Petrol/Diesel lak thei ding zat bituk a siem

CCPur, August 23, 2014 (HT): Assam le Nagaland ramri buoina le inzawma Nagaland economic blockade thaw khum a ni leia thautui thua harsatna um mek le inzawma mipui haia inthawk complaint um leiin Mr P.K. Jha, IAS, DC, CCPur chun, thu thar umnawk hma khata dingin CCPur District-a motor neitu han Petrol (MS) le Diesel (HSD) an lak thei ding zat bituk a siem.

District Administration in motor neitu han Oil Pumps haia Petrol/Diesel an lak thei ding zat bituk siema Order an suo dungzui hin, Heavy (Truck/Buses) han nitin Diesel (HSD) litres 40, LV Tractors & LV 4 Wheelers han Diesel litres 20, 3 Wheelers han Petrol (MS) litres 10/Diesel litres 10; LV 4 wheelers han litres 20; LV 2 wheelers han litres 10 ning a tih.

Hi Orders hi khau taka hmang ning a ta, nitina thautui hungtlung le stock postion chu DSO/CCP kuoma report an pek zie ding a nih tiin Order chun a hril. CCPur khawpui sunga chun Oil Pumps pathum- M/s Suakhnun & Sons, Bijang; M/s Lamka Filling, N. Lamka le M/s Tuibuong Service, Tuibuong CCPur hai an um.