AMCH-a doctor inchuklai that thu le inzomin mi 1 kol mek

Guwahati, May 14, 2014: Hmasak laia Dibrugarh hmuna Assam Medical College Hospital (AMCH)-a doctor inchuklai nunghak pakhat that le inzomin zani zantieng khan Assam police hai chun gynaecology department-a inchuk ve tho pasal pakhat Dipmoni Saikia chu thu indonfie dingin Borbari police outpost-ah kol mek ani thu ei thu lakna chun a hril.

Dibrugarh SP Rana Bhuyan chun, Sarita Toshniwal thatna thu-ah Saikia hi thu indonfie mek an leiin an hnamhnoih le an hnamhnoih naw thu iengkhom hril thei ala ninaw thu a hril.

Zani a Assam DGP-in police haiin Toshniwal thatna le inzoma inhnamhnoih ṭhenkhat an hriet ta thu a hril hnung darkar tlawmte sungin Saikia hi a umna hmuna inthokin police haiin an va ṭhuoi a nih.

Hienglai zing hin AMCH-a inchuklai le junior doctor hai chun a ni 6-na dingin tiemchinlo nuorna an la nei sunzom zinga, health minister Dr. Himanta Biswa Sarma khomin ziek ngeiin an thil ngen chu sukpuitling dingin a pek taa, zani chen khan sorkar-in hma a lak tum dan nghak dingin a hril bok a nih. AMCH-a ang tho hin Gauhati Medical College and Hospital-a inchuklai le junior doctor hai khomin venghimna pek chungchang-ah tiemchinlo nuorna an nei mek bok a, voisun hi a ni 3-na a tling ta bok a nih.

AMCH vice-principal HC Kalita chun sorkar-in a sukpuitling ding hai chu inchuklai hai kuomah pek an ni ta thu a hril bawk.

Assam chief minister Tarun Gogoi khomin medical college-a inchuklai hai ngen angin sorkar chun hospital a hai venghimna pek a tum thu a hril a, Toshniwal sunghai kuoma zangnadawmna (ex-gratia) Rs. 5 lakhs pek ani ding thu a hril bawk.

Gogoi hril pei dan chun, medical college-a sin pangngai thawtuhai (casual worker) verification ṭha taka thaw theina dingin hma lak a tum thu a hril. AMCH thuneituhai khomin, contract-a sinthawtuhai hming hai chu police kuomah an pek ta bok niin an hril.

Mi ṭhenkhat hrildan chun, medical college-a sin pangngai thawtuhai hi hlaw tlawmte thlakhat-ah 2000-3000 vel chauh pek an ni hlak leiin ṭha takin sin an thaw ngainaw niin an hril. Kum iemanizat liemta anthok khan sorkar chun Grade IV sinthawtuhai sin hi sukdet loin ala sie zing nia hril ani bawk. Doctor inchuklainu thattu 'ward boy' Kero Mech khom hi contract worker niin a hnung le hma iengkhom suichieng loa sin pek ani thu hril ani bawk.

AMCH-a thuneituhai chun campus sungah venghimna khauh lem sie dingin an rel a, hmun hran hran-ah venghimtu sie a, lampuia hai meivar sie dingin an rel bok a, khaw ṭhenkhat anthoka campus sung lut theina hmun hai khom khar dingin an rel bawk a nih.