NCHAC chief executive member (CEM) Debojeet Thaosen inrawina hnuoi-ah NCHAC palai hai chun Gogoi hi an inhmupuiia, council-in kum khata sum a dawl suok chu Rs. 15-20 crore vel chauh an leiin, sinthawtuhai hlaw pekna dingin Rs. 50 crore vel bek a ngai leiin council sum harsatna thu an intlun.
“Kum dang khan development fund-a mi sum hai anthok sinthawtuhai hlaw ding sik thlak hlak a ni a, State sorkar-in chuongna thilthaw chu a khap ta si leiin council chun sinthawtuhai hlaw a pek thei ta naw a nih,” tiin executive member Kulendra Daulagupu chun a hril a, “Kum khat le chanve liemtah anthokin Assam sorkar kuomah sum ṭhangpuina pe dinga an ngen thu a hril bawk.
Hienglai zing hin council-a sinthawtu inzomkhawm hai chun January anthoka an hlaw an hmu ta naw chungthu-ah an lungawinaw inentirna’n kar thar Thawlenni July 15 anthok khin tiemchin umloin an sin thaw an sukchawl tum thu an puong.
Sixth Schedule hnuoia indin NCHAC hi Congress hai op mek a nih. Home le finance tieng bak-ah development tieng khom an enkol bok a nih. Kumtin Rs. 133-150 crore inkar sum ṭhangpuina an dong hlak a nih.
“Tuta sum tienga kan buoina sukfel dingin sum ṭhangpuina hi kan ngen a ni a; hieng ang buoina hi kum hluna a umnawna dingin Lower Kopili Power Project anthokin sum lak lut zat ding sukpung tum a nih. Hieng baka hin Railway ministry khomin ‘forest royalty’ an la pek zo lo Rs. 26 crore pe dinga nor mek an ni a; sum lak lutna sie hai khom ennon mek an nih,” tiin executive member Samuel Changsan chun a hril.
CEM Thaosen chun council sinthawtu inzomkhawm hai kuomah CM Gogoi-in sum ṭhangpuina pek an tiem leiin an nuorna nei ding chu ṭhul dingin a ngen bok a nih.
Loading....