Metropolitan Magistrate Ashok Kumar chun thiltlung chu “road rage” le inzom niin a hril a, tuolthattua intum Azad Chaudhary (k. 24) chu July 24 sung police haiin zawna an indon theina dingin kol dingin a phal pek a nih.
Magistrate chun, “Police haiin nikhat sung kol dinga ngenna an siem chu ka hmu a, phalna pek an ni a; tuotthatua intum hi July 24-ah court hma-ah inlangtir nawk ni raw seh,” tiin a hril.
Police haiin Azad Chaudhary-an kol theina ding phalna an ngenna a chun, tuolthattua intum pakhat dang Lokesh chu a tlanghmang leiin Chaudhary kuoma inthokin a chinchang hriet a ni theina dingin kol a ngai thu an tarlang a nih.
Chaudhary hi Garhi khuo a um, motor khaltu driver a ni a, Naga tlangval thatna le inzomin zani khan police haiin an man a nih.
Akha Salouni thattua intum 3 dang – Shakti Basoya (k. 21), a cousin Sanjay Basoya (k. 24) le Rajiv (k. 25) – hai khom man an ni ta a, July 24 chen police hai kol dinga ti an ni bawk.
Police haiin court kuomah an hrildanin, CCTV ṭhangpuina hmanga an i man tuolthattua intum Chaudhary inpuongna anthokin mi pakhat dang khom tuolthatna-ah hin a ṭhang ve tiin a hril a nih.
Police hai hrildan pei chun, Kotla Mubarakpur veng sunga CCTV sie anthoka inlangdanin tuolthattu laia ṭhang pakhat chun Akha Salouni ring chu puona rekin, boruok-ah a then vir niin an hril. Hi zo hin hnuoia namde-in an kut le ke-in an vuok hron a nih, tiin police hai chun an hril bawk.
