Meeting-naa hin tulaia Assam le Mizoram ramri laia Assam thuneituhai chun ramri bula Mizo cheng hai chunga harsatna an siem pek hlak thu chu an ditnaw tak zet thu an thusuok chun a hril. Ramri thubuoi chungchanga Mizoram sorkar hmalak dan chu ṭha an ti tawk naw thu hrilin, hiengang hnam issue thil a hin Mizo po po ṭhangruola hma lak ṭha an ti thu an hril. Hi thu a hin tuta hnungin Mizoram-a party le NGO hrang hrang hai chu inrawn tlanga hma lak ni hlak sien, tiin an hril.
An thusuok siemnaa chun, Mizoram Congress sorkar-in sum le pai enkol an thiem naw leia nghawng ṭhalo tak Mizoram-in a tong mek – bufai man sukpung tum, tui le gas harsatna hai, electric man sukpung hai, development sinthawna tlawm em em thu-ah poi an ti hle thu an tarlang a, sum le pai enkolna kong-ah tuta neka nasa zuola ṭhang la dingin sorkar an phut bok a nih.
Rev. Chanchinmawia thina chungchang thu-ah MPCC media dept. secretary VZ Kaia-in press release siem a, MNF president Zorangthanga inhnamhnoi nia indiknaw taka an tumna chu suk muolpho tumna a ni, tiin, ṭha an ti naw thu hrilin, hi thu a hin a ṭul angin Court chena tlungpui an tum an hril bawk.
Pseudoephedrine, “Khehpaum” tia hrietlar, damdawi sumdawngna chu Congress sorkar-na hnuoi-ah hmun nasa takin a khuor nia hrilin, poi an ti hle thu an tarlang. Minister anthoka Congress party ṭhuoituhai chu hi sumdawngna bul tumtu taka an ṭhang hi hnam muolphona le hnam tluksietna bul a nih, tiin, khehpuam sumdawngnaa inhnamhnoi hai hi na taka hremna pe ding le hmun a khuor zuol nawna dingin Congress party anthoka ṭanin ṭhang la dingin sorkar a phut bok a nih.
Loading....