Hmar martyrs football trophy final-ah Aijalon le Fast

CCPur, May 15, 2014: Hmar pasalṭha, hnam ta dinga fam lo changtahai hrietzingna “Hmar Martyrs’ Day” ni May 16 khin Hmar Martyrs’ Football Trophy final inkhelna chu Saikot playground, Churachandpur-ah nei ning a tih. Final a hin team dang po po hne a final inpet kai B. Aijalon le Fast (Rengkai) hai chun champion nina inchu’ng an tih.

Hi ni hin programme khom puithu taka hmang dinga riruong a na, khuollien-in Churachandpur ADC chairman Langkhanpao hmang ning a ta, khuolzaum-in CCpur ADC vice-chairman Demmang Haokip, hun keihruoitu dingin CCpur ADC EM Lalhossan ni bok a tih.

Hun hong ṭongṭaina Rev. Lalngailien Puruolte in a nei zo-ah, final inkhel en dinga fekhawmhai lawmlutna Sylvia Laldinmawi-in nei a ta, keynote address Lalhriet Famhoite, HSP president anthok ngaithlakna nei ni bok a tih.

Fiel bik khuollien, khuolzaum le hun keihruoitu hai anthokin thuhril tawi ngaithlakna hun khom nei ning a tih. Hnam lam inentirna HSA Saikot unit in nei an ta, Hmar hlasakthiem Elizabeth Sungte, Clerance Mawite le Jenneth L. Varte hai anthok hla ngaithlak ni bok a tih.

Khuollien in final-a inkhel ding hai inspection a nei zoin, hnam pasalṭha hai inzana’n silent prayer nei ning a ta, chuzoah final pet ṭan nghal ning a tih.

Hmar Martyrs Trophy Football voi 11-na hi thla hmasak April 16 anthok khan inkhel ṭan a nih.