AGP president Mahanta inban

Guwahati, July 16, 2014: Assam-a tuolṭo party, Asom Gana Parishad (AGP) president Prafulla Kumar Mahanta chu kum 2 sunga Assam-a inthlangna-ah an party hlawsamna chu a mawphurna-ah la-in Thawṭannni khan party central executive committee inṭhungkhawmna-ah party president a nina anthok inbanna lekha a thelut.

Assam-in kum 1979-85 inkara Bangladesh mi Assam-a hung inpemluthai dodalna nasa taka an bei hnungin kum 1985 khan AGP indin a ni a, kum 1985 le 1996-a Assam assembly inthlangna-ah hnena changin, sorkar-na an lo chel ta bok a nih.

Kum 2001 Assam assembly inthlangna-ah Tarun Gogoi-a keihruoi Congress party chun AGP chu nasa taka hne banin, hi hnung hin AGP party ngirhmun chun ngai a aw thei ta naw a nih.

Central executive committee inṭhungkhawm nei zo hin Mahanta chun, Lok Sabha inthlang nuhnung taka party che siet nasan chu a mawphurnaa la-in, an banna a thelut thu a hril a, president nina chu working president Atul Bora kuomah a'n hlan fel nghal thu a hril bawk a nih.

Assam chief minister ṭum 2 lo ni tah Mahanta chun party ta dingin ringum taka thok sunzom pei a tum thu hrilin, Assam assembly-a MLA a nina anga a mawphurna hai thaw sunzom a tum thu a hril bawk.

AGP hin tu kuma Lok Sabha inthlangna-ah Assam puola seat 14 um-ah seat 12-a dingin candidate an ngir tir a, seat pakhat khom a chang naw a nih.

Party fe pei dan ding chungchang thu-ah Mahanta chun, party sunga ṭhuoitu ṭha le inpe zo tak tak an um thu a hril a, thoktlangna ṭha taka hnuoi-ah party ngirhmun a'n chawi sang nawk ngei a beisei thu a hril bawk.

Party president anthoka inban dinga norna boruok ri hi kum 2011 state assembly inthlangnaa AGP-in seat 10 chauh a hmu lei khan a suok ṭan a nih.

AGP hotu hlun iemanizatin Lok Sabha inthlangpui nei hma’n party an lo suoksan ta bok a, hieng hai lai hin tuta Union Minister of State for Sports and Youth Affairs Sarbananda Sonowal khom a ṭhang bok a nih.