Lirthei chesuolna-ah Union minister thar thi

New Delhi, June 3, 2014: Narendra Modi keihruoina hnuoia India sorkar thar-a Ministry of Rural Development (MoRD) minister Gopinath Munde (k. 64) chu voituk dar 6.30 vel khan Mumbai-a vuong ding Delhi Airport pana fe, lampui-ah a motor a chesuol leiin lungphu chawlin a thi niin ei thu lakna chun a hril.

Munde hi accident hmun anthokin AIIMS hospital-ah ṭhuoi phei nghal nisienkhom doctor ha’n san thei ta loin zing dar 8 vel khan a thi a nih. Munde hin a nuhmei le nau nuhmei pathum – pakhat Maharashtra-a MLA nilai mek – a boral san a nih.

BJP hotu Nitin Gadkari hrildan chun, Munde hi diabetic nei a ni a, venghimtu ha’n zui hai sienkhom a car chuongna hnungtieng a khatin a ṭhung a, car chetsuol leiin a tet dok niin a hril a; na takin hliem sienkhom ala har a, hospital-a ṭhuoi dingin a ti niin a hril.

Munde hi BJP hotu hlun, ṭum 5 lai Maharashtra-ah MLA-a thlangtling, ṭum 2 lai MP ni bok a nih. Kum 1992-95 sung khan Maharashtra Legislative Assembly-ah eptu pawl hai hotu a ni a, kum 1995-99 sung khan Maharashtra deputy chief minister sin a chel bok a nih. Hmasak laia Narendra Modi’n India sorkar-na a siem khan, MoRD minister sin pek ani nghe nghe bok a nih.

Munde ruong hi post-mortem thawzo ani hnungin BJP party headquarters ah ṭhuoi ning a ta, chuzoah an khuo Maharashtra-a Parli-ah raw ning a tih.