Bandh huoihottuhai chun May 13 chen-ah an thil phut pathum hai Mizoram sorkar-in a ngaisak naw chun total bandh an huoihot ding an ti kha a nih. An thil phut hai chu – an rang thei anga National Highway 54 le 154 siem zo, Kolasib district sunga sorkar higher secondary school sie le Kolasib District Hospital-ah doctor hai ani dan anga sie hai hi a nih.
May 13 khan Kolasib DC chun bandh huoihot tumtuhai chu a office-ah thil umdan hrilfie dingin a ko a, NGO hai thil phut chu sorkar-in a ngai poimaw thu hrilin, Election Model Code of Conduction-in sorkar khuop tlat leiin MP inthlangnaa vote tla hai tiemzo hnung kar hni sung hun pe dingin a ngen a. MZP le NGO hai chun Kolasib DC ngenna chu hnawlin, total bandh chu an fepui ta tho a nih.
Kolasib DC-in NGO ṭhuoituhai a kokhawmnaa hin YMA le MUP ṭhuoituhai khom an ṭhanga, MUP aiawtu'n total bandh huoihot ani thu hi an hrietpui naw thu a hril. YMA sub-hqrs Kolasib aiawtu khomin NGO Coordination Committee-ah YMA chu chairman ṭhungna chel an leiin, an hrietpui lo thil fepui ani na thu-ah mak an ti hle thu a hril bok a nih.
Kolasib anthoka thu dong danin, bandh a hin Diakkawn, Rengtekawn le Thingdawl a hai duty sie an ni a, khawlaidunga duty hmun tam takah sie ninnaw sienkhom, inlirthei motor tlan a tlawm a, dawr inhong khom a tam naw a, buoina lien tham a suok naw niin an hril.
Bandh huoihottu MZP le NGO ṭhuoituhai chu zani khan an ṭhungkhawm a, sorkar anthoka thu lawmum an la dong naw leiin, an riruong lawk angin bandh chu voituk zing dar 5 chen nei dingin an rel a nih.
Loading....