Dental College indin dingin hma lak mek: Phunzathang

Imphal, May 21, 2014: Manipur health and family welfare minister Phunzathang Tonsing chun Jawaharlal Nehru Institute of Medical Science (JNIMS), Imphal-ah Manipur puola dental college hmasatak ding indin dingin hma lak mek ani thu a hril.

Zani khan Imphal Hotel-ah India Dental Association, Manipur Branch hai kum 25 tling lawmna hun nei a ni a, hi huna hin Phunzathang chu khuolliena ṭhangin, surgeon tlawmte ha'n Manipur-ah Indian Dental Association (IDA) ṭanin tuhin surgeon 135 velin an pungna thu-ah lawm um a ti thu a hril a, “Tu tak hin RIMS, Imphal-ah dental college pakhat a um a, State enkolna hnuoia ding JNIMS hmun-ah State Dental College indin theina dingin hma lak mek a nih,” tiin fekhawmhai kuoma chun a hril.

IDA Manipur Branch president Prof. M. Angouba Singh-in thuhrilna hun neiin, “IDA Manipur Branch hi kum 1989 khan Manipur sunga dental surgeon 20 chauh le ṭan a ni a, kum 1983 anthok khan senior dental surgeon enkolna hnuoia um ṭanin, tuhin dental doctor thar le Manipur State Branch hnuoia member hai bakah dental surgeon 135 zet an um ta a nih,” tiin a hril.

“Kum 25 sung hin dental surgeon hai enkolna hnuoia research tam tak thaw hlak a ni a; school, tuolsung club le Manipur hmun kilkhawr tak taka hai fe-in free dental health check-up le educational programme dang dang hai nei a ni hlak,” tiin Prof. Singh chun hril bawk.