North East India Forum Against Racism (NEIFAR) ṭhuoitu David Boyes chun, “Hi thiltlung le inzom hin nuorna nasataka nei tum a ni a, tuchen hin police haiin NE inchuklai ṭhuoitu hai vaw hrontu man an la nei naw zing a nih,” tiin a hril a. “Vuok hrona um hai khom tuchen hin an la ṭi thawng zinga, him in an la'n ngainaw a nih. NEIFAR khomin hi thiltlung hi a dem tak zet a nih,” tiin a hril bawk.
Kar hmasak Ningani May 22 zantieng khan vai lawyer pakhatin Delhi-a Vishwavidya Metro station-ah Nagaland nunghak pakhat a soisak le inzomin Zirtawpni May 23 khan NE inchuklai ṭhuoitu pahni-in Naga nu chu Court-ah fepuiin Court hmaa an v'an lang puia, intum a um vai lawyer pa ruolhai lawyer ve tho hai chun Naga nunghaknu fepui hai chu ṭong ṭhaloa be-in court anthok an hnot suok bok a nih.
Nikhat laia Arunachal tlangval Nido Tania thatna chungchang thubuoi enzuitu NE nuhmei lawyer pakhat chun buoina a um ti a hriet le inruolin Tis Hazari court-ah tlan phei nghalin NE inchuklai ṭhuoituhai ṭhangpui a tum chu ama khom vai lawyer hai hin an lo ben bok a nih.
Vuok hron laia ṭhang ve, Naga Students Union Delhi (NSUD) president J. Mavio Woba chun, “Buoina suksuok tumin an mi cho phawt a, ka ruolhai kuomah donlet ve lo dingin ka hril a, Judge-nu ngei khom vai lawyer hai a chetdan hrepuitu a nih,” tiin a hril.
An ni venghimtu dinga tir police 6-7 vel hai khom hnot thlura an um an hmu ngei niin a hril a, “Lawyer mi 30 hon velin mi vaw dingin an mi hnot thlur a, inchuklai ṭhuoitu pakhat lem chu an vuokna a hliem nasa leiin damdawi-in chen tlungpui hiel a nih. Thiem changa kan um theina dingin BCI le Chief Justice kuoma khom lekha thelut ani ta nghe nghe,” tiin Mavio chun a hril.
NE ṭhuoituhai san dinga fe, advocate Liyi Marli Noshi khom lawyer pakhatin a ben a, “Court zakuo fuol ka hak leiin an chanpui advocate em an tawk ka ring naw a. Amiruokchu, NE nuhmei hai chungah tirdak um tak tak sak suokin na deuin an mi ben a nih,” tiin a hril.
Tis Hazari court-a advocate hai chun, an intumna chu thukhel ani ti hrilin, “NE nuhmei soisaktua intum lawyer chu bail suok dingin an insel buoi a, an thil min tum hi thukhel a nih. Lawyer hai chu bail dok dinga pungkhawm chauh an nih,” tiin Delhi Bar Association president RN Vats chun a hril.
Zinga nuorna hi DELHI NE COMMUNITY ti hming chawiin ITO bul BCI hma-ah sun dar 11 anthok nei ning a ta, nuorna hmuna fekhawmna dingin Bus khom ngaituo a ni a, Delhi khawpui vengbuk tin-ah dar 9 vel anthok innghak khawm ning a tih.
Loading....