Hi hun a hin khuollien-in Pi Sherry Lalthangzo, IES, NEC Director (Planning) hmang a ni a, khuolzaum-in Pu David Neitham, APS, Asst. Inspector General of Police, Assam hmang a nih. Anni hai baka hin HSA General Headquarters-a inthawkin general president Pu Lalthlamuana Hmar, asst. general secretary Tv. Simon L Infimate, info. secretary Tv. Lalremlien Neitham haiin an uop bak-ah Shillong-a inthawkin HYA president Pu Rohminglien Buhril, IFS le Shillong HSA president Tv. Brando H Keivom le a member chanpui ṭhahnem tawk takin an ṭawiawm bok a nih.
Hi hun hi hun hnia ṭhein, hun khatna-ah Freshers' Social Meet hmang a ni a, hi hun a hin Guwahati hmuna lekha inchuk dinga hung thar hai lawmlutna le ṭawngtai pekna hun hai nei a nih. Inchukna tienga thawṭha bik mi iemanizat hai kuoma chawimawina thilpek inhlanna nei a ni bawk. Mr le Miss Freshers thlangna nei a ni a; Mr Freshers dingin Tv. Lalsakrung Infimate le Miss Freshers dingin Nk. Gloria Khawlhring hai thlang an nih.
Hun hnina hi HSA Platinum Jubilee lawmna hun a hmang a ni a, hun hmasa tieng Pu Lalringum Sanate, Chairman, Organising Committee in mikhuolhai le mipui fekhawm hai lawmlutna hun a nei zoin mipuiin Platinum Jubilee le inzawmin a ruolin Pledge hrilna nei a nih.
Kuollien Pi Sherry Lalthangzo chawimawina thilpek inhlan a ni zoin thuhrilna a nei a; Pathienin kut-le-ke a mi pek senga, hienghai hi ei hmang ṭangkai theina dingin ei nitin nun Pathien kuoma inhlan a pawimaw zie hai a hril. Khawvel-ah limit a umnaw thu le student hai ṭhang la nasa nawk zuol dingin khuollien chun an fui bawk a nih. Hi bak a hin inchuklai haiin hmathlir neia hun hmang ding le hun hmang thiem dingin an fui a, tulaia ei buoina tak chu educated unemployed ani tak leiin hrietna chauh ni loin skill development a pawimaw, tiin a hril. Taima taka sinthaw/lekha inchuk chun khawvel hi ei ta a nih, tiin inchuklai hai le mipui fekhawm hai kuomah a hril a, inchuklai hai inchukna tienga buoina le harsatna nei hai ta dingin a theina kawng kawnga ṭhangpui dingin an pei zing thu a hrilsa bawk a nih.
Hi hun a bawk a hin khuolzaum Pu David Neitham-in thuhrilna neiin tumruna nei ding le sinthawna a hai khawm a lu-lawk tak ni tum seng dingin a hril a; State le central sawrkar a sin hai hi vai hai ta ding chauh an naw a, tumru takin Pathien hre zingin ṭhang lak a ṭul zie le infuina thucha ṭha tak tak a hril.
Anni hai baka hin Special Invitees haia inthawk khawmin thu ṭha tak tak ngaithlak a nih.
HSA Guwahati Joint Headquarters-in Platinum Jubilee Souvenir a buotsai "ROHLU" ti chu khuollien-in tlangzarna a neia, mipui hai lai Rs. 150-in zawr nghal a nih.
Mr le Miss Platinum thlangna nei a ni a, Mr Platinum dingin Pu Ramditum Ralsun le Miss Platinum dingin Nk. Eunicky Lungṭau hai thlang an nih.
Platinum Jubilee le inzawma Guwahtai Joint Headquarters-in Lucky Draw a thaw chu results puongna nei a ni a, lawmman dawngtuhai chu 1st Prize (Hero Maestro)- Lalhmingmawi Infimate, 2nd Prize (LCD TV)- Tv. John Hekte le 3rd Prize (Refrigerator)- Pu Ropuithang.
Guest Artistes - Hmar nauhai laia khawm inlar tak tak Lalsanglien Zote (Hai re hai), Rosy Vanlalhlani (Sinlung Documentary), Kim Pachawn Infimate (Delhi Nunghak hlasakthiem), Tv. Buonga Zate (U Amitab or Mawngsawp a fe ding) le Local artistes hai chun mipui fekhawm hai chu rimawi-in an inawi hne hle bawk a nih.
Ruoi inhnik tawk tak el ṭhe in hlimtlang taka hun hi hmang zo a nih.
