NeLICS hotuhai chun zani khan Aizawl Press Club-ah thuthar lakhawtuhai an inhmupuia, an chairman Zawmsanga-in mani le mani inthat zat an sinsie hai a hril. NeLICS sinsie danin, tu kum January-June inkar-ah mani inthat pasal 36 le nuhmei 17 (a rengin 53) an um a; kum 2013-ah chun Junuary-June thla sungin pasal 15 le nuhmei 7 (a rengin 21) an um a nih. Thla 6 sunga mani le mani inthat hi kum 2013 nekin 2014-ah mi 32-in an tam lem a nih.
Tu kum January-June thla sunga mani le mani inthat chu kum 15 hnuoi tieng mi 3, kum 15-25 inkar mi 31, kum 25-45 inkar mi 17 le kum 45 anthoka a chung tieng mi 2 an nih.
Zawmsanga chun, NeLICS chun kum 10 sung Mizoram-a mani le mani inthat chungchang an buoipui tah thu hrilin, inthat tum mi iemanizat an sansuok tah niin a hril bok a, “Inthat tum le inthat nuomna lungril put hai chu ṭhalai lungril tienga harsatna tawk an ni deu tak,” tiin a hril.
Zawmsanga chun, nu-le-pa thuawilo ha’n lungril tieng harsatna an tuok nasa hle thu hrilin, “Sum thienghlim loa chawm seilien nauhai nun chu suolin a tawk sie nasa hle ti ei hriet nuom naw fo hlak,” tiin a hril.
Information technology-a hmasawnna chu ṭhalai tam takin an hmang thiemnaw leiin an nun a buoi pha ṭan niin a hril a, “Suolin an nun-ah thiemna insang hmangin sin a thaw thei ti nu-le-pa ha’n ei hriet a hun ta hle a nih,” tiin a hril bawk.
