Police hai hrildan chun, kum 30 hnaih tienga upa Shaloni chu zani zan khan Kotla Mubarakpur venga dawr bul lai Maruti Alto-a tlan pasal 5-6 hon vel leh an insukbuoi a, misuol hai hin Shaloni chu vaw hronin an maksan niin an hril.
Police hai hrildan pei chun, Shaloni hi Munirka-a um niin, BPO Call Centre-a sinthaw a ni a; Kotla Mubarakpur lai hin a ruolhai ina fe tum niin an hril.
Police hai chun, zanril dar 2:30 velin hienglai hmun-ah insukbuoi an um ti thu an hriet le inruolin, thiltlungna hmuna an fe nghal a, an tlung chun Shaloni chu vuok hliema hmu-in hieng laia inthoka hla rak lo All India Institute of Medical Sciences (AIIMS) hospital-ah an ṭhuoi phei nghal a, amiruokchu damdawi In an tlung chun Shaloni chun a hliem tuorzo loin a thi hman niin a hril.
Police hai chun hi thu le inzom hin tuolthatna thubuoi an zieklut ta thu hrilin, thiltlungna hmun laia CCTV khom an lak ta a, ringhla mi iemanizat an hriet ta thu an hril bawk.
Shaloni-in hmupui tum a ruolhai ruok chu tu chen hin la hriet hri an ni nawh. Shaloni hi ieng hnam am a na, ti ei thu lakna chun a hril nawh.
Minister of State for Home Kiren Rijiju chun, “Thil tum lawk renga thilthaw angin a’nlang a, hi tuolthat thu hi home ministry-in suichieng a nih,” tiin a hril.
Loading....