Vanapa lim tlangzar inkhawmnaa hin R. Romawia chun, Vanapa chu Mizo pasalṭha hai laia hmingthang pawl tak ani thu hrilin, mi suongum ani thu le Mizo hai um sung Vanapa hming a chuoi ta naw ding thu a hril.
Art & Culture minister chun, “Tlawmngaina nunpui inlangtirna konga hai, ral relna konga hai, Mizo ze ṭha le khawtlang inenkolna konga dan ṭha voisun chena ei la som hai hi Vanapa’n Mizo hai ta dinga thil ropui a maksan hai a ni a; hieng mawphurna phur sunzom tu ding chu ṭhangthar hai an nih. Vanapa nun anthokin inchuk ding tam tak an nei a nih,” tiin a hril. Vanapa lim inngirtirna dinga a bul anthoka hma latu arts & culture minister hlui PC Zoram Sangliana ṭhahnemngaina khom inpak um hle a nih, tiin a hril bawk.
Vanapa lim tlangzarna inkhawm hi art & culture director Ngurbiaka’n a keiṭhuoi a, A & C research officer C. Laltlankima-in Vanapa lim inngirtirna dinga hmalak dan hai a hril a, a liem siemtu James Khamliansawm khomin a siem dan hai a hril bok a nih. Vanapa lim tlangzarnaa hin Vanapa tupa Chawnglianchhinga khom a ṭhang nghe nghe bok a nih.
C. Laltlankima hrildanin, Art & Culture department chun kum 2012-13 khan Heritage Conservation hnuoi-ah Vanapa lim siemna dingin 13th Finance Commission anthoka sum an hmu anthokin Rs. 9,50,000 an sie a, April 2013 khan Vanapa Lim Committee an indin thu a hril.
Vanapa Lim Committee chun Vanapa lim inzieksiekna an buotsai peluttu laia a ṭha taka an ngai Tuidam khuo naupang K. Lalrohlua ziek chu enton dingin an thlang a; hi Vanapa lim hi entonin Masters of Fine Arts (Sculpture) zo James Khamliansawma chun Santiniketan-ah October 2013 anthok April 2014 sung a siem a nih.
Vanapa lim hi ft. 5 le inchi 6 a insang, kg 250 vela rik a ni a; a siemna dinga sum sengso zat chu Rs. 9.5 lakh a nih.
Loading....