NCHAC employees’ union-in ni 2 sung nuorna nei ding

Haflong, July 15, 2014: Hung tlung ding July 16-17 sung khin NC Hills Autonomous Council Employees’ Union (NCHACEU) hai chun tu kum January thla anthoka thla 7 sunga an hlaw pek an la ninaw chungthu le an thil phut 4 dang hai sukpuitling a ni theina dingin nuorna nei an tum.

Union ṭhuoituhai chun NCHAC thuneituha’n an thil phut an sukpuitling nghal naw chun ni 5 sung an sin an chawl ding thu an hril bok a nih.

Kar liemtah Inrinni July 12 khan NCHACEU president Himanshu Bathari inrawina hnuoi-ah inṭhungkhawmna neiin, nuorna hi thlamuong taka nei dingin an rel a; inṭhungkhawmna a hin NCHACEU secretary M. Kemprai, judge A. Jeme, joint secretary D. Daoplagupu, Ms N. Hrangchal le mi dang dang an ṭhang a, district hmun hrang hranga Council sinthawtu 100 chuong an ṭhang bok a nih.

Voi iemanizat council thuneituhai dawr ta hai sienkhom tu chen hin council sinthawtuhai hin tu kum January thla anthok an hlaw le sum dang dang lak ding an la dong naw zing leiin harsatna namen lo an tuok thu an hril a, a ṭhen lem chun hmun danga an nau lekha inchuk a um hai khom an chawm sunzom thei naw leiin an ko kir pha hiel tah niin an hril.