Tv. Joseph Lalrofel hi zanah call center a sinthaw hlak a ni a. A sinthawna company hi hun iemani chen a inthawk a lo thang ta ni a. Tu hnung tieng tieng hin an company hin belchieng a dawlnaw zie a hung hriet suok a, customer hai hlem kuol vel a sinthaw hlak an ni ti a hung hriet suok a. Chuphingle la thang sunzawm zing remchang a a hrietnaw leiin kar khat vel liemta khan a sinthawna a inthawk hin a bang a. Bang ta sienkhawm an company function dan (modus operandi) iengkim hretu a ni leiin company ta ding chun tri um tak pakhat chu a ni hrim a nih.
Tarik 04.06.2014 khan an company a inthawk phone call a dawng a, Office a hung la i hlaw la laklo hai hung la raw tiin. Chuongang tak chun ama khawm a timing pangai (zan) a chun phur deuin hlaw la dingin a fe a. Sienkhawm office a zuk tlung chun company neitupa chun Muscle man mi 4 lo ruoiin Joseph Lalrofel hi room pakhat a an hnaw lut a, a mobile phone an lak pek a, ieng hril hman lovin hmawlin an vuok hrawn nghal el a nih.
Iengtin tin amani room a inthawk a tlan suok a, chun main door chu puotieng a inthawk a kal nghal bawk. Sienkhawm tuolah a zuk suok chun Main Gate kha Tala-in an lo kal khap a ni leiin suok theilovin an tang a. Thangpuitu a ko a chu tukhawm an hung inlang si naw leiin step lai a glass um chu a pet kawiin risie a siem a. Chuong a glass kawi ri sawk sawk ri an hriet chun a bul hnai lai a vai hai chu an hung khawm a. Anni chu Police ko pek dingin a lo hril tawl a nih.
Joseph Lalrofel in thangpuitu a ko a, Police an hung ding a nih ti an hriet phingin Muscle Man hai chun anni sa himna ding tiin a thenin an phing, a thenin an kut an dam an lo inat pawp fawm vel a. Sienkhawm Police haiin “nangni mi lien le hrat taktak 4 zet el hih hi mipa te hin hienga a law thei dan cheu a um nawh” tiin an man vawng a, a tawp a chu anni insuk pawp fawm a ni thu an inpuong ta tho tho.
Joseph Lalrofel hi zankhaw var Lockup/ Hospitalah a um a. A phone an lak pek ta lei khan tu number khawm a lo by-heart naw bawk le tukhawm thangpuitu ko thei lovin a khatin a tuor a. Police haiin FIR an thaw a, FIR chu Hindi tawng vawnga inziek a ni leiin Joseph chun a umzie iengkhawm a hriet nawh. Sienkhawm makhat chauin na tuor a Lock-up a um zing chu remchanga a hriet naw leiin FIR a chun a hming a signed a, chuongchun a zing (05.06.14) chawhnungtieng khan a kut plaster a intuom pumin ama le ama a hung kir nawk a nih.
Hi hnung hin DHWA/Valupa hai Hari Nagar Police station a va fe-in FIR chu an va en fie a. SC/ST a ni lei a suknawmnat a ni thu la va belsa. Sienkhawm hi hun a hin a lo vuotu muscle man hai kha bail in an lo insuo nawk vawng tah.
Chun, Joseph hi In a hung tlung hnung hin a kut X-Ray la lak tha nawk a ni a. Plaster-in lo tuom ringawt hai sienkhawm a kut ru thliek kha a ru le a ru khawm lo chuktuo lo hrim hrim niin. Vawisun hin POP thaw that ding a an ti kha a na. MLC a ni leiin hospital danga hang thaw kha a rem bawk nawh. Vawisun hin DHWA Secretary Pu M.Keivom a rawiin DDU Hospital a bawk va fe in tuhin a buoipui map map lai tak a nih.
Hi buoina chanchin hi zani khan Hindustan Times le national newspaper dangdang a hai khan a suok a, Joseph hin office a loan a lak a, a rul theinaw lei angin an ziek. Sienkhawm hihi khel let der a nih. Joseph hin loan a lak naw a, an office khawmin loan an pek ngai bawk nawh.
Hindustan Times an ziekdan lo tiem nuom hai ta dingin June 8, 2014; Page No.2 a khan a um.
Loading....