Nupui pawngsuol hrona intum mi 2 man

Aizawl, July 22, 2014: Liemtah July 18 zana Chawlhhmun veng sunga nupui pakhat pawngsuol hrontua intum Chawlhhmun khawsuok ve ve Zarzoliana (k. 19) s/o C. Laltanpuia le PC Lalhruaitluanga (k. 20) s/o PC Vanlalruata hai chu Pathienni July 20 zantieng khan police-in an man a, an 2 hin zani khan Court-ah inlangtir an ni a, Jail-ah sie lut nghal an nih.

Mizoram police hotu hai hrildanin, Zarzoliana le PC Lalhruaitluanga hai pawngsuol hron nuhmei hi kum 27 mi a ni a, a pasal vai chu kum 64 mi a nih, tiin an hril.

Pawngsuoltua intum hai hi Court-ah an inpuong danin, poi an thawna in-ah hin sitting room/choka-ah nuhmeinu pasal chu hruiin an khit a; a pasal chu PC Lalhruaitluanga chun a lo veng sungin a nuhmei chu Zarzoliana hin zalna pindan-ah lutpuiin a pawngsuol a, chu hnungin PC Lalhruaitluanga chun a pawngsuol ve nawk niin an hril.

Zarzoliana le PC Lalhruaitluanga hai chun, nuhmei an pawngsuol lai hin an inrui hle a, zu le alphazolum an thaw pol niin an hril. Pawngsuolnu thuhril hmanga Court zawna sangin, pawngsuoltua intum 2 hai chun nupa hai chu a tirin thingher-in an inṭhi a, amiruokchu an hlap naw a, voi 2 ve ve an ben niin an hril.

Nupuinu kekorte kara Rs. 700 a sie an lak pek intumna-ah Zarzoliana le PC Lalhruaitluanga hai chun an lak pek ngei thu an hril a, amiruokchu tlawm a zawng an pek kir nawk thu an hril. An fesan hma’n zu zor talo dingin an vau thu an hril bok a nih.

Zarzoliana le PC Lalhruaitluanga hai hi police hai ngenna angin, Aizawl District Jail-ah zani khan sie lut nghal an nih.