CCPur, July 26, 2014: Zani khan Hmar People's Convention Democratic (HPC-D) chun thusuok siemin, Thawlenni July 22 zingkar dar 2:30 bawr vela Aizawl-a Sinlung Hills Develepment Council (SHDC) chairman Hmingchunghnung a in bawl kawllaia Mizoram Police motor bomb-tu kha keini thaw a nih, tiin an inpuong.
HPC-D thusuok chun, 1994 laia Mizoram le HPC inkara inremna thuthlung (peace accord) ziekna dingin khang hunlai khan Hmingchunghnung hi HPC-in ringzo taka hmalatu le ṭhuoitu dingin a dande a, sienkhom HPC phut tak - India Constitution Six Schedule dan hnuoia Autonomous District Council (ADC) - intlun ta nekin "Peace Accord" chun SHDC chu a piengpui ta lem; a hnung pei-ah Hmingchunghnung hi Mizoram sorkar leh indangna um loa Hmar hnam phatsantu a nih, tiin a tarlang.
Hieng baka hin, tulai hnaia HPC-D, India sorkar thlungpui le Manipur sorkar-in Suspension of Operation (SoO) an nei zing laiin Mizoram Armed Police (MAP)-in Manipur Tipaimukh biela Parvachawm, Lungthulien, Ngampabung le Patpuihmun khuo hai-ah nunrawng taka an chetna khom hi Hmingchunghnung le Mizoram sorkar kutsuok lieu lieu a nih, tiin HPC(D) chun hrilin, nuom inlang khang hunlai khom khan mipui ngaituona lei ninaw sien HPC-D chun action a lak thei zing a nih, tiin an thusuok chun a tarlang bok a nih.
"HPC-D Special Operation Unit hai chu Aizawl le Mizoram hmun remchangna hrang hrang-ah kan um zinga, kan thilthaw hi a ṭul chun kan thaw nawk ding a nih. Hmar mipui hmusittu le sukthlabartu chu kan nuom hun hun-ah kan tumtar thei zing ti hi Mizoram sorkar khoma lo hre raw seh," tiin thusuok a chun tarlang a ni bawk.
July 22 zingkar 2:30 vel khan Aizawl Bungkawn Vengthar-a SHDC chairman Hmingchunghnung in bawl lai mek bul hnaih lai bomb suok puok a ni a, bomb hi Mizoram police officer DSP Ryado Hlychho motor Gypsy-ah sukpuok a nih. Bomb hin Gypsy motor hmatienga engine hai a suksiet nasa hle a, a bul hnaia in le bang hai khom a suksiet nasa hle a nih. Hi bomb sukpuok a hin mihriem thi le hliem ruok chu an um nawh.
Loading....