Inhmukhawmnaa hin executive member 3 ruot nghal a ni a – president dingin T. Romeo Hmar, secretary dingin Mina Toko le treasurer dingin Ezekiel Debbarma; committee member dang hai khom ruot belsa pei an ni ding thu ei thu lakna’n a hril.
Hi trade union hin National Capital Region (NCR)-a sinthawna nei harsatna tuoktuhai enkoltu dinga ti a nih. Hnam inthlier hrangna, nuhmei-pasal poitawkna, hlaw a huna hmulo hai le buoina chi hrang hrang tuoktuhai chu hi union hin a ngaiven hlak bok dinga ti a nih.
India hmarsak anthok Delhi tlanga sinthaw an tam pei a, mani a sumdawngna chi hrang hrang thaw khom an pungpei bok leiin buoina tuok khom an pungpei a, abikin BPO le retail-a sinthawtuhai mumal taka hlaw hmulo dam an um nuol hlak leiin mi tlawmngai iemanizatin Labour Court inhmupuiin, Labour Court tienga hai chun, "Trade Union dam in nei naw chun ṭhangpui rak dan a umnaw a, Trade Union indin phot unla inbuoina hai-ah ṭhangpui thei kan cheu," ti thurawn an pek leiin thla hmasak July 28 khan Indian Social Institute, Lodhi Road-ah inṭhungkhawmna hmasatakna nei a nih.
