Lok Sabha-ah TRAI Amendment Bill phar

New Delhi, July 12, 2014: Zanita Lok Sabha inkhawmna-ah National Democratic Alliance (NDA) sorkar chun Telecom Regulatory Authority Amendment Bill a phar a; hi bill hi Prime Minister Principal Secretary a dinga Nripendra Mishra ruotna lampui siemtu a ni leiin Congress le Trinamool Congress hai chun an dodal a nih. Aam Aadmi Party (AAP) khomin dan siem ṭhat tum hi dodal an tum thu an hril.

Telecom Regulatory Authority of India (TRAI) Act hnuoia hin TRAI chairman le member hai chu an sin anthoka an bang hnung-ah sorkar thlungpui le State sorkar hnuoi-ah sin an thaw khap pek an nih. BJP/NDA sorkar hin TRIA chairman hlui Nripendra Mishram chu PM Narendra Modo a principal secretary dingin a ruot a, nisienkhom, TRAI Act section 5(8) in a khap leiin hi dan hi siem ṭhat a tum a nih.

Mishra hi 1967 batch Indian Administrative Service (IAS) officer, Uttar Pradesh cadre a ni a; sorkar hnuoia department hrang hranga a thok hnungin kum 2006 khan TRAI chairman a dingin ruot a nih. UPA sorkar hmasa-ah khan Telecom Minister hlui Dayanidhi Maran hnuoi-ah telecom secretary sin a chel a, minister hlui bok A. Raja hnuoi-ah TRAI chairman a dingin ruot a ni bawk.