Manipur helha’n an nuhmei hai bank account hmang hlak

Guwahati, July 12, 2014: National Investigation Agency (NIA) hai suidan chun Manipur-a helpawl hotu hai chun dan loa sie an khon sum hai chu an nuhmei hai bank account hmangin an thon kuol hlak niin an hril.

NIA-a thuneitu pakhat hrildan chun, Manipur-a helpawl hai thubuoi an suina a inthok chun helpawl hotu ṭhenkhat chun an nuhmei hai bank account hmangin mi kuoma inthoka .an sie khon hai an inthon kuol hlak thu sui suok a nih, tiin a hril. Hi chauh hi niloin, an nuhmei hai hmingin in-le-lo le rothil dang dang an inchawk khawm hlak bok a nih, tiin a hril bawk.

A hril pei danin, sum hnar nei naw sienkhom Kangleipak Communist Party-Mobile Task Force (KCP-MTF) helpawl hai hotu Kesho Meitei nuhmei Luxmi Devi bank account a inthok chun lakh tel inthon kuol hlak a ni thu hriet suok a ni a; thu indon chiengna an neiin Luxmi Devi hin a sum lam lutna a hril thei naw a nih, tiin NIA thuneitu chun a hril.

Hiengang bokin, KCP (Military Council) hotu Lanheiba Meitei nuhmei Amita Sinha khomin India khawpui hmun hrang hrang-ah a hmingin bank account 6 zet a nei bok a; Bangladesh ram-ah a account pakhat anthok sum lak suok a ni bok a nih, tiin NIA thuneitu chu a hril.

“Hi hin a bank account-a sum chu a pasal ta a ni ti a sukchieng a, a pasal chun sum hai hi helna dinga a hmang hlak a nih,” tiin a hril.

Helpawl hotu hai chun dan loa an sie khonna hlak hai kuomah bank account an i pek hai-ah sum sie lut dingin an hril hlak a, chuong sum hai chu an lak suok annawleh an bank account a hai an thon kuol nawk hlak a nih, tiin a hril.

“Luxmi Devi hin Siliguri le Imphal a hai ram an chawk a, Guwahati-ah ke 10 nei motor le Nepal-ah Hondo CR-V an chawk bok a nih,” ti a hrilin, “SUV chu Nepal police hai kut-ah hrentang mek a ni a, India-ah hung chawi kir tum a nih,” tiin a hril bawk.

KCP-MC helpawl hotu nuhmei Luxmi Devi hin lekha poimaw hieng EPIC, PAN card, driving licence, ration card lem hai a siem hlak ti NIA chun chieng takin an hriet bok thu a hril a. KCP-MTF le KCP-MC hotuhai nuhmei 2 hi NIA chun la man naw sienkhom, an lak-ah Guwahati-a NIA special court-ah chargesheet thelut a ni ta thu NIA thuneitu chun a hril.

“NIA special court-in thiemnaw an changtir chun damsung lungin intang dingin hremna pek ning an tih,” tiin a hril bawk.