MNF-in Rev. Chanchinmawia thi san hrilfie dingin Mizoram sorkar a phut

Posted by Lalremlien Neitham

Henry L. Khojol Hmar

Aizawl, April 30, 2014: Mizoram-a eptu pawl Mizo National Front (MNF) chun October 1, 2007-a mi tu hriet loa that ni a ring Rev. Chanchinmawia thina san hrilfie dingin Mizoram sorkar thuneituhai a phut.

April 29-a MNF thusuokin a tarlang danin, April ni 23 khan Mizoram Pradesh Congress Committee (MPCC) chun thusuok siemin, Rev. Chanchinmawia chu Mizoram-ah MNF a sorkar lai October 1, 2007 khan Mizoram chief minister hlui Zoramthanga inthattir angin a tarlang a. Sienkhawm Rev. Chanchinmawia that ani lai khan Zoramthanga chu India hmarsak state chief minister hai inkhawmpui lien hmangin September 28 anthawka October 5, 2007 chen khan Bangkok, Thailand-ah a cham hmang, ti MNF thusuok chun a tarlang.

MPCC media press release-in a tarlang dan chun, Zoramthanga hin Rev. Chanchinmawia an thattirna’n Lalhluna le Lalmuanhlua haiin Rs. 20 lakhs an phut hnungin Rs. 5 lakhs pe-a inrem ta angin le chu thu chungchang telephone-a an indawrna chu lo record vawng niin Congress Bhavan-ah an ngaithlak niin a tarlang a. Hi thusuok hi MNF chun dawnletin, Zoramthanga hin kha hunlai khan Lalhluna le Lalmuanhlua hai hi tum an ni a ti a hriet ngainaw hrim hrim a, a la biek ngai bawk nawh, tiin tuolthattu anga Zoramthanga intumna chu thil indiklo hulhuol a nih, tiin an hril.

MNF thusuokin a tarlang peinaa chun, Zoramthanga hin hi hunlai vela Mizoram chief minister ani lai khan cell-phone ala nei naw a, a hmang ngai bawk nawh. Chief Minister-in phone-ah mi a biek reng renghai chu telephone operator duty fethleng vawnga biek an ni hlak, tiin an hril.

Pastor that dinga thupek le an thattir man Rs. 20 lakhs anthawka Rs. 5 lakhs-a innep thlak thu le phone-a an indawrna lo record vawng nia intumna chu mi pangngai ta dingin thil awi harsa le khel muhlum ana, phuokfawm mei mei a nih, tiin MNF chun an thusuok-ah an tarlang bawk a nih.

“Hieng mei meia thu belchieng dawllo thedar an nuom chun iengleia Congress sorkar hin thudik hmusuok dingin a sui nawn naw?” tiin MNF chun Mizoram sorkar chu Rev. Chanchinmawia thina san sui chieng dingin a phut bok a nih.

Chief Minister Lal Thanhawla’n kum 2008-a press conference a neina-ah, “conclusive evidence kan nei ta leiin kan sorkar hunah Rev. Chanchinmawia thina chungchang sui kan tih,” tia thu alo intiem tah chu hlen ngei dingin MNF chun CM a phut bok a nih.