a neinaw chun Imphal-a a school-ah a sinthaw ding a ngaituo pek ding thu a hril.
Hi tuolthatna tlung zan ma hin Army le Police han a hmuna thil umdan an va enfel nghal a, Police chun Nicolas ruong bula hin AK silaimu kapruoksa 6 le 9mm Pistol mu kapsa 1 an hmu a. CCPur Police chun hi thina thua hin FIR No.80(7)2014 CCP-PS U/S 400/302/34 IPC & 25(1-C) Arms Act an registered.
ZRF Defence Director kap hlum a nina le inzawm hin zanikhan Tuibuong area –a Dawr le bazar hai chu a sunna le inzanain a ruong vui hma po khar an ni a, a ruong vuiliem a ni hnungin nidang ang bawkin dawr le bazar hai hawng nawk a nih.
Nicolas a bodyguard Mangkhum hi khawlam a um ti hriet a ni nawh.
July 25, 2014 zan khan CCPur District-a hmun pahni haia tu ti hriet lo hai that mithiruong 3 hmu a lo ni ta bawk leiin ni 4/5 sunga CCPur district-a mi 4 that an nina a ni tah.
