India hmarsak biela State hrang hrang hai infepawna siemṭhatna chu NEC-in a ngai poimaw thu hrilin, DoNER minister chun Twelfth Five Year Plan sunga hmarsak State hmasawnna dinga an hmalak dan hai le project fepui mek hai tarlangna a nei.
Planning Commission-in 12th Five Year Plan sunga hmarsak State ta dinga hma a lakdan hai chu:
1. Infepawna lampui siemṭhat: Hmarsak biela motor lampui, rel lampui, vuongna le long hmanga infepawna siemna dinga project fepui mek hai an rang tienga inpei fel thuoi a ni theina dingin hma lak mek a nih.
2. Kawlpheṭha tieng hmasawnna: State power companies/corporations hai sum le kawlpheṭha hlaw zat suktlawmna dinga semdar tieng sukchanghlun tum a ni a, hi taka ding hin transmission line project mumal taka fepui tum a nih. Hydro-power project fepui mek hai ta dingin forest le environment clearance lakna konga harsatna um hai chu sukkieng vat tum a ni bawk.
3. Look East Policy hlawtlingna dinga hmalak: Policy hnuoia Bangladesh le inlaichinna ṭha siemna dingin infepawlna tieng sukchanghlun mek a ni a, ramri a sumdawngna fepuina dingin Land Customs Stations (LCS) sukchanghlunna dingin hma lak mek a ni bawk. Long hmanga infepawna Kaladan Multi Modal Transport project fepui mek a ni bawk. Hmarsak biel chu South East Asia ram hai leh thlungzom an ni theina dingin motor lampui lien, Tri-lateral Highway siem tum a nih.
4. Agriculture/ horticulture, allied sector hmasawnna dingin theitawp suo a hma lak a ni bok a, thlai thar suok sukpungna ding le irrigation facility sukchanghlunna dingin thlai thar sawngbawlna le thlai thar zorna dinga infrastructure sukchanghlun tum a ni bawk.
5. Hmarsak biela private investor hai hipna dingin boruok muongum le ṭha lem siem tumin hma lak mek bok a nih.
6. Tui sawngbawla tieng ngai poimaw a ni bok a, tui lien leia sietna tlung thei hai laka invengna dingin kong hrang hrang-ah hma lak a nih.
7. Inchukna, hriselna le thiemthil tienga hmasawnna ngai poimaw bok a ni a, education sector-ah Public Private Partnetship (PPP) model fepui dinga hma lak a nih. Zirtirtuhai training-na ding le vocational education-a dingin investment nei mek a ni bawk. Medical college, nursing college le health & technical institute hong belsa pei tum a ni bawk.
8. State thil hlu nei hai, lampui, pil le vantlang hmangruo vong ṭhatna tieng ngai poimaw a ni bawk.
DoNER minister chun, Bodoland Territorial Council (BTC) ta dingin special development package Rs. 500 crore pek a ni bak-ah Rs. 250 crore pek bel an ni thu hrilin, Karbi Anglong Autonomous Territorial Council (KAATC) kuomah Special Economic Package Rs. 350 crore le Dima Hasao Autonomous Territorial Council (DHATC) kuomah Rs. 200 crore pek an ni thu a hril bawk.
Loading....