Kar hmasak Ningani khan Kulikawn le Ngaizel inkar lai Pseudoephedrine damdawi khesa kg 327 zeta rik le damdawi tolruka inhnamhnoi nia intum Hrangthanzauvi (30), S. Laldinliani (30), Zoliansangi (38), Lalrinsangi (41), motor driver Lalruatthanga (30) le S. Lalrinthanga (27) hai chu man an ni a, a zing-ah zirtawpni khan mi 2 dang MYC member Lalremsangi Fanai (36) le motor neitu MPCC spokeperson Lalrozara hai chu Police-in an man hnungin an chungah thubuoi siem pek an nih.
Police chun inrinni zan khan damdawi an manna kudam neitu MYC member Lalremsangi Fanai In, Upper Republic-a le Falkawn-a mi hai bakah Millennium Centre-a a dawr an dap nawk a, damdawi man bel ruok chu an nei nawh.
Zani khan Kukikawn YMA chun an veng sunga dawmdawi khesa man ani hi sui chiengin hieng damdawi an man na hmunhai vel an dap nawk a, pseudoephedrine ni ngeia hriet khesa iemanizat dehawn ta hnung an hmu a, Kulikawn police hai inhriettirin Kulikawn police hai chun evidence dingin kg 5 rutin, a dang po chu Fire dept. hai motor hmangin tuiin an phu zop vong a nih.
Damdawi phurna motor Bolero neitu le damdawi tolruknaa inhnamhnoi nia intum Lalrozara chu damnaw leia man ve a ninaw hnungin zani zingkar khan man a ni a, a ukil hai ngen angin zani khan Aizawl Civil Hospital-ah a hriselna endik niin, a chungchang ngaituotu Magistrate chun jail-a thon le thon naw ding chu Court insang lem Special Court thu ani leiin thuthlukna a siem thei naw thu hrilin, zani zantieng khan Central Jail-ah a thon ve ta tho a nih.
Zani ta Central Jail-a sielut mi 7 hai hi Narcotic Drugs and Psychotropic Substances Act 25(A) hnuoi-ah thubuoi siem pek an ni a, thiemnaw inchangtir an ni chun rinum takin kum 10 sung lung in-ah intang an ta, Rs. 1 lakh chen inchawitir ning an tih. Ni 14 sung Jail-ah um phot dinga ti an ni a, thla thar May 2 khin Court-ah ṭhuoi nawk ning an tih.
“Khehpuam” damdawi tolruknaa inhnamhnoia intum MPCC spokesperson Lalrozara chu inrinni khan MPCC president kuomah inbanna lekha thelutin, damdawi khe chungchang-ah a motor hmang ani thu le Mizoram Congress sorkar khingtu political party hrang hrangin media fethlengin a hming chu party beina’n an hmangna thu hai, hi thil a hin a hming a fihlim hma chu party-a a nina po po chu hlip pek dingin ngenna a pek a, an banna hi MPCC president Lal Thanhawla chun a pompek nghal nia hril a nih.
Hienglai zing hin MYC member Lalremsangi Fanai khomin MYC member a nina anthokin inbanna lekha thelutin, an banna chu pompek ani thu MYC chairman anthokin thu dong a nih.
Excise & Narcotics Deptt. sinsie dungzuiin, an department chun kum 2013 April 1 anthoka tukum March 31 inkar sung khan Mizoram-ah pseudoephedrine mum 1,03,39,648 an man taa, damdawi neitu mi iemanizat man an ni bawk. Police tieng khomin tam tawk tak an man ta bawk a nih.
Loading....